އާސަންދައިން ނާޖާއިޒު ފައިދާ ނެގުމުގެ ބޮޑު މައްސަލައެއް

އާސަންދައިގެ ނިޒާމުގެ ތެރެއިން ނާޖާއިޒު ފައިދާ ނެގުމުގެ މައްސަލައެއް ފާހަގަވެއްޖެއެވެ. މިކަން ހާމަވެފައިވަނީ އާސަންދައިގެ ބޭހުގެ އަގު މުރާޖަޢާކުރުމުގެ މަސައްކަތުގެ ތެރެއިންނެވެ.

މި މައްސަލައިގައި ލޮލުގެ ފަރުވާގެ ޚިދުމަތްދޭ ފަރާތަކުން "ލުސެންޓިސް އިންޖެކްޝަން" ނަމަކަށް ކިޔާ ބޭހެއް 500 ޑޮލަރަށް ގަނެ، 23,000 ރުފިޔާއަށް އާސަންދައަށް ބިލްކޮށްފައިވާކަން ވަނީ ފާހަގަކުރެވިފައެވެ. މިއީ އެންމެ އިންޖެކްޝަނަކުން 14,000 ރުފިޔާގެ ފައިދާއެއް ނަގާފައިވާ ކަމެކެވެ.

އިތުރަށް ބަލާއިރު، މި ބޭސް އެތެރެކުރަން ރަޖިސްޓަރީ ކޮށްފައިވަނީ އެހެން ކުންފުންޏަކުން ކަމަށާއި، ނަމަވެސް އެ ފަރާތުން މި ބޭސް އެތެރެކޮށްފައި ނުވާކަން ވެސް ވަނީ ފާހަގަކުރެވިފައެވެ. ލޮލުގެ ފަރުވާގެ ޚިދުމަތްދޭ ފަރާތުން ބޭސް ވިއްކާފައިވަނީ ބޭސް އެތެރެކުރުމަށް ރަޖިސްޓަރީ ނުކޮށް، ޕްރިސްކްރިޕްޝަނަށް ކަމަށް ވެއެވެ.

މޯލްޑިވްސް ފުޑް އެންޑް ޑްރަގް އޮތޯރިޓީގައި ރަޖިސްޓަރީކޮށްފައިނުވާ އިންޖެކްޝަނަކަށް ބިލުކޮށްފައިވުމާއި، އަގުގެ ބޮޑު ތަފާތަކުން ބޮޑު ފައިދާއެއް ނަގަމުންދިޔަ އިރު އެކަން އާސަންދަ ކުންފުންޏަށް ނުވަތަ ނޭޝަނަލް ސޯޝަލް ޕްރޮޓެކްޝަން އެޖެންސީއަށް އަންގާފައިނުވާކަން ވެސް ވަނީ ފާހަގަކުރެވިފައެވެ.

މި މައްސަލަ ހުއްޓުވުމަށް ފިޔަވަޅު އަޅައި، އެންސްޕާގެ ވެލްފެއާ އެހީގެ ދަށުން މިހާރުވެސް ކޮންޓްރޯލްޑް އަގެއްގައި ބޭނުންވާ ފަރާތްތަކަށް މި ބޭސް ހޯދުމަށް އެހީތެރިކަން ދެވެމުންދާ ކަމަށް ހީނާ ވަލީދު ވިދާޅުވިއެވެ. އަދި މިކަން އިތުރަށް ފުރިހަމަކުރުމުގެ މަސައްކަތް ވެސް ކުރިއަށްދާ ކަމަށް ހީނާ ވިދާޅުވިއެވެ.

ރައީސުލްޖުމްހޫރިއްޔާގެ ލަފާފުޅުގެ ދަށުން، މިފަދަ މައްސަލަތައް އިސްލާހުކުރުމަށް މަސައްކަތްކުރާނެ ކަމަށް ހީނާ ވަލީދު ވިދާޅުވިއެވެ. އަދި މިފަދަ މައްސަލަތަކަކީ ޒަމާނުއްސުރެ ނިޒާމުގެ ތެރޭގައި ހުރި މައްސަލަތަކަށް ސަމާލުކަން ނުދެވި، އެއް ނިޒާމާއި އަނެއް ނިޒާމާ ދެމެދު މުޢާމަލާތް ނުކުރެވި އޮތުމުގެ ސަބަބުން ދިމާވާ ކަންކަން ކަމަށް  ފާހަގަކުރެއްވިއެވެ.