ﷲ ގެ ކުޅަދުންވަންތަކަމުގެ ނިޝާންތައް: ޖަނަވާރުތަކުގެ ހަށިގަނޑުގައިވާ ސިފަތަކުގެ ޙިކުމަތް

ހަމަކަށަވަރުން ﷲ ސުބުޙާނަހޫ ވަތަޢާލާ އަކީ އަލް-ޚާލިޤެވެ. ކޮންމެ މަޚްލޫޤެއްގެ ކޮންމެ ތަފްޞީލެއްގައިވެސް އަރަހުށި ހުސްތޯހިރުވަންތަ ﷲގެ ކުޅަދުންވަންތަކަން ފެންނަންހުރެއެވެ.

ބަލާށެވެ! ލެޕަރޑް، ޗީޓާ އަދި ޖަގުއާއަށް ބަލައިލާށެވެ. މިތިން ޖަނަވާރުގެ ކިބައިން ބާރާއި ވަރުގަދަކަމުގެ ސިފަތައް ހިއްސާ ކުރިނަމަވެސް، ކޮންމެ އެއްޗެއްގެ ހަށިގަނޑުގައިވެސް އެޔަށް ޚާއްޞަ ސިފައެއް ވަނީ ކުރެހިފައެވެ. ޗީޓާގެ ހަށިގަނޑުގައި ހުންނަ  ކުދިކުދި ތިއްކާއި، ލެޕަރޑްގެ މަޑު ރީތި ރޮޒެޓް ޕްެރިންޓް ސިފަތަކާއި، ޖަގުއާރްގެ ހިތްގައިމު ބޮޑެތި ވަށްބޮޅު ކަހަލަ ގޮތަކަށް އުފެދިފައިވާ ސިފަތަކެވެ. އެއީ ﷲ ގެ ކުޅަދުންވަންތަކަމުގެ ނިޝާންތަކެކެވެ. އެއީ ވިސްނާ ފިކުރުކުރާ ބަޔަކަށް ހުރި ޢިބްރަތްތަކެކެވެ.

މި ކޮންމެ ސިފައެއްގެވެސް މަޤްޞަދެއް ވެއެވެ. އެއީ އެ ސިފަތަކުގެ ވެރި ޖަނަވާރަށް ދިރިއުޅޭ މާޙައުލުން ރައްކާތެރިކަން ލިބި، އެ މާޙައުލާ ގުޅިގެން ދިރިއުޅުމަށް އެހީތެރިވެދޭ ކަމެކެވެ. މި ސިފަތަކުން އަޅުގަނޑުމެންނަށް ފެންނަނީ ﷲ ގެ ކުޅަދުންވަންތަކަމުގެ ރީތިކަމާއި ހިކުމަތް އެއްކޮށްލައްވާފައިވާ މަންޒަރެވެ. ޗީޓާގެ ހަށިގަނޑުގައި ހުންނަ ސިފަތައް އެ ޖަނަވާރު ދިރިއުޅޭ ރަން ކުލައިގެ ވިނަ އަދި އަލި އެކުލެވޭ ސަވާނާފަދަ ތަންތަނަށް ގުޅޭ ގޮތަށް ހުންނައިރު، ލެޕަރޑްގެ ސިފަތަކުން ޖަންގަލީގެ ހިޔަނީގެ ސިފަ ޖެހިފައި ހުންނަ މާޙައުލަށް ގުޅޭ ގޮތަށް ހުރެއެވެ. އަދި ޖަގުއާރްގެ ރޮޒެޓް ޕެޓަރން  އެ ޖަނަވާރު ދިރިއުޅޭ ކަޅުކުލަގަދަ ގިނަ ގަސްގަހާގެހި ހުންނަ ޖަންގަލީގެ ތެރެއަށް ގުޅޭ ގޮތަށް ހުރެއެވެ. ސުބުޙާނަﷲ! ކޮންމެ ތިއްކަކީވެސް، ކޮންމެ ސިފައަކީވެސް ދިރިއުޅުމުގެ ހަމަޖެހުމާއި ފުރިހަމަކަން ހަނދާންކޮށްދޭ އެއްޗެކެވެ.

ސައިންސުގެ ނަޒަރަކުން ބަލާއިރު، މި ސިފަތައް އުފެދެނީ "ރިއެކްޝަން-ޑިފިއުޝަން" ގެ ނަމުން ނަންދެވިފައިވާ ކަމަކުންނެވެ. މިއީ ފުރަތަމަ ފަހަރަށް މެތަމެޓިކްސް ޢިލްމުވެރިޔާ އެލަން ޓިއުރިން ސިފަކުރައްވާފައިވާ ކަމެކެވެ. އެއިން ބަޔާންކޮށްދެނީ ދިރޭތަކެތީގެ އެތެރޭގައި ހުންނަ ކުދިކުދި ކެމިކަލްތަކުގެ މަސައްކަތުން ޒީބްރާގެ ރޮނގުތަކުން ފެށިގެން ލެޕަރޑްގެ ތިއްކާ ހަމައަށް ތަފާތު ސިފަތައް އުފައްދާ ގޮތެވެ. ކޮންމެ ދިރޭ އެއްޗެއްގައިވެސް އޭގެ އަމިއްލަ ޖެނެޓިކް "ބްލޫޕްރިންޓެއް" ހުރެއެވެ. އެ ބްލޫޕްރިންޓްގެ ސަބަބުން ހަމުގެ ކުލަ އުފެދި، ފެތުރިގެން ދާނެ ގޮތް ކަނޑައަޅައި، އެ ރީތި ސިފަތައް އުފެދެއެވެ. އެއީ ބަޔޮލޮޖީގެ ޤާނޫނުތައްވެސް ﷲ ގެ ކުޅަދުންވަންތަ އަމުރުފުޅަށް ކިޔަމަންވާކަމުގެ ހަނދާންކޮށްދޭ ކަމެކެވެ.

﴿82﴾ إِنَّمَا أَمْرُهُ إِذَا أَرَادَ شَيْئًا أَن يَقُولَ لَهُ كُن فَيَكُونُ
އެކަލާނގެ ކަމަކަށް އިރާދަކުރައްވައިފިނަމަ، އެކަލާނގެ އަމުރުފުޅުވާކަން ކަށަވަރީ އެކަމަކަށް، "ވާށޭ" ވަޙީ ކުރެއްވުމެވެ. ދެން އެކަމެއް ވެދެތެވެ.

ސޫރަތުލް ޔާސީން

މިފަދަ ހައިރާންކުރުވަނިވި ކަންތައްތަކަކީ ޤުރުއާނުގެ މި އާޔަތުގެ މައްޗަށް މުއުމިނުން ވިސްނައި ފިކުރުކުރުމަށް ދަޢުވަތުދޭ ކަންތައްތަކެކެވެ:

﴿7﴾ الَّذِي أَحْسَنَ كُلَّ شَيْءٍ خَلَقَهُ ۖ وَبَدَأَ خَلْقَ الْإِنسَانِ مِن طِينٍ
އެކަލާނގެއީ، ހުރިހާ އެއްޗެއް ފުރިހަމަ ސިފައިގައި ހެއްދެވި ރަސްކަލާނގެއެވެ. އަދި އެކަލާނގެ އިންސާނާ ހެއްދެވުން ފެއްޓެވީ މަށިންނެވެ.

ސޫރަތުލް އައްސަޖްދާ 

ހަމަކަށަވަރުން، މި  މަޚްލޫޤާތްތަކުގެ ހަށިގަނޑުގައި ހުންނަ ސިފަތަކަކީ ﷲ ގެ ކުޅަދުންވަންތަކަމާއި މަތިވެރިކަމުގެ ހެއްކެކެވެ. އެއީ މާނައާއި އެކު އުފައްދަވާފައިވާ ރީތިކަމެކެވެ. އަދި ވަރުގަދަކަމުގެ ތެރޭގައިވާ ހިތްގައިމުކަމެކެވެ. އަދި ދިރިއުޅުމުގެ ކޮންމެ ކަމެއްގައިވެސް ލިޔެވިފައިވާ ހަމަޖެހުމެކެވެ.