ޚަބަރު
ހުޅުމާލެއިން 228 ދަޅު ބަނގުރާ ފުލުހުންގެ ބެލުމުގެދަށަށް
ފުލުހުންގެ ބެލުމުގެދަށަށް ގެންދެވުނު ދަޅުތައް ފޮޓޯ:ޕޮލިސް މީޑިއާ
ހުޅުމާލެ ފޭސް 1 ގެ ލަކުޑި ޖެޓީ ސަރަހައްދުން 228 ދަޅު ބަނގުރާ ފުލުހުންގެ ބެލުމުގެދަށަށް ގެނެވިއްޖެއެވެ. މި ބަނގުރާ ދަޅުތައް ފެނުނީ ނޮވެމްބަރު 3 ވަނަ ދުވަހު ލިބުނު މަޢުލޫމާތަކާ ގުޅިގެން ފުލުހުން އެ ސަރަހައްދަށް ގޮސް ބެލިބެލުމުންނެވެ.
ފުލުހުންނަށް ލިބުނު މަޢުލޫމާތުގައިވާ ގޮތުން، ލަކުޑި ޖެޓީ ކައިރީގައި ހަވާލުވާނެ މީހަކު ނެތި ދަބަސްތަކެއް ބަހައްޓާފައި ހުއްޓެވެ. މި މަޢުލޫމާތާ ގުޅިގެން ފުލުހުން އެ ސަރަހައްދަށް ގޮސް އެ ދަބަސްތައް ބަލައި ފާސްކުރިއެވެ. މި ބަލައި ފާސްކުރުމުގައި 228 ދަޅު ބަނގުރާ ފެނުނެވެ.
މި މައްސަލައާ ގުޅިގެން މިހާތަނަށް އެއްވެސް މީހަކު ހައްޔަރުކޮށްފައެއް ނުވެއެވެ. ނަމަވެސް ފުލުހުން މިހާރު ދަނީ މި މައްސަލަ ތަޙްޤީޤުކުރަމުންނެވެ.
