ފާއިތުވި 48 ގަޑިއިރުތެރޭގައި އިޒްރާއިލުން ޣައްޒާގެ 50 ކުޑަކުއްޖަކު ޝަހީދުކޮށްލައިފައިވޭ!

ފާއިތުވި 48 ގަޑިއިރުތެރޭގައި އިޒްރާއިލުން ޣައްޒާގެ 50 ކުޑަކުއްޖަކު ޝަހީދުކޮށްލައިފައިވާ ކަމަށް އދ.އިން ބުނެފިއެވެ. 

އދ. އިން ބުނެފައިވަނީ ޣައްޒާގެ އުތުރުގައި އޮންނަ ޖަބަލިއްޔާއަށް އިޒްރާއިލުން ހުއްޓުމެއް ނެތި ދެމުންދާ ހަމަލާތަކުގައި 50 ކުދިން ޝަހީދުވެފައިވާކަމަށެވެ. 

އަލްޖަޒީރާގައި ރިޕޯޓުކޮށްފައިވާ ގޮތުން ޖަބަލިއްޔާ، ބައިތް ލާހިޔާ އަދި ދެކުނު ރަފަޙްއަށް އިޒްރާއިލުން ދީފައިވާ ވައިގެ ހަމަލާތަކުގެ ސަބަބުން 9 މީހަކު ޝަހީދުވެފައިވާ ކަމަށެވެ.

ފަލަސްޠީނުގެ ވަފާ ނިއުސް އެޖެންސީއަށް ހަވާލާދީ އަލްޖަޒީރާއިން ބުނެފައިވަނީ ޖަބަލިއްޔާގައި ހުންނަ އަލް ނަޖާރު އާއިލާގެ ގެއަށް އިޒްރާއީލުގެ ހަނގުރާމަ މަތިންދާބޯޓުތަކުން ދިން ބޮމުގެ ހަމަލާގެ ސަބަބުން އެސަރަހައްދުގެ ތިން މީހަކު ޝަހީދުވެ އިތުރު ބަޔަކު ޒަޚަމްވެފައިވާ ކަމަށެވެ. 

މީގެއިތުރުން މެޑިކަލް އޮފިޝަލުންނަށް ހަވާލާދީ  އަލްޖަޒީރާގައި ބުނެފައިވަނީ އިޒްރާއީލުން ޣައްޒާއަށް ރޭ ފަތިހުން ފެށިގެން ދެމުންދާ ހަމަލާތަކުގެ ސަބަބުން މިހާތަނަށް 23 މީހަކު ޝަހީދުވެފައިވާ ކަމަށެވެ. 

ޣައްޒާގައި އިޒްރާއީލުން 7 އޮކްޓޯބަރު 2023ން ފެށިގެން ހިންގަމުންދާ ނަސްލު ނައްތާލުމުގެ ހަމަލާތަކުގައި މިހާތަނަށް 43،314 މީހުން ޝަހީދުވެ  102،019 މީހުން ވަނީ ޒަޚަމްވެފައިވެއެވެ.