2025 ވަނަ އަހަރު ވެގެންދާނީ އިސްލާމީ ޔުނިވާސިޓީއަށް ފާގަތި އަހަރަކަށް:ޑރ. މުޙައްމަދު ޝަހީމް އަލީ ސަޢީދު

އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު ވިދާޅުވެފައިވަނީ 2025 ވަނަ އަހަރަކީ ދިވެހިރާއްޖޭގެ އިސްލާމީ ޔުނިވާސިޓީއަށް ފާގަތި އަހަރަކަށް ވެގެންދާނެ ކަމަށެވެ. މި ވާހަކަ ވަޒީރު ވިދާޅުވެފައިވަނީ އިސްލާމީ ޔުނިވާސިޓީގެ ކުއްލިއްޔާ އޮފް ޤުރްއާން އެންޑް ސުންނާގެ ފަރާތުން އިންތިޒާމުކޮށްގެން ބޭއްވި "މަޙްފަލުލް ޤުރްއާނިލް ކަރީމް 1446" ގެ ފެށުމުގެ ރަސްމިއްޔާތުގައި ދެއްކެވި ވާހަކަފުޅުގައެވެ.

ވަޒީރު އިތުރަށް ވިދާޅުވެފައިވަނީ ރައީސް ޑރ. މުޙައްމަދު މުޢިއްޒުގެ އަމާޒަކީ ދިވެހިރާއްޖޭގެ އިސްލާމީ ޔުނިވާސިޓީއަކީ ރާއްޖޭގެ ދަރިވަރުންގެ އިތުރުން ރާއްޖޭން ބޭރުގެ ދަރިވަރުންވެސް ތަޢުލީމް ޙާޞިލްކުރުމަށް އަންނާނެ ޔުނިވާސިޓީއަކަށް ހެއްދެވުން ކަމަށެވެ. އަދި ރައީސްގެ މެނިފެސްޓޯގައި އިސްލާމީ ޔުނިވާސިޓީއާ ގުޅޭ ވަރަށް ރަނގަޅު ތަޞައްވުރެއް އެކުލަވާލެވިފައިވާ ކަމަށާއި، މި ތަޞައްވުރު ޙަޤީޤަތަކަށް ހެއްދެވުމަށްޓަކައި ރައީސް މަސައްކަތްޕުޅު ކުރައްވަމުން ގެންދަވާ ކަމަށް ވަޒީރު ފާހަގަކުރެއްވިއެވެ.

ވަޒީރު އިތުރަށް ވިދާޅުވެފައިވަނީ އިސްލާމީ ޔުނިވާސިޓީން ކީރިތި ޤުރުއާނުގެ ޢިލްމު ފެތުރުމަށްޓަކައި ކުރައްވާ މަސައްކަތްތަކުގެ އަގު ވަޒަންކުރައްވާ ކަމަށާއި، އެކަމަށްޓަކައި އިސްލާމީ ޔުނިވާސިޓީގެ އެންމެހާ ވެރިންނަށް ޝުކުރު ދަންނަވާ ކަމަށެވެ. އަދި އިސްލާމީ ޢިލްމު ފެތުރުމަށް އިސްލާމީ ޔުނިވާސިޓީން ކުރައްވަމުން ގެންދަވާ މަސައްކަތްތަކަށް އިސްލާމީ ކަންތައްތަކާ ބެހޭ ވުޒާރާގެ ފަރާތުން ދޭންޖެހޭ ފުރިހަމަ އެއްބާރުލުމާއި އެހީތެރިކަން އަބަދުވެސް ދެއްވާނެ ކަމަށް ވަޒީރު ވިދާޅުވިއެވެ.

މި ރަސްމިއްޔާތުގައި ވަޒީރު ދެއްވި އުފާވެރި ޚަބަރަކީ 2025 ވަނަ އަހަރު އިސްލާމީ ޔުނިވާސިޓީގެ ތަރައްޤީގެ މަޝްރޫޢުތަކުގައި ޢަމަލީ ސިފަތައް ޖެހޭތަން ފެންނާނެ ކަމެވެ. މިކަމަކީ ރާއްޖޭގެ މަތީ ތަޢުލީމުގެ ދާއިރާއަށާއި، ޚާއްޞަކޮށް އިސްލާމީ ތަޢުލީމަށް ލިބިގެންދާނެ ބޮޑު ކުރިއެރުމެއް ކަމުގައި ބެލެވެއެވެ.