ދުނިޔެ
ޣައްޒާގެ ކަމަލް އަދްވަން ހޮސްޕިޓަލް ބަލިމީހުންގެ ޢަދަދު ގިނަ، ޚިދުމަތުގައި ދެ ޑޮކްޓަރުން!

ޣައްޒާގެ ކަމަލް އަދްވަން ހޮސްޕިޓަލުގައި ބަލިމީހުން ބިންމަތީގައި އެޑްމިޓްކުރެވިފައި.
ޣައްޒާގެ ކަމަލް އަދްވަން ހޮސްޕިޓަލުގައި ޒަޚަމްތަކަށް ފަރުވާއަށް ގެނެސްފައިވާ މީހުންގެ ޢަދަދު ގިނަ ކަމަށާއި ނަމަވެސް ޚިދުމަތް ދޭން ތިބީ އެންމއ ދެ ޑޮކްޓަރުން ކަމަށް އެހޮސްޕިޓަލުގެ ޑޮކްޓަރ ހުސާމް އަބޫ ސާފިޔާ ވިދާޅުވެއްޖެއެވެ.
އަލްޖަޒީރާ އާއި ވާހަކަ ދައްކަވަމުން ޑރ ހުސާމް ވިދާޅުވެފައިވަނީ މިވަގުތު ޣައްޒާގެ އުތުރުގައި ޚިދުމަތް ދެވޭ ޙާލަތުގައި ހުރީ އެހޮސްޕިޓަލް އެކަނި ކަމަށެވެ. އެހެންކަމުން ހަމަލާތަކުގައި ޒަޚަމްވާމީހުން އެހޮސްޕިޓަލުގައި ފުނިޖެހިފައިވާ ކަމަށެވެ.
މިހާރުގެ މިޙާލަތުގައި އަހަރެމެންނަށް ޖެހިފައިމިވަނީ ހުރިހާ ކަމެއް ކުރަން ދަސްކުރަން، އިޒްރާއީލުގެ ސިފައިން ހޮސްޕިޓަލަށް ވަދެ މުޅި މެޑިކަލް ސްޓާފުން ބަންދުކުރިއިރު، ބާކީ މިތިބީ އަހަރެންނާއި އަހަރެންގެ އެސިސްޓެންޓް ފިޒިޝަން، އަހަރެމެން ދެމީހުން މިތިބީ މިޙާލަތުގައި ތާށިވެފަ، އަހަރެމެންނަށް އޮތީ ދެގޮތެއް، އެއްގޮތަކީ ޒަޚަމްވެގެން އަންނަ މީހުންނަށް ފަރުވާ ނުދީ މަރުވާން ދޫކޮށްލުން ނުވަތަ ފުރާނަ ސަލާމަތް ކުރުމަށް ކުރެވެން އޮތް ކަމެއް ކުރުން
ޑރ ހުސާމް ވިދާޅުވެފައިވެއެވެ.
އޭނާ އިތުރަށް އަލްޖަޒީރާ އަށް ބުނެފައިވަނީ ހަމަލާއެއްގެ ސަބަބުން ނާޒުކު ފައްތަރަކަށް ވެއްޓިފައި އޮތް ކުއްޖަކު ހޮސްޕިޓަލަށް ގެނައުމުން ފަރުވާއަށް ޓަކައި އެކުއްޖާ ހޭނައްތަން ޖެހުނު ކަމަށެވެ. އެއީ ދުވަހަކުވެސް އޭނާގެ މެޑިކަލް ޙަޔާތުގައި ކޮށްފައި ނުވާ ކަމެއް ކަމަށާއި ނަމަވެސް އެކުއްޖާގެ ފުރާނަ ސަލާމަތް ކުރުމަށްޓަކައި އެނަސްތީސިއާ ދީ އެކަން ކުރި ކަމަށެވެ.

ޑރ ހުސާމް އަބޫ ސާފިޔާ ޑިރެކްޓަރ ކަމަލް އަދްވަން ހޮސްޕިޓަލް
އަދި އެކަމަކީ މެޑިކަލް ޕްރެކްޓިސްއާއި ޚިލާފު ކަމެއް ވިޔަސް އެމައުސޫމް ކުއްޖާގެ ފުރާނަ ސަލާމަތް ކުރަން އެކަން ކޮށްފައިވާ ކަމަށް ޑރ ހުސާމް ބުނެފައިވެއެވެ. އަދި މާތްالله ގެ ރަހުމަތުން އެ ކުއްޖާ ސަލާމަތްވެގެން އައިސީޔޫއަށް ބަދަލުކުރެވިފައިވާ ވާކަމަށްވެސް އޭނާ ވިދާޅުވިއެވެ.
ޑރ ހުސާމް ވަނީ ތެލާއި ސިއްޚީ ސާމާނު ޑެލިވަރީ ކުރުމުގެ ހުއްދަ ދިނުމަށާއި އަނިޔާ ލިބޭ މީހުންނަށް އެހީތެރިވުމަށް ޚާއްސަ މެޑިކަލް މުވައްޒަފުންނަށް އެސަރަހައްދަށް ވަދެވޭނެ "އަވަސް އިންސާނީ ދޮރެއް” ހޯދުމަށް ޕްރެޝަރު ކުރުމަށް ބައިނަލްއަޤްވާމީ މުޖުތަމަޢު އަށާއި ބައިނަލްއަޤްވާމީ ޞިއްޚީ އިދާރާތަކަށް އިލްތިމާސް ކުރައްވާފަ އެވެ.