ގެދޮރުވެރިޔާ ސްކީމަށް އަލުން ފޯމު ހުށަހެޅުމަށް ބުނެ ސްކޭމެއް ދައުރުވަމުންދާ ކަމަށް ފުލުހުން އިންޒާރުދީފި

ގެދޮރުވެރިޔާ ސްކީމަށް އަލުން ފޯމު ހުށަހެޅުމަށް ކަމަށް ބުނެ ސްކޭމެއް ދައުރުވަމުންދާކަމަށް ފުލުހުން މިއަދު އިންޒާރުދީފިއެވެ. މި ސްކޭމަކީ ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ)ގެ ނަމުގައި ދައުރުވަމުންދާ ސްކޭމެއް ކަމަށް ފުލުހުން ބުނެފައިވެއެވެ.

ފުލުހުން މިއަދު ނެރުނު ސަމާލުކަމުގެ އިއުލާނެއްގައި ބުނެފައިވަނީ މި ސްކޭމް މެސެޖުތައް ފޮނުވަމުންދަނީ ވައިބަރ މެދުވެރިކޮށް ކަމަށެވެ. އަދި މި މެސެޖުތަކުގައި ހިމަނާފައިވާ ލިންކުތަކަށް ނުފިތުމަށް ފުލުހުން އާންމުންނަށް އިރުޝާދު ދީފައިވެއެވެ.

ފުލުހުން އާންމުކޮށްފައިވާ ފޮޓޯއެއްގައި ފެންނަ މެސެޖަކުން، އެޗްޑީސީގެ ނަމުގައި ދައުރުކުރަމުންދާ މި ސްކޭމް މެސެޖުތަކުގެ ސިފަ ދައްކުވައިދެއެވެ.

ފުލުހުން އިތުރަށް ބުނެފައިވަނީ މިފަދަ މެސެޖުތަކުގައި ހިމަނާފައިވާ ލިންކުތަކަށް ފިއްތައިލުމުން، ފުރިހަމަ ކުރަން އަންނަ މައުލޫމާތުތައް ފުރިހަމަ ކޮށްފިނަމަ ބޭންކް އެކައުންޓް ނުވަތަ މީސް މީޑިއާ އެކައުންޓްތަކުގެ ކޮންޓްރޯލް ސްކޭމް ކުރާ މީހުންނަށް ލިބޭނެ ކަމަށެވެ. މިގޮތުން ހޯދާ މައުލޫމާތު ބޭނުންކޮށްގެން، އެކައުންޓުގައި ހުންނަ ފައިސާ އެހެން އެކައުންޓްތަކަށް ޓްރާންސްފަރކޮށް، އަދި ވިކްޓިމްގެ ނަމުގައި އެހެން މީހުންނާ މުއާމަލާތްކޮށްގެން އިތުރު ފައިސާ ހޯދުމުގެ ފުރުސަތު ސްކޭމަރުންނަށް ލިބިގެންދާނެއެވެ.

މި ސްކޭމާ ގުޅިގެން ފުލުހުން ވަނީ އާންމުންނަށް ސަމާލުވުމަށް ގޮވާލާފައެވެ. އަދި މިފަދަ ޝައްކުވާ މެސެޖެއް ލިބިއްޖެނަމަ، އެ މެސެޖުގައިވާ ލިންކަށް ނުފިތުމަށާއި، އަމިއްލަ މައުލޫމާތު ހިއްސާނުކުރުމަށް އިރުޝާދު ދީފައިވެއެވެ. އަދި މިފަދަ ކަމެއް ދިމާވެއްޖެނަމަ ލަސްނުކޮށް ފުލުހުންނަށް އެންގުމަށްވެސް އެދިފައިވެއެވެ.