ލޭންޑިން ކްރާފްޓެއް ބަންޑުން ޖަހާލައި ތިން މީހަކު ގެއްލިއްޖެ

ލޭންޑިން ކްރާފްޓެއް ބަންޑުން ޖަހާލި ހާދިސާއެއްގައި ތިން މީހަކު ގެއްލިގެން ހޯދަމުންދާކަމަށް މެރިން ފުލުހުން ހާމަކޮށްފިއެވެ.

މި ހާދިސާއާ ގުޅިގެން މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް)އިން ހާމަކޮށްފައިވާ ގޮތުގައި، "އަލްމާކް-ފިޔަ" ނަމަކަށް ކިޔާ 100 ފޫޓުގެ މި އުޅަނދު ބަންޑުން ޖަހާލިއިރު އެ އުޅަނދު ދަތުރުކުރަމުން ދިޔައީ މާލެއިން ފުރައިގެން ރީތިރަށް ރިސޯޓަށް ދިއުމަށެވެ.

މާލެއިން ފުރައިގެން ރީތިރަށް ރިސޯޓަށް ދަތުރުކުރި "އަލްމާކް-ފިޔަ" ނަމަކަށް ކިޔާ 100 ފޫޓުގެ ލޭންޑިންގ ކްރާފްޓެއް ބަންޑުންޖަހާލައިގެން، އެމްއެންޑީއެފް ކޯސްޓްގާޑު ސެކަންޑް ސްކޮޑްރަންއިން ދަނީ ހަރަކާތްތެރިވަމުން. މިހާތަނަށް މި އުޅަނދުން ދަތުރުކުރި 4 މީހަކުވަނީ ސަލާމަތްކުރެވިފަ.

— Maldives National Defence Force (@MNDF_Official) October 15, 2025

މީގެ އިތުރުން، މި އުޅަނދު ބަންޑުން ޖަހާލިއިރު 7 ފަޅުވެރިއަކު އޭގައި ތިބި ކަމަށާއި، އެ ތަނުން 4 މީހަކު ސަލާމަތްކުރެވިފައިވާކަމަށް ވަނީ ހާމަކޮށްފައެވެ. މި މީހުން ސަލާމަތް ކުރެވުނީ ރޭގެ މެންދަމުން އަލިވެ ގާތްގަނޑަކަށް 4 ޖަހާކަށް ހާއިރެވެ. 

މި ހާދިސާގައި ގެއްލިފައިވާ 3 މީހުން ހޯދުމަށް ކޯސްޓްގާޑުގެ ޑައިވަރުން ދަނީ ހަރަކާތްތެރިވަމުންނެވެ. 

މެރިން ފުލުހުން ހާމަކޮށްފައިވާ ގޮތުގައި، ގެއްލުނު ތިން މީހުންގެ ތެރެއިން ދެ މީހުން ތިބީ އޭގައި އޮތް އެކްސްކެވޭޓާރއެއްގެ ތެެރޭގައި ކަމަށް މައުލޫމާތު ލިބިފައިވާ ކަމަށެވެ.