ބަންގްލަދޭޝްގެ ޓެކްސްޓައިލް އެކްސްޕޯޓް އިންޑިއާ މެދުވެރިނުކޮށް ދިވެހިރާއްޖެއިން ބޭރުކުރަން ފަށައިފި

ދެކުނު އޭޝިއާގެ ވިޔަފާރީގެ މަގުތައް އަލުން ބައްޓަންކުރުމުގެ ސްޓްރެޓެޖިކް ފިޔަވަޅެއްގެ ގޮތުން، ދުނިޔޭގެ ދެވަނައަށް އެންމެ ބޮޑު އަންނައުނު އުފައްދާ ޤައުމު ކަމުގައިވާ ބަންގްލަދޭޝްއިން، ދުނިޔޭގެ  މާކެޓްތަކަށް ޓެކްސްޓައިލް އެކްސްޕޯޓްކުރުމުގައި އިންޑިއާ މެދުވެރިނުކޮށް ދިވެހިރާއްޖެ މެދުވެރިކޮށް ފޮނުވަން ފަށައިފިއެވެ.

މި ބަދަލަކީ ސަރަޙައްދީ ލޮޖިސްޓިކްސްގައި މުހިންމު ބަދަލެއް ގެނުވުމުގެ އިތުރުން، 2024 ވަނަ އަހަރުގެ މާރިޗު މަހު ފެށުނު ދިވެހިރާއްޖޭގެ އައު ކަނޑާއި ވައިގެ ޓްރާންސްޝިޕްމަންޓް ޚިދުމަތުގެ ކާމިޔާބީ ފާހަގަކޮށްދޭ ކަމެކެވެ. މި ޚިދުމަތަކީ އަންނައުނު ފަދަ ވަގުތަށް ބަރޯސާވާ މުދަލަށް އަވަސް އަދި އިތުބާރުހުރި ގޮތެއް ހުށަހަޅައިދޭ ޚިދުމަތެކެވެ.

އިންޑިއާގެ މީޑިއާ އައުޓްލެޓް މިންޓުން ރިޕޯޓުކޮށްފައިވާ ގޮތުގައި، މި ބަދަލުގެ ސަބަބުން އިންޑިއާގެ ކާގޯ އާމްދަނީއަށް އަސަރުކޮށް، އިންޑިއާގެ ބަނދަރުތަކާއި އެއަރޕޯޓުތަކުން ގެންދާ ބަންގްލަދޭޝްގެ މުދަލުގެ އަދަދު މަދުވެގެންދާނެއެވެ. މިއީ ބަންގްލަދޭޝްއިން އެ ޤައުމުގެ ސަޕްލައި ޗެއިންގެ މައްޗަށް އިތުރު ބާރު ހޯދުމަށާއި، ޝިޕްމަންޓް މުއްދަތުތަކަށް ފެތުމުގެ ޤާބިލުކަން އިތުރުކުރުމަށް މަސައްކަތްކުރާ ދަނޑިވަޅެއްގައި އައި ބަދަލެކެވެ. މިއީ ވަރަށް ވާދަވެރި ބައިނަލްއަޤްވާމީ ފެޝަން އިންޑަސްޓްރީގައި އަސާސީ ކަންކަމެވެ. އެއީ ލަސްވުމުގެ ސަބަބުން އާމްދަނީ ގެއްލިގެން ހިނގައިދާނެތީއެވެ.

މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ ދަށުން، މި ކަނޑާއި ވައިގެ ޚިދުމަތް ފެށިފައިވަނީ މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް)، މޯލްޑިވްސް ސްޓޭޓް ޝިޕިންގ (އެމްއެސްއެސް)، އަދި ޓަރކިޝް އެއަރލައިންސްއާ ގުޅިގެންނެވެ. މި ޚިދުމަތުގެ ދަށުން މުދާ ކަނޑުމަގުން ދިވެހިރާއްޖެއަށް ގެނެސް، އެއަށްފަހު ބައިނަލްއަޤްވާމީ މަންޒިލްތަކަށް ވައިގެ މަގުން ފޮނުވުމުގެ ފުރުޞަތު ލިބިގެންދެއެވެ. މި މަލްޓިމޯޑަލް ލޮޖިސްޓިކްސް ޙައްލަކީ އެޗް އެންޑް އެމް އަދި ޒާރާ ފަދަ މަޝްހޫރު ބްރޭންޑްތައް ހިމެނޭ ބަންގްލަދޭޝްގެ ޓެކްސްޓައިލް އެކްސްޕޯޓަރުންނަށް ފައިދާކުރަނިވި ކަމެކެވެ. އެއީ އެފަދަ ކުންފުނިތަކުން ވަގުތަށް ފެތޭ އަދި އެއްގޮތަކަށް ކުރިއަށްދާ ޑެލިވަރީތަކަށް ބޭނުންވާތީއެވެ.

މި ޚިދުމަތުގެ ދަށުން ފުރަތަމަ ކާމިޔާބު ޝޕްމަންޓް ކުރެވުނީ 2024 ވަނަ އަހަރުގެ މޭ މަހުގައެވެ. އެއީ ބަންގްލަދޭޝްއިން ގެނެވުނު 935 ކާޓަން ރެޑީމޭޑް އަންނައުނެވެ. މި މުދާ ޓަރކިޝް އެއަރލައިންސް މެދުވެރިކޮށް ޖަރުމަނުވިލާތަށް ފޮނުވުނެވެ. މި ސްޓްރެޓެޖިކް ބަދަލާއެކު، ދިވެހިރާއްޖެ ވަނީ ދުނިޔޭގެ ޓެކްސްޓައިލް ލޮޖިސްޓިކްސްގެ މުހިންމު ގުޅުމަކަށް ވެފައެވެ. މިހާރު ޤަޠަރު އެއަރވޭޒް، އެމިރޭޓްސް، ޓަރކިޝް އެއަރލައިންސް، އެރޮފްލޮޓް، ގަލްފް އެއަރ، ނިއޯސް އެއަރލައިންސް، އަދި އެތިހާދު އެއަރވޭޒް ހިމެނޭ ހަތް އެއަރލައިނެއް މި ޓްރާންސްޝިޕްމަންޓް ނެޓްވަރކްގައި ބައިވެރިވެފައިވެއެވެ.

ބަންގްލަދޭޝް އަދި ދިވެހިރާއްޖެއަށް ކަނޑާއި ވައިގެ މަގުން ލިބޭ ފައިދާތައް:
ދިވެހިރާއްޖޭގެ ކަނޑާއި ވައިގެ ޚިދުމަތުން ބަންގްލަދޭޝްގެ އެކްސްޕޯޓަރުންނަށް ވަކި ފައިދާތަކެއް ލިބެއެވެ. އެއީ މާކެޓްގައި މަޤާމު ދެމެހެއްޓުމަށް އަވަސްކަމާއި ހަރުދަނާކަމަށް ބަރޯސާވާ ފަރާތްތަކަށެވެ. އިންޑިއާގެ ތޮއްޖެހިފައިވާ އެއަރޕޯޓުތަކާއި ބަނދަރުތައް ބޭނުން ނުކުރުމުގެ ސަބަބުން، ބަންގްލަދޭޝްގެ ކުންފުނިތަކަށް އޮޕަރޭޝަންތައް ހަރުދަނާކޮށް، ސަޕްލައި ޗެއިންގެ މައްޗަށް އިތުރު ބާރު ލިބި، ޚާއްޞަކޮށް ޑިމާންޑް މަތިވާ ދުވަސްވަރު ވަގުތަށް ފޮނުވުން ކަށަވަރުކުރެވެއެވެ.

ކަނޑާއި ވައިގެ ޚިދުމަތުން ދިވެހިރާއްޖޭގެ ލޮޖިސްޓިކްސް ހަބެއްގެ ގޮތުގައި އޮތް  ފުރުސަތު އިތުރުވެ، ފަތުރުވެރިކަމުގެ އިތުރުން އިޤްތިޞާދު ތަފާތު ދާއިރާތަކަށް ފުޅާވެގެންދެއެވެ. މޯލްޑިވްސް އެއަރޕޯޓްސް ކޮމްޕެނީ ލިމިޓެޑުން މި ތަރައްޤީގެ ފައިދާ ނަގައި، ކަނޑުމަގުން ބައިނަލްއަޤްވާމީ ވައިގެ މަގުތަކަށް ސާފު ގުޅުމެއް ހޯދައިދީފައިވެއެވެ. އިންޑަސްޓްރީގެ މާހިރުން ބުނާ ގޮތުގައި މި ލުއިފަސޭހަކަމަކީ ޓެކްސްޓައިލް ފަދަ މުދާ އެކްސްޕޯޓްކުރުމަށް މުހިންމު ކަމެކެވެ. އެއީ މޫސުމީ މާކެޓުތަކުގައި ވަގުތަށް ބަރޯސާވާ މުދަލެއްގެ ގޮތުގައި ބެލެވޭތީއެވެ.

އިންޑިއާއަށް ކުރާނެ އިޤްތިޞާދީ އަސަރު:
އިންޑިއާއަށް ކުރިން ބަންގްލަދޭޝްގެ ޓެކްސްޓައިލް ޝިޕްމަންޓްތައް އެ ޤައުމުގެ ބަނދަރުތަކާއި އެއަރޕޯޓުތަކުން ގެންދިއުމުން ލިބެމުންދިޔަ އާމްދަނީ ގެއްލިގެންދާނެއެވެ. މީގެ އިތުރުން، މި ބަދަލުގެ ސަބަބުން އިންޑިއާއާއި ބަންގްލަދޭޝްއާ ދެމެދު އޮތް ވިޔަފާރީގެ ގުޅުން ނިކަމެތިވެ، ލޮޖިސްޓިކްސް އަދި އިންފްރާސްޓްރަކްޗަރ މަޝްރޫޢުތަކުގައި އެއްބާރުލުމުގެ ފުރުޞަތުތައް މަދުވެގެންދާނެއެވެ. އިންޑިއާގެ އޮފިޝަލުން މި ބަދަލުގެ އަސަރު ކުޑަކުރުމަށް ކުރެވިދާނެ ކަންކަން ދިރާސާކުރަމުންދާ ކަމަށް ރިޕޯޓުތަކުގައި ބުނެއެވެ.

އެމްއެސްސީ އޭޖެންސީ (އިންޑިއާ) ޕްރައިވެޓް ލިމިޓެޑްގެ މެނޭޖިންގ ޑިރެކްޓަރ ދީޕަކް ތިވާރީ ބުނާ ގޮތުގައި، ޝިޕްމަންޓްތައް ދިވެހިރާއްޖެ މެދުވެރިކޮށް ފޮނުވުމުން އިންޑިއާގެ ލޮޖިސްޓިކްސް ދާއިރާއަށް ގޮންޖެހުންތަކެއް ކުރިމަތިވެދާނެއެވެ. އެއީ ބަންގްލަދޭޝްގެ ޓެކްސްޓައިލް އެކްސްޕޯޓުތަކުގެ ބޮޑު ބައެއް އުފައްދަނީ ބަންގްލަދޭޝްގައި ހުރި އިންޑިއާގެ  ފެކްޓަރީތަކުން ކަމަށްވާތީއެވެ.

ބަންގްލަދޭޝްއަށް ސްޓްރެޓެޖިކް ފިޔަވަޅެއް:
އިންޑަސްޓްރީގެ މުރާޖަޢާކުރާ ފަރާތްތަކުން ބުނާ ގޮތުގައި ބަންގްލަދޭޝްއިން އިންޑިއާ މެދުވެރިނުކުރުމަށް ނިންމާފައިވަނީ އެ ޤައުމުގެ ލޮޖިސްޓިކްސްގެ މިނިވަންކަން ހޯދުމަށާއި، އިންޑިއާގެ ބަނދަރުތަކާ ގުޅިފައިވާ ލަސްވުންތަކުން ސަލާމަތްވުމަށެވެ. ދިވެހިރާއްޖޭގެ ސްޓްރެޓެޖިކް މަޤާމުގެ ބޭނުން ހިފައިގެން، ބަންގްލަދޭޝްގެ އެކްސްޕޯޓަރުންނަށް ބައިނަލްއަޤްވާމީ ޑެލިވަރީގެ ހަރުކަށި ޝަރުޠުތަކަށް ފެތުމަށް ކުޅަދާނަވެ، ވަގުތަށް ފެތޭ ޑެލިވަރީތައް މުހިންމުވާ ދުނިޔޭގެ މާކެޓެއްގައި ވާދަވެރި މަޤާމެއް ހޯދިދާނެއެވެ.

މި މަގުން ބަންގްލަދޭޝްގެ ސަޕްލައި ޗެއިންގެ އިތުބާރު އިތުރުވެ، ވަގުތަށް ފެތޭ ޑެލިވަރީ ކަށަވަރުކުރެވޭ. މިއީ ލަސްވުމުގެ ސަބަބުން ކޮންސައިންމަންޓްތައް ބަލައިނުގަނެވޭ މާކެޓެއްގައި ވަރަށް މުހިންމު ކަމެއް

އިންޑަސްޓްރީގެ އެތެރޭގެ މަޢުލޫމާތު ލިބިފައިވާ ފަރާތަކުން ބުންޏެވެ.

ކަނޑާއި ވައިގެ ޓްރާންސްޝިޕްމަންޓް ޚިދުމަތުގެ މުސްތަޤްބަލު:
ދިވެހިރާއްޖޭގެ ލޮޖިސްޓިކްސް އިންފްރާސްޓްރަކްޗަރ ފުޅާވަމުންދިއުމާއި އިތުބާރުހުރި ޕާޓްނަރޝިޕްތަކާއެކު، ކަނޑާއި ވައިގެ ޚިދުމަތަށް އިތުރު ބައިނަލްއަޤްވާމީ ޝައުޤުވެރިކަން ލިބޭނެ ކަމަށް ބެލެވެއެވެ. މިއީ ސަރަޙައްދުގައި އުފެދެމުންދާ ޓްރާންސްޝިޕްމަންޓް ހަބެއްގެ ގޮތުގައި ދިވެހިރާއްޖެ ފާހަގަކޮށްދޭ ކަމެކެވެ. ފުރަތަމަ ޝިޕްމަންޓްތަކުގެ ކާމިޔާބީން ދައްކުވައިދެނީ ފަތުރުވެރިކަމުގެ އިތުރުން ދުނިޔޭގެ ވިޔަފާރި ބާރުވެރިކުރުވުމުގައި ދިވެހިރާއްޖެއަށް އޮތް އުޖާލާ މުސްތަޤްބަލެކެވެ. މިއީ ޤައުމުގެ އިޤްތިޞާދީ ޕްރޮފައިލް އިތުރަށް ފުޅާކޮށްދޭނެ ކަމެކެވެ.

ބަންގްލަދޭޝްއިން ދިވެހިރާއްޖެ މެދުވެރިކޮށް ޓެކްސްޓައިލް އެކްސްޕޯޓްކުރަން ފެށުމަކީ ދެކުނު އޭޝިއާގެ ވިޔަފާރީގެ މަޝްރަޙު ބަދަލުކޮށްލާފަދަ ކަމެކެވެ. މި ބަދަލުން ދިވެހިރާއްޖޭގެ ލޮޖިސްޓިކްސް ދާއިރާގެ ޤާބިލުކަން ފާހަގަކޮށްދޭ އިރު، އިންޑިއާއަށް އައު ގޮންޖެހުންތަކެއް ކުރިމަތިކުރުވައެވެ. ދިވެހިރާއްޖޭގެ ކަނޑާއި ވައިގެ ޓްރާންސްޝިޕްމަންޓް ޚިދުމަތުގެ ކާމިޔާބީއަކީ ސަރަޙައްދުގެ ވިޔަފާރީގެ ދައުރު އަލުން ބައްޓަންކުރުމުގައި އިންޤިލާބީ ބަދަލެއް ގެނެސްދޭ ކަމެކެވެ. މި ތަރައްޤީއާއެކު، ދިވެހިރާއްޖެއަށް ދުނިޔޭގެ ސަޕްލައި ޗެއިންގައި އިތުރު މުހިންމު ދައުރެއް އަދާކުރެވޭނެ ކަމަށް ބެލެވެއެވެ. އަދި މިއީ ޤައުމުގެ އިޤްތިޞާދު އިތުރަށް ފުޅާކޮށް، ވަރުގަދަކުރުމަށް ލިބޭ މުހިންމު ފުރުޞަތެކެވެ.