ޗައިނާގެ އަސްކަރީ ތަމްރީނަށް ބަދަލުތަކެއް، ޓެކްނޮލޮޖީ ނެތް ހާލަތަށް 'އިންސާނީ ކެލްކިއުލޭޓަރުން' އުފައްދަނީ!

ޗައިނާގެ އަސްކަރިއްޔާ (ޕީޕަލްސް ލިބަރޭޝަން އާމީ - ޕީ.އެލް.އޭ) އިން ވަނީ އާދައިގެ އަސްކަރީ ތަމްރީނު އުސޫލުތަކާ ޚިލާފަށް، އާ ނިޒާމެއް ތައާރަފްކޮށްފައެވެ. މި ނިޒާމުގެ ދަށުން، ހަނގުރާމައިގެ މައިދާނުގައި ޒަމާނީ ޓެކްނޮލޮޖީ ހަލާކުވެދާނެ ހާލަތްތަކަށް ތައްޔާރުވުމަށްޓަކައި، އެބަކަސް ބޭނުންކޮށްގެން ސިފައިންނަށް "އިންސާނީ ކެލްކިއުލޭޓަރުން" ގެ ތަމްރީނު ދިނުމަށް ވަނީ ފަށާފައެވެ. މީގެ މަގުސަދަކީ ޓެކްނޮލޮޖީ ނެތް ހާލަތްތަކުގައި ވެސް ސިފައިންނަށް އަވަހަށް ހިސާބުތައް ހެދޭނެ ގޮތް ހެދުމެވެ.

ޗައިނާގެ ރަސްމީ މީޑިއާ ރިޕޯޓްތައް ބުނާ ގޮތުގައި، މި ޕްރޮގްރާމަކީ ހަނގުރާމަ، ސައިބަރ ހަމަލާ، ނުވަތަ އިލެކްޓްރޯނިކް ހުރަސްތަކުގެ ސަބަބުން ހައި-ޓެކް ނިޒާމްތައް ފެއިލްވެއްޖެނަމަ ވެސް، ޕީ.އެލް.އޭ ގެ އޮޕަރޭޝަނަލް އެފިޝިއެންސީ ދެމެހެއްޓުމަށްޓަކައި ހިންގާ ބޮޑު މަޝްރޫއެއްގެ ބަޔެކެވެ. މި ޕްރޮގްރާމުގެ ދަށުން ސިފައިންނަށް ދަސްކޮށްދެނީ އެބަކަސް ބޭނުންކޮށްގެން  ހިސާބު ހެދުމުގެ ހުނަރެވެ. މީގެ ސަބަބުން ކޮމްޕިއުޓަރުގެ އެހީތެރިކަމެއް ނެތި ވެސް ހަނގުރާމައިގެ މައިދާނުގައި ސީދާ ނިންމުންތައް ނިންމުމަށް ސިފައިންނަށް ފަހިވާނެއެވެ.

ސީ.ސީ.ޓީ.ވީ ރިޕޯޓެއްގައި ދައްކާފައިވާ ގޮތުގައި، މިފަދަ ތަމްރީނުތަކެއްގެ ތެރެއިން ކެޕްޓަން ޝޫ މެއިޑޫ ވަނީ އޭނާގެ މި ހުނަރުގެ މޮޅުކަން ދައްކާފައެވެ. ރާޑަރ ހަލާކުވެފައިވާ ކަމަށް ދެއްކި ހާލަތުގައި ވެސް، އޭނާއަށް ވަނީ މަގު (ޓްރެޖެކްޓަރީ)، އުސްމިން (އެލްޓިޓިއުޑް)، އަދި ބާރުމިން (ވެލޮސިޓީ) ވަރަށް ކުރު ވަގުތެއްގެ ތެރޭގައި ހިސާބުކޮށް، ބަޑީގެ ހަމަލާ ސީދާކުރުމަށް އެހީތެރިވެދީފައެވެ.

ފުރަތަމަ ލޮޖިސްޓިކްސް އަދި ސަޕްލައި ހިސާބުތައް ހެދުމަށް ތައާރަފްކުރި މި އެބަކަސް ބޭސްޑް ޕްރޮގްރާމް، 2019 ވަނަ އަހަރުން ފެށިގެން ހަނގުރާމައިގެ ތަމްރީނުތަކަށް ވެސް ވަނީ ފުޅާކުރެވިފައެވެ. ޗައިނާއިން "ކޮގްނިޓިވް ރެޒިލިއަންސް" (ވިސްނުންތޫނުކަން) އަދި ކުރީ ސަފުގެ ސިފައިންގެ ތެރޭގައި އަމިއްލައަށް ނިންމުންތައް ނިންމުމަށް ބޮޑު ސަމާލުކަމެއް ދެމުންދާ މި ދަނޑިވަޅުގައި މިފަދަ ފިޔަވަޅެއް އެޅުން މުހިންމުކަމަށް ފެނެއެވެ.

ޕީ.އެލް.އޭ ޑެއިލީ، އަސްކަރީ ރަސްމީ ނޫހުން ބުނާ ގޮތުގައި، އެބަކަސް ބޭނުންކޮށްގެން ހިސާބުކުރުމުގެ މި އުކުޅަކީ އާޓިލަރީ އަދި އިންފެންޓްރީ ޔުނިޓްތަކަށް ހަމަލާ ދިނުމަށް އެންމެ ރަނގަޅު ވަގުތާއި އަމާޒަށް ބަދަލު ގެނައުމަށް އެހީތެރިވެދޭ އެއްޗެކެވެ. މީގެ އިތުރުން، މި ހުނަރުގެ ސަބަބުން ހަނގުރާމައިގެ މައިދާނުގައި އެންމެ ބޮޑު ހަމަލާތައްއަންނަ ވަގުތުތަކުގައި ވެސް ހަމަޖެހި، ސަމާލުކަން ދީގެން މަސައްކަތް ކުރުމުގެ ގާބިލްކަން ސިފައިންނަށް ލިބިގެންދެއެވެ.

"ޓެކްނޮލޮޖީ ހަލާކުވެއްޖެނަމަ، ސިފައިންގެ ސިކުނޑިއަކީ އެންމެ އިތުބާރު ހިފޭ އާލަތް" ޕީ.އެލް.އޭ ގެ އިސް އޮފިސަރަކު ވިދާޅުވެފައި ވެއެވެ. "ހައި-ޓެކް ނިޒާމްތައް ހަލާކުވެއްޖެނަމަ ނުވަތަ މެދުކެނޑިއްޖެނަމަ، އިންސާނާ އަމިއްލަ ނަފްސަށް ހިސާބުކުރުމަކީ އެންމެ ރަނގަޅު ބެކްއަޕްއެވެ."

ސީ.ސީ.ޓީ.ވީ އިން ދައްކާފައިވާ ގޮތުގައި، ޕީ.އެލް.އޭގެ އެބަކަސް ތަމްރީނު ޔުނިޓް ފުރަތަމަ އުފައްދާފައިވަނީ 1994 ވަނަ އަހަރުގައެވެ. އަދި އެއިރުން ފެށިގެން އެއީ ރަސްމީ ތައުލީމީ ޕްރޮގްރާމަކަށް ވަނީ ތަރައްގީކުރެވިފައެވެ. މި ޕްރޮގްރާމުގެ ދަށުން އުމުރުން އަށް އަހަރުގެ ކުދިންނަށް ވެސް އެބަކަސް އަދި ނަފްސާނީ ހިސާބުކުރުން ދަސްކޮށްދެއެވެ. އަދި އެންމެ މޮޅު ބައިވެރިން އަސްކަރިއްޔާއާ ގުޅުވައެވެ.

ކެޕްޓަން ޝޫ، އުމުރުން 11 އަހަރުގައި މި ޕްރޮގްރާމާ ގުޅި، ގައުމީ އަދި ބައިނަލްއަގުވާމީ ނަފްސާނީ ހިސާބުކުރުމުގެ މުބާރާތްތަކުން ވަރަށް ގިނަ ކާމިޔާބީތައް ހޯދާފައިވެއެވެ. މިހާރު އޭނާއަކީ ޕީ.އެލް.އޭގެ ތެރޭގައި މި ހުނަރުތައް ދަސްކޮށްދޭ ޓީޗަރެކެވެ. އަދި ކުރިން އޭނާއަށް މަޝްހޫރުކަން ހޯދައިދިން ހުނަރުތައް ސިފައިންނަށް ދަސްކޮށްދިނުމުގެ ޔުނިޓްތަކަށް އޭނާ ކޮމާންޑްކުރެއެވެ.

އަސްކަރީ ތަޖުރިބާކާރުން ބުނާ ގޮތުގައި، މި ފިޔަވަޅުން ދައްކުވައިދެނީ "ހައިބްރިޑް ހަނގުރާމަ" (ހައިބްރިޑް ވޯފެއަރ) ގެ ހާލަތްތަކަށް ތައްޔާރުވުމަށް ބެއިޖިންގއިން ދެމުންދާ ސީރިއަސްކަމެވެ. އެއީ އާޓިފިޝަލް އިންޓެލިޖެންސް (އޭ.އައި) އަދި އިލެކްޓްރޯނިކްސްއަށް ބަރޯސާވުމަކީ ނުރައްކަލަކަށް ވެދާނެ ހާލަތްތަކެވެ.