ރައީސުލްޖުމްހޫރިއްޔާގެ ނައިބު ކުޅުދުއްފުށި ސިޓީއަށް ރަސްމީ ދަތުރުފުޅެއްގައި ފުރާވަޑައިގެންފި

ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް، ކުޅުދުއްފުށި ސިޓީއަށް ކުރައްވާ ރަސްމީ ދަތުރުފުޅެއްގައި މިއަދު ހެނދުނު ފުރާވަޑައިގެންފިއެވެ. މި ދަތުރުފުޅުގައި އެމަނިކުފާނުގެ އަރިހުގައި ސަރުކާރުގެ މަތީ ފަންތީގެ ވަފުދެއް ބައިވެރިވެވަޑައިގަންނަވައެވެ.

ރައީސް އޮފީހުން މަޢުލޫމާތު ދެއްވިގޮތުގައި، މި ދަތުރުފުޅުގެ މައިގަނޑު އެއް މަޤްޞަދަކީ "ހަށިހެޔޮ ރާއްޖެ" ޕްރޮގްރާމް އިފްތިތާޙުކޮށްދެއްވުމެވެ. މި ޕްރޮގްރާމަކީ ޤައުމީ ފެންވަރުގައި ކުރިއަށްގެންދާ މުހިންމު މަޝްރޫޢެއްކަން ފާހަގަކުރެވެއެވެ.

"ހަށިހެޔޮ ރާއްޖެ" ޕްރޮގްރާމުގެ ދަށުން ލީޑަރުން ތަމްރީނުކުރުމަށްޓަކައި، ރާއްޖެ ހަ ޒޯނަކަށް ބަހާލައިގެން "ލީޑިން ލީޑަރސް" ގެ ނަމުގައި މިނިސްޓްރީ އޮފް ސްޕޯޓްސް، ފިޓްނަސް އެންޑް ރެކްރިއޭޝަނުން ޕްރޮގްރާމެއް ވަނީ މިހިނގާ ނޮވެންބަރު މަހުގެ 4 ވަނަ ދުވަހު ފަށްޓަވާފައެވެ.

މި ޕްރޮގްރާމަކީ ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުގެ ސަރުކާރުން ޤައުމުގެ ކުރިމަގު އުޖާލާކުރުމަށް ގެންގުޅުއްވާ ހަރުދަނާ ސިޔާސަތުގެ ބައެއްކަން ފާހަގަކުރެވެއެވެ. އަދި މިއީ ސަރުކާރުގެ 14 ހަފުތާގެ ވަޢުދުތަކުގައި ހިމެނޭ، މޮޅެތި އެތުލީޓުން އުފެއްދުމާބެހޭ ދިގު ރާސްތާގެ ޕްރޮގްރާމެއް ފަރުމާކުރުމުގެ ސިޔާސަތުގެ ތެރެއިން ކުރިއަށްގެންދާ ހަރަކާތެއްކަންވެސް ފާހަގަކުރެވެއެވެ.