މާލެ އާއި ވިލިމާލޭގެ މަގު ހެދުމުގެ ސާވޭއަށް ޗައިނާގެ ޓީމެއް ރާއްޖެއަށް

މާލެ އާއި ވިލިމާލޭގެ މަގުތައް ހެދުމަށް ޑިޒައިން ތައްޔާރުކުރުމުގެ ކުރިން ހަދަން ޖެހޭ ސާވޭގެ މަސައްކަތަށް ޗައިނާގެ ޓީމެއް ރާއްޖެ އަތުވެއްޖެ އެވެ. މި މަޝްރޫއު ކުރިއަށް ގެންދަނީ ރައީސް ޑރ. މުހައްމަދު މުޢިއްޒު ޗައިނާއަށް ކުރެއްވި ދަތުރުފުޅުގައި ކުރެއްވި މަޝްވަރާތަކުގެ އަލީގައި، ޗައިނާއިން ފޯރުކޮށްދޭ 130 މިލިއަން ޑޮލަރުގެ ހިލޭ އެހީގެ ދަށުންނެވެ.

ކޮންސްޓްރަކްޝަން އެންޑް އިންފްރާސްޓްރަކްޗާ މިނިސްޓްރީން މައުލޫމާތު ދެއްވި ގޮތުގައި، މާލެ އާއި ވިލިމާލޭގެ މަގުތަކުގެ ފީސިބިލިޓީ ސްޓަޑީ ހެދުމަށް ޗައިނާގެ ތަޖުރިބާކާރުންގެ ޓީމު ރާއްޖެ އައީ މިދިޔަ އާދިއްތަ ދުވަހުއެވެ. އަދި އިއްޔެ އެ މިނިސްޓްރީގެ ޓެކްނިކަލް ޓީމަކުން ވަނީ އެ ބޭފުޅުންނާ ބައްދަލުކޮށް މަޝްވަރާކޮށްފައެވެ.

މިނިސްޓްރީން އިތުރަށް ހާމަކުރެއްވި ގޮތުގައި، މަގުތައް ހެދުމުގެ މަސައްކަތަށް ސައިޓް ސާވޭ އާއި މައުލޫމާތު އެއްކުރުން ކުރިއަށް ދާނީ މިއަދުން ފެށިގެން މިމަހުގެ 21 ގެ ނިޔަލަށެވެ. މި ސާވޭގެ މައްޗަށް ބިނާކޮށް މަގުތަކާ ގުޅޭ ޑިޒައިން ތައްޔާރުކުރެވޭނެއެވެ.

މާލޭގައި ގާ އަޅައިގެން ހަދާފައިވާ ގިނަ މަގުތައް މިހާރު ވަނީ ވަރަށް ބޮޑަށް ހަލާކުވެފައެވެ. މަގުތަކުގައި އަޑިގުޑަންތައް ގިނަވެ، ވާރޭވެހޭ ދުވަސްވަރު މަގުތަކުގައި ފެންބޮޑުވެ، ދަތުރުކުރުމަށް ދަތިތަކާ ކުރިމަތިވެފައިވެއެވެ. މި މައްސަލަ ހައްލުކުރުމަށްޓަކައި ސަރުކާރުން ވަނީ ބައެއް މަގުތައް ވަގުތީ ގޮތުން ހަދަން ފަށާފައެވެ.

ރައީސް ޑރ. މުހައްމަދު މުއިއްޒު ވިދާޅުވެފައިވާ ގޮތުގައި، މި މަޝްރޫއުގެ ސަބަބުން މާލޭގެ ރައްޔިތުންނަށް ބޮޑެތި ފަސޭހަތަކެއް ލިބި، ފެންބޮޑުވުމުގެ މައްސަލައަށް ދާއިމީ ހައްލެއް ލިބިގެންދާނެއެވެ. މީގެ އިތުރުން، މި މަޝްރޫއުގެ ދަށުން ސްޓޯމްވޯޓާ މެނޭޖްމަންޓް ސިސްޓަމެއް ވެސް ގާއިމުކުރެވޭނެއެވެ.

ކޮންސްޓްރަކްޝަން މިނިސްޓްރީން ފާހަގަކުރައްވާ ގޮތުގައި، މި މަޝްރޫއުގެ އެންމެ މުހިންމު އެއް ބޭނުމަކީ މާލޭގެ ހުރިހާ މަގެއް ރަނގަޅު ފެންވަރަށް ހަދައި، ފެންބޮޑުވުމުގެ މައްސަލައަށް ދާއިމީ ހައްލެއް ހޯދުމެވެ. މިކަމުގެ ސަބަބުން މާލޭގެ ރައްޔިތުންނަށް ލިބޭނެ ފަސޭހަތަކަށް ގިނަ ފަރާތްތަކުން ވަނީ އުންމީދު ކުރަން ފަށާފައެވެ.