މިރޭ ލިވަޕޫލް އާއި މެންޗެސްޓަރ ޔުނައިޓެޑްގެ މެޗުގެ ތެރެއިން 10 ބަހުން ދިވެހިރާއްޖެ ޕްރޮމޯޓް ކުރަނީ!

މިއަދު، ދުނިޔޭގެ އެންމެ ބޮޑު ކުޅިވަރު މަންސަތަކުގެ ތެރެއިން އެއް މަންސާގައި، ދިވެހިރާއްޖޭ ބްރޭންޑް އެއްގެ ގޮތުގައި ދައްކާލުމަށް ވިޒިޓް މޯލްޑިވްސް ކޯޕަރޭޝަނުން ތައްޔާރުވެއްޖެއެވެ. ލިވަޕޫލް އެފް.ސީ. އާއި މެންޗެސްޓަރ ޔުނައިޓެޑް ކުޅޭ މި މެޗު، އިނގިރޭސިވިލާތުގެ އެންފީލްޑް ސްޓޭޑިއަމްގައި މިއަދު ބާއްވާނެއެވެ.

މި މެޗު ފަށާނީ އިނގިރޭސިވިލާތުގެ ގަޑިން ހަވީރު 4:30 ގައި (ބީ.އެސް.ޓީ) އެވެ. ދިވެހިރާއްޖޭގެ ގަޑިން (ޖީ.އެމް.ޓީ +5) އަކީ ރޭގަނޑު 8:30 އެވެ. ލިވަޕޫލް ފުޓްބޯޅަ ކްލަބްގެ ރަސްމީ ފަތުރުވެރިކަމުގެ މަންޒިލެއްގެ ބައިވެރިއެއްގެ ގޮތުން، ވިޒިޓް މޯލްޑިވްސްގެ ބްރޭންޑިންގް އެންފީލްޑްގެ އެލް.އީ.ޑީ. ޕެރިމީޓަރ ބޯޑުތަކާއި ޑިޖިޓަލް ސްކްރީންތަކުން ފެނިގެންދާނެއެވެ.

މި ފަހަރުގެ ޕްރޮމޯޝަންގައި، ދިވެހިރާއްޖެއަކީ ދުނިޔޭގެ މަޤްބޫލު މަންޒިލެއްކަމާއި، ބައިނަލްއަޤްވާމީ ފެންވަރުގައި މުޢާމަލާތްކުރުމުގެ ގޮތުން، 10 ބަހަކުން މޯލްޑިވްސްގެ ބްރޭންޑް ފެނިގެންދާނެއެވެ. އެ ބަސްތަކަކީ: އިނގިރޭސި، ޢަރަބި، ޖަޕާން، ޗައިނީޒް، ފަރަންސޭސި، ޖަރމަން، ރަޝިޔާ، އިޓަލީ، ކޮރެއާ، އަދި ދިވެހި ބަހެވެ. ތާރީޚީ ގޮތުން ފުރަތަމަ ފަހަރަށް "މޯލްޑިވްސް" މި ނަން ދިވެހި އަކުރުން ދުނިޔޭގެ އެންމެ ގިނަ ބަޔަކު ބަލާ ކުޅިވަރު ޕްލެޓްފޯމުތަކުގެ ތެރެއިން އެއްޕްލެޓްފޯމުން ފެނިގެންދާނެކަން ފާހަގަކޮށްލެވެއެވެ. މިއީ ޤައުމަށް ލިބޭ ވަރަށް ފަޚުރުވެރި އަދި ތާރީޚީ ވަގުތެކެވެ.

"ބެޓްލް އޮފް ދަ ރެޑްސް" މެޗު ދުނިޔޭގެ އެތައް މިލިއަން ބަޔަކު ޓީވީ އަދި ޑިޖިޓަލް ޕްލެޓްފޯމުތަކުން ބަލާނެއެވެ. މިކަމުގެ ސަބަބުން ވިޒިޓް މޯލްޑިވްސް އަށް ދިވެހިރާއްޖޭގެ ބްރޭންޑްގެ ފެނިގެންދިއުން އިތުރުކޮށް، މުސްތަޤްބަލުގައި ރާއްޖެއަށް ދަތުރުކުރުމަށް ހިތްވަރުދީ، ރާއްޖެއަކީ ދުނިޔޭގެ ފެންވަރުގެ ލަގްޒަރީ އަދި ތަޖުރިބާކާރު މަންޒިލެއްގެ ގޮތުގައި އިތުރަށް ހަރުދަނާކުރުމަށް ނުހަނު ފުޅާ ފުރުސަތެއް ލިބިގެންދާނެއެވެ.

މި ހަރަކާތުގެ ތެރެއިން، ދިވެހިރާއްޖޭގެ ތަފާތު ފަތުރުވެރިކަމުގެ ޚިދުމަތްތައް ހައިލައިޓް ކުރެވިގެންދާނެއެވެ. އޭގެ ތެރޭގައި ދުނިޔޭގެ ފެންވަރުގެ ރިސޯޓުތަކާއި، އާއިލީ ތަޖުރިބާތަކާއި، އެޑްވެންޗަރ، ވެލްނެސް، އަދި ސަޤާފީ ދަތުރުފަތުރު ހިމެނެއެވެ. މީގެ އިތުރުން، ދިވެހިރާއްޖެއިން ދެމެހެއްޓެނިވި ފަތުރުވެރިކަމަށާއި ތިމާވެށި ރައްކާތެރިކުރުމަށް ދޭ ސަމާލުކަންވެސް މި ކެމްޕޭނުން ފާހަގަކޮށް، ރާއްޖޭގެ ފަރުތައް ހިމެނޭ ތިމާވެށި ރައްކާތެރިކުރުމުގެ ދުނިޔޭގެ މާކެޓިންގް ސްޓްރެޓެޖީއާ އެއްގޮތަށް މަސައްކަތްކުރާނެއެވެ.

މިއީ ހަމައެކަނި ފުޓްބޯޅަ މެޗެއް ނޫންކަމާއި، މިއީ އެތައް މިލިއަން ބަޔަކު ހިއްސާކުރާ ސަޤާފީ ވަގުތެއް. ދިވެހިރާއްޖޭގެ ނަމާއި، އަޅުގަނޑުމެންގެ ދިވެހި އަކުރު، ދުނިޔޭގެ އެތައް ސަތޭކަ މިލިއަން ބަޔަކަށް ފެނިގެންދާނެކަން ދައްކުވައިދެނީ އަޅުގަނޑުމެންގެ ބްރޭންޑް މިހާރު އޮތް ހިސާބު. މިކަމުގެ ސަބަބުން ދުނިޔޭގެ މީޑިއާގައި ވަރަށް ބޮޑު ކުރިއެރުމެއް ލިބިގެންދާނެ. ދިވެހިރާއްޖޭގެ ރީތިކަމާއި، ކުޅިވަރަށް އޮންނަ ލޯތްބާއި، ދުނިޔޭގެ އެންމެ ވަފާތެރި ފުޓްބޯޅަ ފޭނުންނާ ގުޅުވާލަދޭނެ   

ވިޒިޓް މޯލްޑިވްސް ކޯޕަރޭޝަންގެ ސީ.އީ.އޯ. އަދި އެމް.ޑީ. އިބްރާހިމް ޝިއުރީ

މި އަހަރުގެ ކުރީކޮޅު ލިވަޕޫލް އެފް.ސީ. އާއި ދިވެހިރާއްޖެއާ ދެމެދު ވެވުން އެއްބަސްވުންތަކުގެ ސަބަބުން ދިވެހިރާއްޖެ އެލް.އީ.ޑީ. ބޯޑުތަކާއި، ޑިޖިޓަލް ކޮންޓެންޓްތަކާއި، ސޯޝަލް މީޑިއާ ހަރަކާތްތަކުގެ ތެރެއިން ވަރަށް ބޮޑު ދުނިޔޭގެ ފެންވަރުގެ އިސްތިހާރުކުރުމުގެ ފުރުޞަތު ލިބެމުންދެއެވެ. 180 އަށް ވުރެ ގިނަ ޤައުމަށް މެޗުތައް ބްރޯޑްކާސްޓް ކުރެވޭއިރު، ވިޒިޓް މޯލްޑިވްސް އިން އުއްމީދުކުރަނީ މިކަމުގެ ސަބަބުން މީޑިއާގެ ބޮޑު އަގު ލިބި، ބްރޭންޑް ހަނދާންކުރެވުން އިތުރުވެ، ދުނިޔޭގެ އެކި ކަންކޮޅުތަކުގައި ތިބި ފަތުރުވެރިންގެ ހިތްތަކުގައި ރާއްޖެއަކީ އެންމެ މަތީ ދަރަޖައިގައި އޮންނަ މަންޒިލެއްގެ ގޮތުގައި އިތުރަށް ހަރުދަނާވެގެންދާނެ ކަމަށެވެ.