ނައިޖީރިއާ ދެކޮޅަށް އަސްކަރީ އޮޕަރޭޝަނަކަށް ޓްރަންޕް އިންޒާރު ދީފި

އެމެރިކާގެ ރައީސް ޑޮނަލްޑް ޓްރަންޕް، ނައިޖީރިއާގައި ކްރިސްޓިއަނުން މަރާލުމަށް އެ ގައުމުގެ ސަރުކާރުން ހުއްދަ ދެމުންދާ ކަމަށް ތުހުމަތުކުރައްވައި، އެމެރިކާއިން ނައިޖީރިއާގައި އަސްކަރީ އަމަލެއް ހިންގުމުގެ އިންޒާރު ދެއްވައިފިއެވެ. މިކަމަށް ތައްޔާރުވުމަށް އެމެރިކާގެ ދިފާއީ ވުޒާރާއަށް އަންގަވާފައިވާ ކަމަށް ވެސް ޓްރަންޕް ވިދާޅުވިއެވެ.

ޓްރަންޕް މި އިންޒާރު ދެއްވާފައިވަނީ އޭނާގެ ސޯޝަލް މީޑިއާ ޕްލެޓްފޯމެއްގައި ކުރެއްވި ޕޯސްޓެއްގައެވެ. އޭނާ ވިދާޅުވީ، އެމެރިކާއިން  "އިސްލާމިކް ޓެރަރިސްޓުން" ނައްތާލާނެ ކަމަށްވަނީ ވިދާޅުވެފައެވެ. މީގެ އިތުރުން ނައިޖީރިއާއަށް ދެމުންދާ އެމެރިކާގެ ހުރިހާ އެހީތެރިކަމާއި އެހީތައް ވަގުތުން ހުއްޓާލާނެ ކަމަށް ވެސް ޓްރަންޕް ވިދާޅުވިއެވެ. ނަމަވެސް ކްރިސްޓިއަނުންނަށް ކުރަމުންދާ އަނިޔާތަކާ ބެހޭގޮތުން އޭނާ ކުރެއްވި ދައުވާތަކަށް އެއްވެސް ހެއްކެއް ހުށަހަޅުއްވާފައެއް ނުވެއެވެ.

މި އިންޒާރު އައިސްފައިވަނީ، ދީނީ މިނިވަންކަން ނަގާލާ ކަމަށް ބުނެ، އެމެރިކާ ސަރުކާރުން ނައިޖީރިއާ އަލުން އެފަދަ ގައުމުތަކުގެ ލިސްޓަށް އިތުރުކޮށްފައިވަނިކޮށެވެ. މި ލިސްޓުގައި ހިމެނޭ އެހެން ގައުމުތަކުގެ ތެރޭގައި ޗައިނާ، ރަޝިއާ، މިޔަންމާ، އުތުރު ކޮރެއާ އަދި ޕާކިސްތާން ހިމެނެއެވެ.

ޓްރަންޕްގެ ތުހުމަތުތައް ނައިޖީރިއާގެ ރައީސް ބޯލާ އަހުމަދު ޓިނޫބޫ ވަނީ ދޮގުކުރައްވާފައެވެ. އޭނާ ވިދާޅުވީ ނައިޖީރިއާއިން ހުރިހާ ދީންތަކަށް ނިސްބަތްވާ ފަރާތްތަކުގެ ހައްގުތައް ރައްކާތެރިކުރާ ކަމަށާއި، އޭނާގެ ސަރުކާރުން ދީނީ މިނިވަންކަމަށް ވަރަށް ބޮޑަށް އިސްކަންދޭ ކަމަށެވެ. ނައިޖީރިއާގެ ފޮރިން މިނިސްޓްރީން ވެސް ވަނީ ދީނަށް ބެލުމެއް ނެތި ހުރިހާ ރައްޔިތުންނަށް ދިފާއު ކުރަމުން ގެންދާނެ ކަމަށާއި، އަނިޔާވެރި ހައްދުފަހަނަޅާ ދިއުމާ ދެކޮޅަށް މަސައްކަތް ކުރަމުންދާނެ ކަމަށް ބުނެފައެވެ.

ޓްރަންޕްގެ މި ބަޔާނާ ގުޅިގެންނާއި، އަސްކަރީ އެއްވެސް އަމަލެއް ހިންގުމަށް ރާވާފައިވާ ކަމާ ބެހޭގޮތުން ވައިޓް ހައުސްއާއި އެމެރިކާގެ ދިފާއީ ވުޒާރާއިން އަދި މިހާތަނަށް އެއްވެސް ކޮމެންޓެއް ކޮށްފައެއް ނުވެއެވެ. ޓްރަންޕް އެމެރިކާގެ ރައީސްކަން ކުރެއްވި ފުރަތަމަ ދައުރުގައި ވެސް ނައިޖީރިއާ ވަނީ "ކަންބޮޑުވާ ގައުމުތަކުގެ" ލިސްޓުގައި ހިމަނާފައެވެ. ނަމަވެސް ލިސްޓުން އެ ގައުމު އުނިކުރެއްވީ ކުރީގެ ރައީސް ޖޯ ބައިޑަން 2021 ވަނަ އަހަރުއެވެ.

އެފްރިކާގެ އެންމެ އާބާދީ ބޮޑު ގައުމު ކަމަށްވާ ނައިޖީރިއާއަކީ ދީނީ ގޮތުންނާއި ނަސްލީ ގޮތުން ގިނަ ބައިތަކެއް ދިރިއުޅޭ ދިގު ތާރީހެއް އޮތް ގައުމެކެވެ. އެ ގައުމުގައި އަނިޔާވެރި ކުރިމަތިލުންތައް ހިނގާފައިވީ ނަމަވެސް، އިންސާނީ ހައްގުތަކާ ބެހޭ ރިޕޯޓުތައް ބުނާ ގޮތުގައި، ހަނގުރާމަވެރި ޖަމާއަތް ބޮކޯ ހަރާމްގެ ޝިކާރައަކަށް ގިނައިން ވެފައިވަނީ މުސްލިމުންނެވެ.