ވިލިމާލޭގައި ވޯކް އެންޑް ޓޯކް ހަރަކާތެއް ކުރިއަށް ގެންގޮސްފި!

ދިވެހި ފުލުހުންގެ ޚިދުމަތުން ވިލިމާލޭގައި ވޯކް އެންޑް ޓޯކް ހަރަކާތެއް ކުރިއަށް ގެންގޮސްފިއެވެ. 

ފުލުހުންގެ ޚިދުމަތުން ބުނެފައިވަނީ މިހަރަކާތަކީ ރައްޔިތުންނާއި ގާތުން ޚިދުމަތްދިނުމަށާއި ފުލުހުންނާއި ރައްޔިތުންނާ އޮންނަ ގާތްކަން އިތުރުކޮށް ފުލުހުންނަށްކުރާ އިތުބާރު ދެމެހެއްޓުމަށް ކުރިއަށް ގެންދިޔަ ހަރަކާތެއް ކަމަށެވެ. ނޮވެމްބަރު 2 ވަނަ ދުވަހުގެ ހަވީރު ކުރިއަށް ގެންދިޔަ މި ހަރަކާތުގައި މާލެ ޕޮލިސް ކޮމާންޑުގެ އިސްވެރިންނާއި ވިލިމާލޭގައި މަސައްކަތްކުރާ ފުލުހުން ބައިވެރިވި ކަމަށް ފުލުހުންގެ މުޢަސަސާއިން ބުނެފައިވެއެވެ.

ވިލިމާލޭގައި ހިންގި ވޯކް އެންޑް ޓޯކް ހަރަކާތް. ފޮޓޯ:ފުލުހުން

މި ހަރަކާތުގެ ތެރެއިން، މިހާރު އެންމެ ގިނައިން ހިންގަމުންދާ ސްކޭމްގެ މަޢުލޫމާތު ހިއްސާކޮށް ރައްކާތެރިވާންވީ ކަންކަން ބުނެދީފައިވާ ކަމަށް ފުލުހުން ބުނެއެވެ. އަދި މީސްމީޑިއާ މެދުވެރިކޮށް ހިންގާ ސްކޭމްތަކަށް ސަމާލުވެ ރައްކާތެރިވުމަށާއި ޒާތީ މަޢުލޫމާތާއި ބޭންކު އެކައުންޓުގެ މަޢުލޫމާތު ފަދަ މުހިންމު މަޢުލޫމާތު އެހެން މީހަކާ ހިއްސާ ނުކުރުމަށް އިލްތިމާސްކޮށްފައިވާކަމަށްެވެސް ފުލުހުން ބުނެއެވެ.

މި ވޯކް އެންޑް ޓޯކްގެ ބޭނުމަކީ ވިލިމާލޭގެ ރައްޔިތުންގެ ހުރި ކަންބޮޑުވުންތައް އަޑުއަހައި ވިލިމާލޭގައި ފުލުހުންގެ ފަރާތުން ރަނގަޅުކުރަން ހުރި ކަންކަމަކީ ކޮބައިކަން ދެނެގަތުން ކަމަށް ފުލުހުންގެ ޚިދުމަތުން ބުނެއެވެ.