މާދަމާއިން ފެށިގެން ސްރީލަންކާއަށް ދަތުރުކުރާ ފަރާތްތަކުން އީ.ޓީ.އޭ. ފޯމެއް ފުރަން ޖެހޭނެ!

ސްރީލަންކާގެ އިމިގްރޭޝަން އުޞޫލަށް ގެނައި ބަދަލުތަކަކާ ގުޅިގެން، 15 އޮކްޓޫބަރު 2025 (މާދަމާ)އިން ފެށިގެން ސްރީލަންކާއަށް ދަތުރުކުރާ ކޮންމެ ފަސިންޖަރަކުމެ، ސްރީލަންކާއަށް އެތެރެވުމުގެ ކުރީން އިލެކްޓްރޯނިކް ޓްރެވަލް އޮތަރައިޒޭޝަން (އީ.ޓީ.އޭ.) އެއް ހުށަހަޅާން ޖެހޭ ގޮތަށް ސްރީލަންކާގެ އިމިގްރޭޝަނުން ވަނީ ކަނޑައަޅާފައެވެ.

މި ގޮތުން، ސްރީލަންކާއަށް ދަތުރުކުރާ ކޮންމެ ފަސިންޖަރަކު ވެސް، ތިރީގައި މިވާ ލިންކް މެދުވެރިކޮށް، ފުރުމުގެ މަދުވެގެން 24 ގަޑި ކުރީން، ގިނަ ވެގެން 48 ގަޑި ކުރީން، މި ފޯމް ފުރިހަމަކޮށް، ހުށަހަޅާން ޖެހޭނެއެވެ.

https://eta.gov.lk/slvisa

މި އައު ޤަވާޢިދުގެ ސަބަބުން، ސްރީލަންކާއިން ދިވެހީނަށް ވިސާ ދޫކުރުމަށް ހަމަޖެހިފައިވާ އިންތިޡާމަށް ނުވަތަ ސިޔާސަތަށް އެއްވެސް ބަދަލެއް އައިސްފައިނުވާ ކަމަށް ޚާރިޖީ ވުޒާރާއިން ނެރުނު ބަޔާނެއްގައި ވަނީ ހާމަކޮށްފައެވެ.

އެހެންކަމުން، ސްރީލަންކާއަށް ދަތުރުކުރައްވާ ފަރާތްތަކުން، ސްރީލަންކާއަށް ދަތުރުކުރެއްވުމުގެ ކުރީން ސްރީލަންކާގެ އިލެކްޓްރޯނިކް ޓްރެވަލް އޮތަރައިޒޭޝަން (އީ.ޓީ.އޭ.) ފޯމް ފުރުއްވުމަށް ވުޒާރާއިން އިލްތިމާސްކުރެއެވެ.

ސްރީލަންކާ އަށް ދަތުރުކުރާ ދިވެހިންގެ ސަމާލުކަމަށް

📃ނޫސް ބަޔާން | https://t.co/0xHTxdPUfG pic.twitter.com/EBeQdNp2mR

— Ministry of Foreign Affairs 🇲🇻 (@MoFAmv) October 14, 2025