ބޮޑުބަންދު ޑިސެމްބަރަށް ހަދައި 2025 ވަނަ އަހަރުގެ އެކަޑަމިކް ކަލަންޑަރު ހާމަކޮށްފި!

ތަޢުލީމީ އަހަރުގެ ބޮޑުބަންދު ޑިސެމްބަރަށް ހަދައި 2025 ވަނަ އަހަރުގެ އެކަޑަމިކް ކަލަންޑަރު ތަޢުލީމީ ވުޒާރާއިން ހާމަކޮށްފިއެވެ. 

ތަޢުލީމީ ވުޒާރާއިން ނެރެފައިވާ 2025 ވަނަ އަހަރުގެ އެކަޑަމިކް ކަލަންޑަރުގައި ވާގޮތުން 2025 ވަނަ އަހަރުގެ އެކަޑަމިކް އައު އަހަރު ފެށޭނީ 6 އޭޕްރީލް 2025 ވާ އާދީއްތަ ދުވަހުއެވެ. ފުރަތަމަ ޓާމުގެ ބަންދު ފެށޭނީ 24 ޖުލައި 2025 ގައެވެ. 

އަދި އެއްހަފްތާގެ ބަންދަށް ފަހު 10 އޮގަސްޓު 2025 ވާ ދުވަހު ދެވަނަ ޓާމުގެ ކިޔެވުން ފެށޭގޮތައް ވަނީ ހަމަޖެހިފައެވެ. ދެވަނަ ޓާމު ނިމި އަހަރުގެ ބޮޑު ބަންދު ފެށޭ ތާރީޚެއްގެ ގޮތުގައި ތަޢުލީމީ ވުޒާރާއިން ބުނެފައިވަނީ 28 ޑިސެމްބަރު 2025 ވަނަ ދުވަހެެވެ. ބަންދަށްފަހު 2026ގެ އެކަޑަމިކް އައު އަހަރު ފެށުމަށް ހަމަޖެހިފައިވަނީ 27 ޖެނުއަރީ 2026 ގައެވެ. 

އެކަޑަމިކް އަހަރުގެ ބޮޑުބަންދު ޑިސެމްބަރު މަހަށް ބަދަލު ކުރުމަކީ ރައީސުލްޖުމްހޫރިއްޔާ ޑރ މުޙައްމަދު މުޢިއްޒުގެ ރިޔާސީ ވަޢުދުފުޅެކެވެ. 

ރާއްޖޭގައި ކުރިން ދިރާސީ އަހަރު ފަށަމުން އައީ ކޮންމެ އަހަރެއްގެ ޖެނުއަރީ މަހު ނަމަވެސް ކޮވިޑް-19 ގެ ބަލިމަޑުކަމުގެ ތެރޭގައި ކިޔެވުމަށް އައި ބަދަލުތަކާ ގުޅިގެން ކިޔެވުން ހަ މަސް ދުވަހަށް ދަންމާލައި، ދިރާސީ އަހަރު އޮގަސްޓް މަހު ފަށާ ގޮތަށް 2021 ވަނަ އަހަރު ބަދަލުކޮށްފައިވެއެވެ.

މިބަދަލާއި އެކު ގިނަ ބައެއްގެ ކަންބޮޑުވުންތަކާއި ފާޑުކިޔުންތައް ކުރީގެ ސަރުކާރަށް ދިޔައީ އަމާޒުވަމުންނެވެ.