ކަންނެލި މަސްވެރިކަން ކުރިއެރުވުމަށް ކަނޑައަޅާފައިވާ ބިން، ވުޒާރާއާ ޙަވާލުކޮށްފި

ރާއްޖޭގައި ކަންނެލީގެ މަސްވެރިކަން ކުރިއެރުވުމަށް ހުޅުމާލޭން ކަނޑައަޅާފައިވާ ބިން، ހައުސިންގ ޑިވެލޮޕްމަންޓް ކޯޕަރޭޝަން (އެޗް.ޑީ.ސީ.)އިން، މިނިސްޓްރީ އޮފް ފިނޭންސް އެންޑް ޕްލޭނިންގއާ ރަސްމީކޮށް ޙަވާލުކޮށްފިއެވެ.

ކަނޑައަޅާފައިވާ ބިން ވުޒާރާއާ ޙަވާލުކުރުމަށް އެޗް.ޑީ.ސީ.ގައި އަދު ބޭއްވި ރަސްމިއްޔާތުގައި އެޗް.ޑީ.ސީ.ގެ ފަރާތުން ސޮއިކުރެއްވީ، އެ ކުންފުނީގެ މެނޭޖިންގ ޑިރެކްޓަރ ޢަލީ ޒުހައިރެވެ. އަދި މާލީ ވުޒާރާގެ ފަރާތުން ސޮއިކުރެއްވީ، ސްޓޭޓް މިނިސްޓަރ ޙުސައިން ޝާމެވެ. އަދި މަސްވެރިކަމާ ބެހޭ ވުޒާރާގެ ފަރާތުން ސޮއިކުރެއްވީ ވަޒީރު އަޙުމަދު ޝިޔާމެވެ.

މި މަސައްކަތަކީ، މަސްވެރިކަމުގެ ޞިނާޢަތް ކުރިއެރުވުމުގެ މަޤުޞަދުގައި ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވެވަޑައިގެންފައިވާ ވަޢުދުފުޅުތަކުގެ ތެރޭގައި ހިމެނޭ މުހިންމު ވަޢުދުފުޅެކެވެ. އަދި ހަމަ އެހެންމެ، މިއީ ދިވެހިރާއްޖޭގެ މަސްވެރިކަމުގެ ޞިނާޢަތް ތަރައްޤީކުރުމަށް މި ސަރުކާރުން ކުރަމުންގެންދާ މަސައްކަތްތަކުގެ ތެރޭން ފާހަގަކޮށްލެވޭ މުހިންމު މަސައްކަތެކެވެ.

ކަންނެލި މަސްވެރިކަން ކުރިއެރުވުމާ ގުޅޭ ބިން މިހާރު ޙަވާލުކޮށްފައިވާއިރު، އިސްލާމިކް ޑިވެލޮޕްމަންޓް ބޭންކް (އައި.އެސް.ޑީ.ބީ.) ފަންޑުގެ ދަށުން މި ބިމުގައި ވަސީލަތްތައް ޤާއިމުކުރުމުގެ މަސައްކަތް ކުރިއަށްދާނޭ ކަމަށް މަސްވެރިކަމާ ބެހޭ ވުޒާރާއިން ހާމަކުރެއެވެ.

ރައީސުލްޖުމްހޫރިއްޔާގެ ވަޢުދުފުޅުތަކުގެ ތެރެއިން، ކަންނެލި މަސްވެރިކަމުގެ ދާއިރާ ތަރައްޤީކުރުމަށް ހުޅުމާލޭގައި ކަނޑައަޅާފައިވާ ބިން ހައުސިންގ ޑިވެލޮޕްމަންޓް ކޯޕަރޭޝަން ލިމިޓެޑް (އެޗް.ޑީ.ސީ) އިން މިނިސްޓްރީ އޮފް ފިނޭންސް އެންޑް ޕްލޭނިންއާއި ރަސްމީކޮށް މިއަދު ޙަވާލުކޮށްފިއެވެ. މި… pic.twitter.com/2pBjnxuUPu

— Ministry of Fisheries and Ocean Resources (@MFORmv) October 23, 2025