ފޮނަދޫ، ނިލަންދޫ އަދި ފުވައްމުލަކުގެ ހޮސްޕިޓަލް މަޝްރޫޢުއަށް ކޮންސަލްޓަންޓެއް ހޯދަނީ

ފުވައްމުލަކާއި، ލ.ފޮނަދޫ އަދި ފ.ނިލަންދޫގައި ހުންނަ ހޮސްޕިޓަލްތަކުގެ އައު އިމާރާތްތައް ތަރައްޤީކުރުމަށް، އެ މަސައްކަތް ޑިޒައިންކޮށްދޭނެ ކޮންސަލްޓަންޓެއް ހޯދުމަށް މާލީ ކަންކަމާ ތަރައްޤީގެ ރޭވުންތެރިކަމާ ބެހޭ ވުޒާރާއިން އިޢުލާނުކޮށްފިއެވެ. 

މި މަޝްރޫޢުތައް ކުރިއަށްގެންދިއުމަށް ހަމަޖެހިފައިވަނީ ދިވެހި ސަރުކާރުން ސައުދީ ފަންޑް ފޯ ޑިވެލޮޕްމަންޓް (އެސްއެފްޑީ) ގެ އެހީގައި ހިންގަމުންދާ "ހެލްތް ސެކްޓަރ ޑިވެލޮޕްމަންޓް ޕްރޮޖެކްޓް"ގެ ދަށުންނެވެ.

މި ޕްރޮޖެކްޓްގެ ދަށުން ތަރައްޤީކުރަނީ ޏ.އަތޮޅު ހޮސްޕިޓަލް (ފުވައްމުލައް)، ގަމު ރީޖަނަލް ހޮސްޕިޓަލް (ފޮނަދޫ/ގަން) އަދި ނިލަންދޫގައި ހުންނަ އަތޮޅު ހޮސްޕިޓަލެވެ. މި މަސައްކަތަށް ހޯދާ ކޮންސަލްޓަންޓުންގެ ޒިންމާތަކުގެ ތެރޭގައި ސަރވޭ ހެދުމާއި، ފުރަތަމަ މަރުޙަލާގެ ކުރެހުންތައް ތައްޔާރުކުރުމާއި، ބީލަމަށް ހުޅުވާލުމުގެ ލިޔެކިޔުންތައް ތައްޔާރުކުރުން ހިމެނެއެވެ. މީގެ އިތުރުން ތިމާވެއްޓަށް ގެއްލުންވާ މިންވަރު ބަލާ ރިޕޯޓް (އީއައިއޭ) ތައްޔާރުކުރުމާއި، ޑީޓެއިލް ޑިޒައިން ރިވިއުކުރުމުގެ މަސައްކަތްތައް ވެސް ކޮންސަލްޓަންޓުން ކުރިއަށްގެންދާނެއެވެ.

މި މަސައްކަތަށް ކޮންސަލްޓަންޓެއް ހޮވާނީ ސައުދީ ފަންޑްގެ ގައިޑްލައިންތަކާ އެއްގޮތަށެވެ. މި މަސައްކަތަށް ޝައުޤުވެރިވާ ފަރާތްތަކުން އެކަމަށް އެދި ހުށަހެޅުމުގެ ފުރުޞަތު ވަނީ ހުޅުވާލާފައެވެ. ޝަޢުގުވެރިކަން ފާޅުކުރުމުގެ އެންމެ ފަހު ތާރީޚަކީ ޑިސެމްބަރު 4 ވަނަ ދުވަހުގެ 14:00 އެވެ.

މި މަޝްރޫޢުތައް ކުރިއަށްގެންދަނީ ސަރުކާރުން ސިއްޙީ ދާއިރާގެ ޚިދުމަތްތައް ރާއްޖޭގެ އެކި ކަންކޮޅުތަކަށް ފުޅާކުރުމަށް އިސްކަންދެމުންދާ ދަނޑިވަޅެއްގައެވެ. 

އޮކްޓޯބަރު މަހު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހައްދުންމައްޗަށް ކުރެއްވި ދަތުރުފުޅުގެ ތެރެއިން ވަނީ ގަމު ރީޖަނަލް ހޮސްޕިޓަލް ޓަރޝަރީ ފެންވަރަށް ތަރައްޤީކުރުމުގެ މަސައްކަތް އެމްޓީސީސީއާ ހަވާލުކުރައްވާފައެވެ. އަދި ސެޕްޓެމްބަރު މަހު ފ.ނިލަންދޫއަށް ކުރެއްވި ދަތުރުފުޅުގައި އެމަނިކުފާނު ވަނީ އެރަށުގައި 50 އެނދުގެ ފުލްފްލެޖް ހޮސްޕިޓަލެއް ސައުދީ ފަންޑްގެ އެހީގައި ތަރައްޤީކޮށްދެއްވާނެކަމަށް ވިދާޅުވެފައެވެ. ނިލަންދޫއަކީ ސަރުކާރުން އަރބަން ސެންޓަރެއްގެ ގޮތުގައި ތަރައްޤީކުރާ ރަށެކެވެ.

އަންނަ އަހަރަށް ލަފާކުރާ ދައުލަތުގެ ބަޖެޓުގައި އެއް ދާއިރާއަކުން އެންމެ ބޮޑު ޚަރަދެއް ކުރުމަށް ސަރުކާރުން ހިމަނާފައިވަނީ ސިއްޙީ ދާއިރާއިންނެވެ. އެގޮތުން ސިއްޙީ ދާއިރާއަށް ޖުމްލަ 8.8 ބިލިޔަން ރުފިޔާ ކަނޑައަޅާފައިވާއިރު، ހޮސްޕިޓަލާއި ސިއްޙީ ދާއިރާގެ ޢުމްރާނީ ވަސީލަތްތައް ތަރައްޤީކުރުމަށް 430.4 މިލިޔަން ރުފިޔާ ވަނީ ބަޖެޓުގައި ހިމަނާފައެވެ. މި މަޝްރޫޢުތައް ކުރިއަށްދާނީ މި ބޮޑު ބަޖެޓުގެ ދަށުން ސިއްޙީ ޚިދުމަތްތައް ރަނގަޅުކުރުމަށް ސަރުކާރުން ދޭ އިސްކަން ހާމަވާ ގޮތަށެވެ.