ރަށު ކައުންސިލްތަކުގެ ދައުރު އިތުރުވާން ޖެހޭ ކަމަށާއި އިތުރުކުރަންޖެހޭ ކަމަށް ވަޒީރު އާދަމް ޝަރީފު ވިދާޅުވެއްޖެ!

ރަށު ކައުންސިލްތަކުގެ ދައުރު އިތުރުވާން ޖެހޭ ކަމަށާއި އިތުރުކުރަންޖެހޭ ކަމަށް ސިޓީ ތަކާއި އިދާރީ ދާއިރާތަކުގެ ހިންގުމާއި ޢާންމު ޚިދުމަތް ތަކާއި ބެހޭ ވަޒީރު އާދަމް ޝަރީފް ޢުމަރު ވިދާޅުވެއްޖެއެވެ.

ވަޒީރު އާދަމް ޝަރީފު މިހެން ވިދާޅުވީ “ކޮޅުމަޑުލު އިސްރަށްވެހިންގެ މަހާސިންތާ 2024” ހުޅުވައިދެއްވުމަށް ރޭ ވޭމަންޑޫގައި ބޭއްވި ރަސްމިއްޔާތު ޝަރަފުވެރިކޮށްދެއްވާ ދެއްކެވި ވާހަކަފުޅުގައެވެ.

ކައުންސިލުތަކަށް އޮންނަ ހިއްސާއާ ދައުރު މިހާރަށް ވުރެ ވެސް ބޮޑުވުމަކީ، ދެކެން ބޭނުންވާ މަންޒަރާއި، އުންމީދުކުރާ ދުވަސް ކަމަށް އެމަނިކުފާނުގެ ވާހަކަފުޅުގައި ވިދާޅުވިއެވެ.  

ވަޒީރު ވިދާޅުވީ ރަށްރަށުގައި ކުރާ ކަންތައްތައް އެއީ ނަރުދަމާ ކަމަށް ވިއަސް، އެއީ ފެނުގެ ޚިދުމަތް ކަމަށް ވިއަސް، ނުވަތަ ކަރަންޓުގެ ޚިދުމަތެއް ކަމަށް ވިޔަސް، ނުވަތަ އެ ރަށެއްގައި ދައުލަތުން ނުވަތަ ސަރުކާރުގެ ފަރާތުން ވަކި މުއައްސަސާއެއް ޤާއިމްކުރުން ކަމަށް ވިޔަސް، އެކަމެއް ކުރުމުގައި ރައްޔިތުންގެ ފަރާތުން ވާހަކަ ދައްކާ މަޝްވަރާކުރަން ތިބޭ ބަޔަކީ ކައުންސިލުތައް ކަމަށެވެ.

ސަރުކާރުގެ ފަރާތުން ކުރާ ކޮންމެ ކަމެއް ކުރުމުގައި ރައްޔިތުންނާ ހަމައަށް އައިސްގެން އެ ކަމެއް ކުރާ ކަމަށް ވާނަމަ، އެ ކަމެއްގައި ރަށްރަށުގެ ކައުންސިލްގެ ދައުރު އޮންނަންޖެހޭ. ކައުންސިލުގެ ހިއްސާ އިތުރުވާންޖެހޭ. އަދި އިތުރު ކުރަންޖެހޭ

އާދަމް ޝަރީފް ވިދާޅުވިއެވެ.

ލާމަރުކަޒީ ނިޒާމު ރަނގަޅުކުރުމަށް ޓަކައި ކޮންމެ ސަރުކާރަކުން ވެސް ގިނަ މަސައްކަތްތަކެއް ވަނީ ކޮށްފައި ކަމަށް އެމަނިކުފާނު ވިދާޅުވިއެވެ. އަދި މި ނިޒާމު ފުރަތަމަ ތައާރަފުކުރެވުނު އިރުގައި ވެސް ނިޒާމުގައި ރަނގަޅުކުރަންޖެހޭ އެތައް ކަމެއް ހުރި ކަމަށާއި، އެހެންނަމަވެސް ރައްޔިތުން ވޯޓުދީގެން، ރައްޔިތުންގެ ހައްޤުގައި ބަސްބުނަން ތިއްބެވި ބޭފުޅުންނަކީ ކައުންސިލަރުން ކަމަށް ވާތީ، ރައްޔިތުންގެ ހައްޤުގައި ވަކާލާތު ކުރުމުގެ ފުރުސަތާއި، ރައްޔިތުން ބޭނުންވާ ކަންތައްތައް ވިދާޅުވުމުގެ ފުރުސަތު ކައުންސިލަރުން އެބަ އޮތް ކަމަށް ވަޒީރު އާދަމް ޝަރީފު ވިދާޅުވިއެވެ. އަދި މިއަދު ކޮންމެ ނިންމުމެއް ނިންމަނީ މާލެއިން ނޫން ކަމަށްވެސް ވަޒީރު ވަނީ ވިދާޅުވެފައެވެ. 

ރޭ ފެށުނު ކޮޅުމަޑުލު އިސްވާރުންގެ މަހާސިންތާ 2024 ގައި ކޮޅުމަޑުލުގެ ރަށްރަށުގެ ކައުންސިލްތަކުގެ ރައީސުންނާއި، ސެކްރެޓަރީ ޖެނެރަލުންނާއި، އަތޮޅުގެ ކަންކަން ބަލަހައްޓަވައި ދައުލަތުގެ މުއައްސަސާތަކުގެ ވެރިންނާއި ހާއްސަ މަންދޫބުންނާއެކު ގާތްގަނޑަކަށް ސާޅީހަކަށް ބޭފުޅުން ބައިވެރިވެވަޑައިގަންނަވައެވެ.