ވަގަށްނެގި 67 ސިނގިރޭޓު ކާޓަންއާއެކު ދިވެއްސަކު ހައްޔަރުކޮށްފި

އިއްޔެ ރޭ މާލޭގައި ފުލުހުން ޕެޓްރޯލްކުރަމުން ދަނިކޮށް، ވަގަށް ނަގައިގެން އުޅުނު 67 ސިނގިރޭޓު ކާޓަންއާ އެކު ދިވެއްސަކު ހައްޔަރުކޮށްފިއެވެ.

ފުލުހުން މީޑިއާތަކާ ހިއްސާކުރި މަޢުލޫމާތުގައިވާ ގޮތުން، އިއްޔެ ރޭ 5:40 ހާއިރު ފުލުހުން ޕެޓްރޯލްކުރަމުން ދަނިކޮށް، އޮލިމްޕަސް ކައިރިން ދިޔަ މީހަކާމެދު ތުހުމަތު ކުރެވިގެން ހުއްޓުވައި، އޭނާ ގެންގުޅުނު ދަބަސްތަކަކާއި ކޮތަޅުތަކެއް ބަލައި ފާސްކޮށްފައިވެއެވެ. މި ތަކެތި ބަލައި ފާސްކުރުމުގެ ތެރޭގައި އެ ދަބަސްތަކާއި ކޮތަޅުތަކުން 67 ކާޓަން ސިނގިރޭޓު ފެނިފައިވާ ކަމަށް ފުލުހުން ބުނެފައިވެއެވެ.

ފުލުހުންގެ ތަޙުޤީޤަށް މިހާތަނަށް އެނގިފައިވާ ގޮތުގައި، މި ތަކެއްޗަކީ އޯޝެން ނީޓިކަލްސް ޕްރައިވެޓް ލިމިޓެޑުން ވަގަށް ނަގާފައިވާ ތަކެއްޗެވެ.

މި މައްސަލައިގައި ހައްޔަރުކޮށްފައިވަނީ ށ. ފޭދޫ ހިރުނދުމާގޭ، އުމުރުން 24 އަހަރުގެ އަޙްމަދު ލުޖައިންއެވެ. ފުލުހުން މަޢުލޫމާތު ދިން ގޮތުގައި، އޭނާގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، ފަސް ދުވަހުގެ މުއްދަތަށް އޭނާ ބަންދުކުރުމަށް އަމުރުކޮށްފައިވެއެވެ.

ފުލުހުން މިހާރު މި މައްސަލަ އިތުރަށް ތަޙުޤީޤު ކުރަމުން ގެންދާ ކަމަށް ބުނެފައިވެއެވެ.