ޚަބަރު
މާވަށުގައި ތަރައްޤީކުރާ ބީއެމްއެލް ބްރާންޗުގެ ބިންގާއަޅައިފި
ބީއެމްއެލް ބްރާންޗުގެ ބިންގާއެޅުން/ފޮޓޯ: ބީއެމްއެލް
ލ. މާވަށުގައި ތަރައްޤީކުރާ ބޭންކް އޮފް މޯލްޑިވްސްގެ ބްރާންޗުގެ ބިންގާއަޅައިފި އެވެ.
މާވަށުގައި ބީއެމްއެލްގެ ބްރާންޗުގެ ބިންގާއަޅާފައި މިވަނީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހައްދުންމަތީގެ ރަށްތަކަށް ކުރައްވާ ދަތުރުފުޅުގެ ތެރެއިން މާވަށަށް ވަޑައިގެންނެވެ.
މިކަމަށްޓަކައި ބޭއްވި ޚާއްޞަ ރަސްމިއްޔާތެއްގައި، ބީއެމްއެލް ބްރާންޗުގެ ބިންގާ އަޅުއްވާދެއްވީ މާލީ ކަންކަމާއި ތަރައްޤީގެ ރޭވުންތެރިކަމާ ބެހޭ ވަޒީރު މޫސާ ޒަމީރު، ބީއެމްއެލްގެ ޗެއަރޕާސަން އަޙްމަދު ޢަލީ ޙަބީބު، ބީއެމްއެލްގެ ސީއީއޯ އަދި މެނޭޖިން ޑިރެކްޓަރ މުޙައްމަދު ޝަރީފް، އަދި މާވަށު ކައުންސިލްގެ ރައީސްއެވެ. މި ރަސްމިއްޔާތުގައި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އާއި، ދައުލަތުގެ ވަޒީރުންނާއި، ދައުލަތުގެ އެކިއެކި މުއައްސަސާތަކުގެ އިސްވެރިން ވަނީ ބައިވެރިވެވަޑައިގަންނަވާފަ އެވެ.
ރާއްޖޭގެ މީހުން ދިރިއުޅޭ ހުރިހާ ރަށަކަށް ބޭންކިންގ ގެ ޚިދުމަތް ފުޅާ ކުރެއްވުމަކީ މި ސަރުކާރުން ޚާއްޞަ އިސްކަމެއް ދެއްވާ ކަމަކަށް ވީއިރު، މިކަން ހާޞިލުކުރުމުގެ ގޮތުން ރަށްރަށުގައި އޭޓީއެމް ބެހެއްޓުމުގެ މަސައްކަތް ސަރުކާރުން އަންނަނީ ކުރަމުންނެވެ. ހަމަ އެހެންމެ، އަތޮޅުތަކުގައި ބައެއް ރަށްރަށުގައި ބީއެމްއެލްގެ ބްރާންޗު ޤާއިމް ކުރުމުގެ މަސައްކަތް ވެސް މިހާރު ކުރަމުން އަންނައިރު، މިކަމުގެ ސަބަބުން ރައްޔިތުންނަށް ލުއިފަސޭހަކަމާއެކު ބޭންކިންގ ގެ ޚިދުމަތް ލިބިގެންދާނެއެވެ.
ބޭންކް އޮފް މޯލްޑިވްސްގެ އޭޓީއެމްގެ ޚިދުމަތް ފުރަތަމަ ފަށާފައިވަނީ 2000 ވަނަ އަހަރުއެވެ. އަދި މާލެ ފިޔަވައި އަތޮޅުތަކަށް މި ޚިދުމަތް ފުޅާވާން ފަށާފައިވަނީ 2007 ވަނަ އަހަރުން ފެށިގެންނެވެ
Ads by MSS
