ރޭގެ ކޮޅިގަނޑުގައި ހުރަވީ ސްކޫލުގެ ބިއްލޫރި ދޮރެއް ވެއްޓި ތަޅައިގެން ގޮސްފި

ރޭ އައި ކޮޅިގަނޑުގައި، ހުޅުމާލޭ ފުރަތަމަ ފިޔަވަހީގައި ހުންނަ ހުރަވީ ސްކޫލުގެ ބޮޑު ދޮރެއް ވެއްޓި، ތަޅައިގެން ގޮސްފައި ވެއެވެ.

ހުރަވީ ސްކޫލުގައި ރޭ ތަޅައިގެން ދިޔަ ދޮރަކީ، އެ މަދަރުސާގެ ފަސްވަނަ ފަންގިފިލާގައި ހުންނަ، ބާރަ ބިއްލޫރިގަނޑު ހިމެނޭ ދޮރެކެވެ. މި ދޮރު ތަޅައިގެން ދިޔުމުގެ ސަބަބުން، މަދަރުސާގެ ހުރިހައި ފަންގިފިލައަކާއި، މަދަރުސާގެ ގޯތި ތެރޭގެ ބޮޑު ސަރަޙައްދެއްގައި ބިއްލޫރި ކުނޑިތައް ފެތުރިފައި ވިއެވެ.

ފުލުހުންގެ ޚިދުމަތުން ފޭސްބުކްގައި ކުރި ޕޯސްޓެއްގައި ބުނީ، ދަރިވަރުންނާއި މުދައްރިސުންގެ ރައްކާތެރިކަމަށްޓަކައި، ފުލުހުން އެ ބިއްލޫރިކޮޅުތައް ރޭގެ ވަޤުތެއްގައި ޞާފުކޮށްފައިވާ ކަމަށެވެ. 

ހެއި ނަކަތުގެ ދުވަސްތައް ހިނގަމުންދާއިރު، ރާއްޖޭގެ ބޮޑު ބަޔަކަށް ހުޅަނގު މޫސުމުގެ ވިއްސާރައާއި ގަދަ ވައިރޯޅި ފޯރާން މި ވަނީ ފަށާފައެވެ. މިއާ އެކު، މާލެ ސަރަޙައްދު ހިމެނޭހެން، މޫސުމާ ބެހޭ ޤައުމީ އިދާރާއިން ވަނީ މެދުރާއްޖެތެރޭގެ އަތޮޅުތަކަށް ހުދު ސަމާލު ނެރެފައެވެ.