އިސްރާއީލު ކުޅުންތެރީންނަށް ވިސާ ނުދިނުމުން، އިންޑޮނޭޝިޔާގައި ބައިނަލްއަޤުވާމީ މުބާރާތްތައް ނުބޭއްވުމަށް އަމުރު!

އިންޑޮނޭޝިޔާގައި މުބާރާތްތައް ނުބޭއްވުމަށް ބައިނަލްއަޤުވާމީ ކުޅިވަރު މުއައްސަސާތަކަށް އަންގާނެ ކަމުގައި، އިންޓަރނޭޝަނަލް އޮލިމްޕިކް ކޮމިޓީ (އައި.އޯ.ސީ.)އިން ބުނެފިއެވެ.

އިންޑޮނޭޝިޔާގައި މިހާރު ކުރިއަށްދާ ވޮރލްޑް އަރޓިސްޓިކް ޖިމްނާސްޓިކްސް ޗެމްޕިއަންޝިޕްގައި އިސްރާއީލު ޓީމަށް ވިސާ ނުދިނުމަށް އިންޑޮނޭޝިޔާ ސަރުކާރުން ވަނީ ނިންމާފައެވެ. އިންޑޮނޭޝިޔާއިން ބުނީ، އިސްރާއީލުން ފަލަސްޠީނާ ދެކޮޅަށް ހިންގާ ޢުދުވާނުގެ ސަބަބުން، އިންޑޮނޭޝިޔާއަށް ވަނުމުގެ ހުއްދަ އިސްރާއީލު ކުޅުންތެރީންނަށް ނުދޭނެ ކަމުގައެވެ.

އިސްރާއީލުގެ ޖިމްނާސްޓިކްސް ފެޑެރޭޝަނުން ވަނީ އިންޑޮނޭޝިޔާގެ މި ނިންމުމަށް ފާޑުކިޔާފައެވެ. މި ކަމާ ގުޅިގެން އިންޓަރނޭޝަނަލް އޮލިމްޕިކް ކޮމިޓީ (އައި.އޯ.ސީ.)އިން މިދިޔަ ހަފްތާގައި ބޭއްވި ބައްދަލުވުމަށް ފަހު ނިންމީ، އިންޑޮނޭޝިޔާގެ އޮލިމްޕިކް ކޮމިޓީއާ ގުޅުން ކަނޑާލައި، މުސްތަޤުބަލުގައި އިންޑޮނޭޝިޔާގައި އެއްވެސް އޮލިމްޕިކް މުބާރާތެއް ނުވަތަ ކޮންފަރެންސެއް ނުބޭއްވޭ ގޮތް ހެދުމަށެވެ.

 އައި.އޯ.ސީ.އިން ބުނީ، އިސްރާއީލީން ހިމެނޭހެން، ކޮންމެ "ޤައުމެއްގެ" މީހަކަށް ވިޔަސް، ތަފާތުކުރުމެއް ނެތި އިންޑޮނޭޝިޔާގައި ބާއްވާ މުބާރާތްތަކަށް ދިޔުމުގެ ފުރުޞަތު ދިނުމުން މެނުވީ އައި.އޯ.ސީ.އިން ނިންމި ނިންމުން ބަދަލު ނުކުރާނެ ކަމަށެވެ.

މީގެ އިތުރުން، އިންޑޯނޭޝިޔާގައި މުބާރާތްތައް ނުވަތަ ބައްދަލުވުންތައް ނުބޭއްވުމަށް، އެންމެހައި ބައިނަލްއަޤުވާމީ ކުޅިވަރު މުއައްސަސާތަކަށް ވެސް އައި.އޯ.ސީ.އިން އިލްތިމާސްކުރެއެވެ.

އިންޑޮނޭޝިޔާގެ ކުޅިވަރު ވަޒީރު ވިދާޅުވީ، އެ ޤައުމުން އިސްރާއީލު ކުޅުންތެރީންނަށް ވިސާ ނުދިނުމަށް ނިންމި ނިންމުމުގެ ސަބަބުން މިފަދަ ނަތީޖާއެއް ކުރިމަތިވާނެ ކަން އިންޑޮނޭޝިޔާއަށް އެނގޭ ކަމަށެވެ. ނަމަވެސް، މި ކަމުގެ ސަބަބުން އިންޑޮނޭޝިޔާއިން ބައިނަލްއަޤުވާމީ ކުޅިވަރު މައިދާނުގައި ފަހަތަށް ނުޖެހޭނެ ކަމަށް ވަޒީރު އެރިކް ޠާރިޤު ވިދާޅުވިއެވެ.