ބަންގްލަދޭޝްގެ ފެކްޓަރީއެއްގައި ރޯވެ 16 މީހުން ނިޔާވެއްޖެ

ބަންގްލަދޭޝްގެ ވެރިރަށް ޑާކާގެ މިރުޕޫރު ސަރަހައްދުގައި ހުންނަ ފެކްޓަރީއަކާއި ކެމިކަލް ގުދަނެއްގައި އަންގާރަ ދުވަހު ހިނގި އަލިފާނުގެ ހާދިސާގައި، މަދުވެގެން 16 މީހުން ނިޔާވެ، އެތައް ބަޔަކަށް އަނިޔާވެއްޖެއެވެ. ސަލާމަތީ މަސައްކަތްތައް ކުރިއަށްދާތީ، ނިޔާވާ މީހުންގެ އަދަދު އިތުރުވެދާނެ ކަމަށް ރަސްމީ ފަރާތްތަކުން ލަފާކުރެއެވެ.

ފަޔާ ސަރވިސްގެ ޑިރެކްޓަރު ތާޖުލް އިސްލާމް ޗޯދުރީ ވިދާޅުވީ، ހަތް ފަންގިފިލާގެ ފެކްޓަރީގެ ދެވަނަ އަދި ތިންވަނަ ފަންގިފިލާއިން 16 ހަށިގަނޑު ފެނިފައިވާ ކަމަށެވެ. "ނިޔާވި މީހުންގެ އަދަދު އިތުރުވެދާނެ، ސަލާމަތީ މަސައްކަތްތައް ކުރިއަށްދާތީ،" އޭނާ ވިދާޅުވިއެވެ. އަދި އަލިފާން ރޯވި ސަބަބު އަދިވެސް ތަހުގީގު ކުރަމުންދާ ކަމަށް ވެސް އޭނާ ހާމަކުރެއްވިއެވެ.

ގާތްގަނޑަކަށް މެންދުރުގެ ވަގުތެއްގައި ތިންވަނަ ފަންގިފިލާއިން ފެށުނު މި އަލިފާންގަނޑު ވަރަށް ހަލުވިކަމާއެކު ގާތުގައި ހުރި ކެމިކަލް ގުދަނަކަށް ފެތުރިފައިވާ ކަމަށް ހެކިވެރިން ރިޕޯޓުކުރެއެވެ. މި ގުދަނުގައި ބްލީޗިން ޕައުޑަރާއި، ޕްލާސްޓިކާއި، ހައިޑްރޮޖަން ޕަރޮކްސައިޑް ފަދަ ނުރައްކާ ބޮޑު ކެމިކަލްތައް ހުރުމުގެ ސަބަބުން އަލިފާންގަނޑު ވަރަށް ބޮޑުވެ، ސަލާމަތީ ޓީމުތަކުގެ މަސައްކަތަށް ގޮންޖެހުންތަކެއް ކުރިމަތިވިއެވެ.

ހާދިސާ ހިނގި ސަރަހައްދު ބޭރުގައި އަނިޔާވި އަދި ނިޔާވި މީހުންގެ އާއިލާ ޚަބަރެއް ލިބޭތޯ އެދި  ތިއްބެވެ. ފެކްޓަރީގެ ވެރިން އަދިވެސް ފާހަގަވެފައި ނުވާ ކަމަށް ރަސްމީ ފަރާތްތަކުން ބުނެފައިވާއިރު، ފުލުހުންނާއި އަސްކަރިއްޔާގެ މީހުން އެމީހުން ހޯދުމުގެ މަސައްކަތް ކުރަމުންދެއެވެ.

ކެމިކަލް ގުދަނުގެ ގާނޫނީ ހައިސިއްޔަތާ ބެހޭގޮތުން ސުވާލު ކުރުމުން، ޗޯދުރީ ވިދާޅުވީ، "ލައިސަންސާ ބެހޭގޮތުން އަޅުގަނޑުމެންނަކަށް އަދި ނޭނގޭ، ނަމަވެސް ފުރަތަމަ ރިޕޯޓުތަކުން ދައްކާ ގޮތުގައި އެތަން ހިންގަނީ ގަވާއިދާ ޚިލާފަށް ކަމަށް ބެލެވެއެވެ. މިކަން ކަށަވަރުވާނީ ފުރިހަމަ ތަހުގީގަށް ފަހުގަ."

ބަންގްލަދޭޝްގެ ވަގުތީ ސަރުކާރުގެ  މުޙައްމަދު ޔޫނުސް މި ހާދިސާއާ މެދު ވަރަށް ބޮޑަށް ހިތާމަފާޅުކުރައްވާ، އަލިފާނުގެ ހާދިސާ ތަހުގީގުކޮށް، އަނިޔާވި ފަރާތްތަކަށާއި އެމީހުންގެ އާއިލާތަކަށް ވަގުތުން އެހީތެރިކަން ފޯރުކޮށްދިނުމަށް އޮފިޝަލުންނަށް އަންގަވާފައިވެއެވެ.

މި ހާދިސާއަކީ ބަންގްލަދޭޝްގެ ސިނާއީ ސަލާމަތީ މިންގަނޑުތައް ދަށްކަމުގެ ހެއްކެކެވެ. 4 މިލިއަނަށް ވުރެ ގިނަ މީހުން ވަޒީފާ އަދާކުރާ، އަދި ގައުމީ އުފެއްދުންތެރިކަމުގެ (ޖީޑީޕީ) ގެ 10 އިންސައްތަ ހިއްސާކުރާ އެގައުމުގެ ފޮށިގަނޑު އުފެއްދުމުގެ ސިނާއަތަށް ވަނީ ތަކުރާރުކޮށް ހިތާމަވެރި ހާދިސާތައް ކުރިމަތިވެފައެވެ. އޭގެ ތެރޭގައި 2013 ވަނަ އަހަރު ރާނާ ޕްލާޒާ ޙާދިސާގައި، 1,100 އަށް ވުރެ ގިނަ މީހުން މަރުވި ހާދިސާ ހިމެނެއެވެ.

ރަސްމީ ފަރާތްތަކުން ކަށަވަރުކޮށްދެއްވީ، އަލިފާންގަނޑު ކޮންޓްރޯލް ކުރުމަށް 12 ފަޔާފައިޓިންގ ޔުނިޓް ތިން ގަޑިއިރަށް ވުރެ ގިނައިރު މަސައްކަތް ކުރި ކަމަށެވެ. ބަންގްލަދޭޝް ސިފައިންނާއި ފުލުހުންނާއި ބޯޑަރު ގާޑްސް ވެސް ވަނީ ސަލާމަތީ މަސައްކަތްތަކުގައި ބައިވެރިވެފައެވެ. ގުދަނަށް ރޯވި އަލިފާންގަނޑު ވަނީ ރޭގަނޑުގެ ފަހުކޮޅާ ހަމައަށް ވެސް އަނދަމުން ގޮސްފައެވެ.