އަފްޣާނިސްތާނު ސަރުކާރުގެ މަންދޫބަކާއި ޕާކިސްތާނުގައި ހުންނަވާ ދިވެހި ސަފީރު ބައްދަލުކުރެއްވީ ހުއްދަނެތި: ޚާރިޖިއްޔާ

އަފްޣާނިސްތާނުގެ ސަރުކާރުގެ މަންދޫބަކާއި، ޕާކިސްތާނަށް ދިވެހިރާއްޖެއިން ކަނޑައަޅުއްވައިފައި ހުންނަވާ ސަފީރު މުޙައްމަދު ޠާޙާ ބައްދަލުކުރެއްވެވީ ދިވެހި ސަރުކާރުގެ ހުއްދައެއް ނެތި ކަމަށް ޚާރިޖީ ވުޒާރާއިން ބުނެފިއެވެ. 

މިއަދު ޚާރިޖިއްޔާއިން ނެރެފައިވާ ސްޓޭޓްމަންޓެއްގައި ބުނެފައިވަނީ ދާދިފަހުން ޕާކިސްތާނުގައި ހުންނަ ދިވެހިރާއްޖޭގެ ސަފީރު އިސްލާމްއާބާދުގައި އަފްޣާނިސްތާނުގެ މަންދޫބާއި އެކު ބޭއްވި ބައްދަލުވުމަކީ، ދިވެހި ސަރުކާރުން ހުއްދަދީފައިވާ ބައްދަލުވުމެއް ނޫންކަމެވެ. 

އެބައްދަލުވުމާއި ގުޅިގެން ސަރުކާރުން ވާނީ ސަފީރު ޠާހާއަށް އެކަށީގެންވާ ފިޔަވަޅުތަކެއް އަޅާފައި ކަމަށެވެ. 

ޚާރިޖިއްޔާ އިން ބުނެފައިވަނީ ރާއްޖެއިން ޤައުމުތަކުގެ ސަރުކާރުތައް ބަލައިގަތުމުގައި ސުވާލު އުފެދޭ ޙާލަތެއްގައި އަބަދު ވެސް ބަލަނީ އދ. އިން ކަނޑައަޅާފައިވާ މިންގަނޑުތަކާ އުސޫލުތަކަށް ކަމަށެވެ.

 އެ އުސޫލާ އެއްގޮތަށް، އދ، ގައި އަފްޣާނިސްތާނު ތަމްސީލުކުރާ ފަރާތަކީ، އަފްޣާނިސްތާނުގެ ސަރުކާރުގެ ގޮތުގައި ދިވެހި ސަރުކާރުން ވެސް ބަލައިގަންނަ ފަރާތް ކަމަށް ބުނެފައިވެއެވެ. 

ދިވެހި ސަރުކާރުން ޕާކިސްތާނަށް ކަނޑައަޅުއްވައިފައި ހުންނަ ސަފީރު ޠާޙާ ވަނީ، އަފްޣާނިސްތާނުން ޕާކިސްތާނަށް ހަމަޖައްސާފައިވާ ސަފީރު ސަރުދާރު އަހުމަދު ޝަކީބުއާ ޕާކިސްތާނުގެ ވެރިރަށް، އިސްލާމްއާބާދުގައި މިދިޔަ ހުކުރު ދުވަހު ބައްދަލުކުރައްވައިފަ އެވެ. އެއާއެކު، ޠާލިބާން ޖަމާޢަތުން އަފްޣާނިސްތާނުގައި ހިންގާ ވެރިކަން ރާއްޖޭން ބަލައިގަތީ ތޯ ގިނަ ބަޔަކު ސުވާލު އުފައްދައިފައިވެއެވެ.