ރާއްޖެއާއި ތުރުކީއާއި ދެމެދު ވިޔަފާރީގެ ގުޅުން ހަރުދަނާކުރުމަށް އެއްބަސްވުމެއްގައި ސޮއިކޮށްފި!

ދިވެހިރާއްޖެއާއި ތުރުކީވިލާތާއި ދެމެދު ވިޔަފާރީގެ ދާއިރާއިން ގުޅުން ބަދަހިކުރުމަށްޓަކައި، މިނިވަން ވިޔަފާރީގެ އެއްބަސްވުމެއްގައި ސޮއިކޮށްފިއެވެ.

އިޤްތިޞާދީ ތަރައްޤީއާއި ވިޔަފާރިއާ ބެހޭ ވުޒާރާއިން ބުނެފައިވަނީ މިއެއްބަސްވުމުގައި ސޮއިކޮށްފައިވަނީ މިއަދު ކަމަށެވެ. 

މިއީ 2023 ވަނަ އަހަރު ނޮވެންބަރު މަހު ރައީސުލްޖުމްހޫރިއްޔާ ޑރ މުޙައްމަދު މުޢިއްޒު، ތުރުކީވިލާތައް ކުރެއްވި ދަތުރުފުޅުގައި ތުރުކީގެ ރައީސް ރަޖަބް ޠައްޔިބް އުރްދުޣާން އާ ބައްދަލުކުރައްވައި ދެ ޤައުމުގެ ދެމެދު ގުޅުން ބަދަހި ކުރުމަށްޓަކައި މަޝްވަރާކުރެއްވި ކަންތައްތަކުގެ ތެރޭގައި ހިމެނޭކަމެއް ކަމަށް ވިޔަފާރިއާއި ބެހޭ ވުޒާރާއިން ބުނެފައިވެއެވެ. 

ދެރައީސުންގެ ބައްދަލުވުމުގައި، ދެ ޤައުމުގެ އިޤްތިޞާދީ ގުޅުން ވަރުގަދަ ކުރެއްވުމަށް ކުރެވެންހުރި ކަންކަމާ ގުޅޭގޮތުން، ފުޅާ ދާއިރާއެއްގައި މަޝްވަރާ ކުރައްވާފައިވާކަން ފާހަގަކުރަން، މިގޮތުން ކުރެވުނު މަޝްވަރާތަކުގެ ތެރޭގައި، ވިޔަފާރި، އިންވެސްޓްމަންޓް، އިއާދަކުރަނިވި ހަކަތަ އަދި މަޢުލޫމާތު އަދި މަތީ ތަޢުލީމުގެ ދާއިރާއިން ދިވެހިރާއްޖެއަށް އެއްބާރުލުން ދިނުން ހިމެނޭ

ވިޔަފާރިއާ ބެހޭ ވުޒާރާއިން ބުނެފައިވެއެވެ.

މީގެއިތުރުން އެވުޒާރާއިން ބުނެފައިވަނީ ރާއްޖެއާއި ތުރުކީވިލާތާ ދެމެދު ސޮއި ކުރެވުނު މިނިވަން ވިޔަފާރީގެ އެއްބަސްވުމުގެ ދަށުން، ތުރުކީ ވިލާތަށް އެކްސްޕޯޓުކުރާ މަހުގެ ބާވަތްތަކަށް ލުއިތައް ހޯދައިދިނުމުގެ އިތުރުން، ވިޔަފާރީގެެ ހުރަސްތައް ކުޑަކުރެވި ދެޤައުމުގެ ދެމެދުގައި ވިޔަފާރީގެ ގުޅުން ވަރުގަދަ ކުރެވިގެންދާނެ ކަމަށް ބުނެފައިވެއެވެ. 

ރާއްޖެއާއި ތުރުކީވިލާތާއި ދެމެދު ކުރެވޭ ވިޔަފާރި އިތުރުކުރުމާއި، ރާއްޖެއިން މަސް އެކްސްޕޯޓުކުރާ ފަރާތްތަކަށް ތުރުކީގެ މާކެޓުގައި ވިޔަފާރި ފުޅާކުރުމުގެ ފުރުޞަތު ފަހިކުރެވި ދިވެހިރައްޔިތުންނާއި ވިޔަފާރިވެރިތަކަށް ތުރުކީގެ އުފެއްދުންތައް އަގުހެޔޮކޮށް ލިބުމުގެ ފުރުސަތު ފަހިވެގެންދާނެ ކަމަށް ލަފާކުރެވޭ ކަމަށް ވިޔަފާރިއާ ބެހޭ ވުޒާރާއިން ބުނެފައިވެއެވެ. 

މީގެއިތުރުން ރާއްޖެއާއި ތުރުކީވިލާތާ ދެމެދު ގާތް ގުޅުމެއް ދަނީ ގާއިމް ކުރެވެމުން ކަމަށް އެވުޒާރާއިން ބުނެއެވެ. އަދި މިއަދު ސޮއިކުރެވުނު އެއްބަސްވުމުގެ ސަބަބުން މިގުޅުން އިތުރަށް ހަރުދަނާކުރެވި، ކުރިއަށްއޮތްތާގައި ވިޔަފާރި އަދި އިޤްތިޞާދީ ދާއިރާއިން މަސައްކަތްތައް އިތުރުކުރެވި، އައު ފުރުސަތުތައް ވިޔަފާރިތަކަށް ހުޅުވިގެންދާނެ ކަން ފާހަގަކުރެވޭކަމަށް ވިޔަފާރިއާ ބެހޭ ވުޒާރާއިން ބުނެއެވެ. 

މިއަދު ސޮއިކުރެވުނު އެއްބަސްވުމުގައި ދިވެހި ސަރުކާރުގެ ފަރާތުން ސޮއިކުރެއްވީ އިޤްތިޞާދީ ތަރައްޤީއާ ވިޔފާރިއާ ބެހޭ ވަޒީރު މުޙައްމަދު ސަޢީދެވެ. ތުރުކީވިލާތުގެ ފަރާތުން ސޮއިކުރެއްވެވީ އެޤައުމުގެ މިނިސްޓަރ އޮފް ޓްރޭޑް، ޕްރޮފެސަރ ޑރ އޮމަރް ބޮލަޓްއެވެ.