ތިން މިލިއަން ސިނގިރޭޓު ސްޓިކް ކަސްޓަމްސްއިން ނައްތާލައިފި

މޯލްޑިވްސް ކަސްޓަމްސް ސާރވިސްގެ ބެލުމުގެ ދަށުގައި ހުރި ތިން މިލިއަން ސިނގިރޭޓު ސްޓިކް ނައްތާލައިފިއެވެ.

އެ އިދާރާއިން މީސްމީޑިއާގައި ޙިއްސާކުރި މަޢުލޫމާތަށް ބަލާއިރު، މި ތަކެތި ނައްތާލާފައި ވަނީ ކ. ދޫނިދޫގައެވެ. އަދި މި ތަކެތި ނައްތާލިއިރު ކަސްޓަމްސްގެ އޮފިސަރުންނާއި، ބައެއް މީޑިއާތަކުން ދޫނިދޫގައި ހާޒިރުވެ ތިއްބެވެ.

އެ އިދާރާއިން އިތުރަށް ހާމަކޮށްފައިވާ ގޮތުގައި، މިއީ ޤާނޫނާ ޚިލާފަށް ރާއްޖެ އެތެރެކުރުމަށް މަސައްކަތް ކުރަނިކޮށް ހިފަހައްޓާފައިވާ 199 ކޭސް ސިނގިރޭޓެވެ. އެގޮތުން ޖުމްލަ 3,183,040  (ތިން މިލިއަން އެއްލައްކަ އަށްޑިހަ ތިންހާސް ސާޅީސް) ސިނގިރޭޓް ސްޓިކް ވަނީ މިއަދު ނައްތާލާފައެވެ.

ކަސްޓަމްސްގެ ބެލުމުގެ ދަށުގައި ހުރި 3 މިލިއަން ސިނގިރޭޓް ސްޓިކްސް ނައްތާލައިފި.
މިތަކެތި ނައްތާލާފައިވަނީ މިއަދު މެންދުރު ކ.ދޫނިދޫގައި ކަސްޓަމްސް އޮފިސަރުންނާއި މީޑިއާގެ ހާޒިރުގައި. pic.twitter.com/SfVpjMD9Z4

— Maldives Customs Service (@CustomsMv) October 19, 2025

ސަރުކާރުން ސިނގިރޭޓްގެ ޑިއުޓީ ބޮޑުކުރުމާ ގުޅިގެން ވަގަށް ސިނގިރޭޓް ގެނައުމުގެ މައްސަލަތައް ވަނީ އިތުރުވެފައެވެ. މި އަހަރުގެ ތެރޭގައިވެސް ވަގަށް ސިނގިރޭޓް ގެނައުމާއި ރާއްޖޭގައި ސިނގިރޭޓް އުފެއްދުމާއި ގަވާއިދާ ޚިލާފަށް ސިނގިރޭޓްގެ ވިޔަފާރި ކުރުމުގެ މައްސަލަތައް ފެންމަތިވެފައި ވެއެވެ.

އެގޮތުން މިދިޔަ ހަފްތާގައި ވަނީ، ކަސްޓަމްސްއިން ހިފެހެއްޓުމަށްފަހު އެމްޕީއެލްގެ ބެލުމުގެ ދަށުގައި ބަހައްޓާފައި ހުރި ދެ ކޮންޓެއިނަރު ސިނގިރޭޓު ވެސް ގެއްލިފައެވެ. މި މައްސަލައާ ގުޅިގެން 4 މީހަކު ހައްޔަރުކޮށްފައި ވެއެވެ. އޭގެ ތެރޭގައި ކަސްޓަމްސްގެ އިސް އޮފިސަރަކާއި، ކަސްޓަމްސްގެ ސީނިއަރ މެނޭޖުމެންޓުގައި ކުރިން މަސައްކަތްކުރެއްވި ފަރާތެއް ވެސް ހިމެނެއެވެ. މި މައްސަލައިގައި ދެން ހިމެނެނީ ދެ ވިޔަފާރިވެރިންނެވެ.