މިދިޔަ އޮކްޓޯބަރު މަހު ފުލުހުންނަށް އެންމެ ގިނައިން ރިޕޯޓު ކޮށްފައިވަނީ ވައްކަމުގެ މައްސަލަތައް!

މިދިޔަ އޮކްޓޯބަރު މަހު ދިވެހި ފުލުހުންގެ ޚިދުމަތަށް އެންމެ ގިނައިން ރިޕޯޓު ކޮށްފައިވަނީ ވައްކަމުގެ މައްސަލަތައް ކަމަށް ފުލުހުންގެ ފާއިތުވިމަހުގެ ކުށުގެ ރިޕޯޓު ތަކުން ހާމަވެއްޖެއެވެ. 

އެގޮތުން މިފާއިތުވި އޮކްޓޯބަރު މަހު ފުލުހުންނަށް ވައްކަމުގެ 253 މައްސަލައެއް ހުށައެޅިފައިވެއެވެ. އަދި ޓްރެފިކް އެކްސިޑެންޓުގެ 241 މައްސަލައެއް ވަނީ ފުލުހުންނަށް ހުށައަޅައިފައެވެ. 

ތިންވަނައަށް އެންމެ ގިނައިން ހުށައަޅައިފައިވަނީ މަސްތުވާތަކެތީގެ މައްސަލަތަކެެވެ. އެގޮތުން މަސްތުވާތަކެތީގެ 118 މައްްސަލައެއް ވަނީ ހުށައަޅައިފައެވެ. 

ގެއްލިފައިވާ ތަކެއްޗާއި ގުޅޭ 68 މައްސަލައެއް ހުށައަޅައިފައިވާއިރު، އަނިޔާކުރުމުގެ 44 މައްސަލައެއް ވަނީ ހުށައަޅައިފައެވެ. މީގެއިތުރުން މުދަލަށް ގެއްލުންދިނުމުގެ 43 މައްސަލައެއް ހުށައަޅައި ފޭރުމުގެ 37 މައްސަލައެއް ވަނީ ހުށައަޅައިފައެވެ.

މީގެއިތުރުން ޖިންސީ ފުރައްސާރައިގެ 18 މައްސަލައެއް، ޚިޔާނާތުގެ 17 މައްސަލައެއް، ގެވެށި އަނިޔާގެ 11 މައްސަލައެއްގެ އިތުރުން ޗެކް ބައުންސް ވުމުގެ މައްސަލައެއް ވަނީ ހުށައަޅައިފައެވެ.