އެމްއެންޔޫއިން އެމްބީބީއެސް ހެދި ފުރަތަމަ ބެޗްގެ ދަރިވަރުން އިންޓާންޝިޕް ނިންމާލައިފި

ދިވެހިރާއްޖޭގެ ޤައުމީ ޔުނިވަރސިޓީ (އެމްއެންޔޫ) އިން އެމްބީބީއެސް ނިންމި ފުރަތަމަ ބެޗުގެ 20 ދަރިވަރުން އިންދިރާ ގާނދީ މެމޯރިއަލް ހޮސްޕިޓަލް (އައިޖީއެމްއެޗް) ގައި އިންޓާންޝިޕް ފުރިހަމަކޮށްފިއެވެ.

އައިޖީއެމްއެޗުން މަޢުލޫމާތު ދެއްވިގޮތުގައި، އިންޓާންޝިޕްގެ މުއްދަތުގައި ދަރިވަރުންނަށް ބަލިމީހުންނަށް ފަރުވާދިނުމާއި، ކުއްލި ޙާލަތްތަކުގައި އަވަސް ފިޔަވަޅު އެޅުމާއި، އަދި އަމަލީ ތަޖުރިބާ ހޯދުމުގެ ފުރުސަތު ލިބި، އެކުދިންގެ ހުނަރުތައް އިތުރަށް ތަރައްޤީކުރެވިފައިވެއެވެ. މީގެއިތުރުން، އިލްމީ ގޮތުން ލިބިފައިވާ މަޢުލޫމާތު އަމަލީ މައިދާނުގައި ބޭނުންކުރުމުގެ ތަޖުރިބާވެސް ފޯރުކޮށްދެވިފައިވާކަމަށް އެ ހޮސްޕިޓަލުން ފާހަގަކުރެއްވިއެވެ.

އިންޓާންޝިޕްގެ މުއްދަތުގައި މި ޑޮކްޓަރުންނަށް އިރުޝާދު ދެއްވި އެންމެހާ ކޮންސަލްޓަންޓުންނާއި، ކްލިނިޝަނުންނާއި، އަދި އެހެނިހެން އެހީތެރިންގެ އެހީތެރިކަމާއި އިރުޝާދަކީ މި ދަރިވަރުން މިހާ ކާމިޔާބު ކަމާއެކު އިންޓާންޝިޕް ފުރިހަމަ ކުރުމުގައި މުހިންމު ދައުރެއް އަދާކުރި ކަމެއްކަމަށް އައިޖީއެމްއެޗުން ފާހަގަކުރެއްވިއެވެ.

Milestone Unlocked! 🎓
The very first MBBS graduates from MNU have completed their internship at IGMH, marking a proud moment for the Maldives’ healthcare services!

Congratulations to these 20 young doctors who have tirelessly cared for patients, responded to emergencies, and… pic.twitter.com/To6qltSWgi

— IGMH (@igmhmv) October 16, 2025

މި ދަރިވަރުން މިހާރު ރާއްޖޭގެ ޞިއްޙީ ޚިދުމަތުގެ ދާއިރާގައި މަސައްކަތްކުރުމަށް ފުރިހަމައަށް ތައްޔާރުވެފައިވާކަމަށާއި، މިއީ ރާއްޖޭގެ ޞިއްޙީ ދާއިރާއަށް ލިބުނު ބޮޑު ކުރިއެރުމެއްކަމަށް އައިޖީއެމްއެޗުން ވިދާޅުވިއެވެ. އަދި މިދަރިވަރުންގެ ފަރާތުން ރާއްޖޭގެ ޞިއްޙީ ޚިދުމަތް އިތުރަށް ފުޅާވެ، ކުރިއަރައިގެން ދާނެކަމުގެ އުންމީދު ފާޅުކުރެއްވިއެވެ.

މެޑިކަލް އިންޓާންޝިޕް ޕްރޮގްރާމަކީ ޑޮކްޓަރުކަމުގެ ދާއިމީ ހުއްދަ ހޯދުމަށް ފުރިހަމަކުރަންޖެހޭ އަހަރުދުވަހުގެ މުއްދަތެކެވެ. ނަމަވެސް މިހާތަނަށް މި ޕްރޮގްރާމް ހިންގަމުން އައީ ހަމައެކަނި ދަރުމަވަންތަ ހޮސްޕިޓަލުގައި ކަމަށްވުމުން، ގިނަ ދަތިތަކާ ކުރިމަތިވަމުން އައިސްފައިވެއެވެ. މިކަމަށް ހައްލެއް ހޯދުމުގެ ގޮތުން، ސަރުކާރުން މިހާރު ވަނީ އައްޑޫ އިކުއިޓޯރިއަލް ހޮސްޕިޓަލްގައިވެސް މި ޕްރޮގްރާމް ފުރިހަމަކުރެވޭނެ މަގު ތަނަވަސްކޮށްދީފައެވެ.