ފަލަސްތީނުގެ ގައިދީއަކަށް އަނިޔާކުރާ ވީޑިއޯއެއް ލީކުކުރުމާ ގުޅިގެން އިސްރާއިލްގެ ކުރީގެ އަސްކަރީ ވަކީލަކު ހައްޔަރުކޮށްފި

ފަލަސްތީނުގެ ގައިދީއަކަށް އިސްރާއިލް ސިފައިން އަނިޔާކުރާ މަންޒަރު ފެންނަ ވީޑިއޯއެއް ލީކުކުރުމާ ގުޅިގެން އިސްރާއިލްގެ ކުރީގެ އަސްކަރީ ޕްރޮސެކިއުޓަރެއް ފުލުހުންގެ ބެލުމުގެ ދަށަށް ގެނެސްފިއެވެ.

 ވީޑިއޯ ލީކުކޮށްލައި އިސްތިއުފާ ދިނުމަށްފަހު އޭނާ ގިނަ ވަގުތު ތަކަކަށް ގެއްލުނެވެ. މިކަމާހެދި މިމައްސަލަ ވަނީ އިތުރަށް ގޯސްވެފައެވެ. 

އިސްރާއިލްގެ ޤައުމީ ސަލާމަތީ ވަޒީރު ބުނެފައިވާ ގޮތުގައި މޭޖަރ ޖެނެރަލް ޔިފާތް ޓޯމަރ-ޔެރޫޝަލްމީ ހައްޔަރުކޮށްފައި ވަނީ ހޯމަ ދުވަހުގެ ރޭގައެވެ. މި ވީޑިއޯ ލީކުވުމަކީ އިޒްރޭލު އުފެދުނު ފަހުން އެންމެ ބޮޑު “އާންމު ގުޅުންތަކުގެ ހަމަލާ” ކަމަށް އިސްރާއިލްގެ ބޮޑުވަޒީރު ބެންޖަމިން ނަތަންޔާހޫ ވަނީ ސިފަކޮށްފައެވެ.

ޓޯމަރ-ޔެރޫޝަލްމީ އިސްތިއުފާ ދިންކަން އިއުލާނުކުމަށް ފަހު އާދިއްތަ ދުވަހު ގަޑިއިރުތަކެއް ވަންދެން ގެއްލިފައިވުމުން، އޭނާ އަމިއްލައަށް މަރުވާން މަސައްކަތް ކުރީ ކަމަށް ވެސް ބައެއް ފަރާތްތަކުން ޝައްކުކުރިއެވެ. އިސްރާއިލްގެ މީޑިއާގައި ހުކުރު ދުވަހު ޝާއިޢުކުރި އޭނާގެ އިސްތިއުފާގެ ސިޓީގައި، މިދިޔަ އަހަރު އޭނާގެ އޮފީހުން މި ވީޑިއޯ މީޑިއާއަށް ދޫކުރިކަން ޓޯމަރ-ޔެރޫޝަލްމީ ވަނީ އެއްބަސްވެފައެވެ. 

އެ މައްސަލައާ ގުޅިގެން ފަހުން ފަސް ރިޒާވް ސިފައިންގެ މައްޗަށް ގައިދީންނަށް އަނިޔާކުރުމުގެ ދައުވާ އުފުލުނެވެ.

ޤައުމީ ސަލާމަތީ ވަޒީރު އިޓަމާ ބެން-ގްވީރު ހޯމަ ދުވަހު ޓެލެގްރާމް މެދުވެރިކޮށް ބުނީ “ކުރީ ރޭ ހިނގި ކަންތައްތަކަށް ބަލާއިރު، ޖަލުތަކުގެ ހިދުމަތުން އިތުރު ސަމާލުކަމެއް ދީގެން އޭނާ ބަންދުކޮށްފައިވާ ޑިޓެންޝަން ސެންޓަރުގައި އޭނާގެ ސަލާމަތް ކަށަވަރުކުރާނެ ކަމަށް އެއްބަސްވެފައިވާ” ކަމަށެވެ. ނަމަވެސް އޭނާގެ މައްޗަށް ކުރާ ދައުވާތަކެއް މި ބަޔާނުގައި ހާމައެއް ނުކުރެއެވެ.

އިސްރާއިލްގެ މީޑިއާ ރިޕޯޓުތައް ބުނާ ގޮތުން، ޔައްފާ (ތެލްއަވީވް) ކޯޓަކުން ވަނީ ޓޯމަރ-ޔެރޫޝަލްމީ ބުދަ ދުވަހުގެ މެންދުރު ވަންދެން ބަންދުގައި ބެހެއްޓުމަށް އަމުރުކޮށްފައެވެ. 

އާންމު ބްރޯޑްކާސްޓަރު ކާން ރިޕޯޓުކުރި ގޮތުގައި އޭނާގެ މައްޗަށް “މަކަރާއި އިތުބާރުގެ ހިޔާނާތް، މަގާމުގެ ނާޖާއިޒު ފައިދާ ނެގުން، އަދުލު އިންސާފަށް ހުރަސް އެޅުން އަދި ދައުލަތުގެ މުވައްޒަފެއްގެ ހައިސިއްޔަތުން މައުލޫމާތު ހާމަކުރުމުގެ” ޝައްކުކުރެވެއެވެ. 

މީގެ އިތުރުން، ކުރީގެ ޗީފް މިލިޓަރީ ޕްރޮސެކިއުޓަރ ކާނަލް މަޓާން ސޮލޮމެޝް ވެސް މި މައްސަލައާ ގުޅިގެން ރޭގެ ވަގުތެއްގައި ހައްޔަރުކޮށްފައިވާ ކަމަށް އިސްރާއިލްގެ އާމީ ރޭޑިއޯއިން ރިޕޯޓުކުރިއެވެ.

ހުކުރު ދުވަހު އިސްރާއިލްގެ އަސްކަރިއްޔާއިން އިއުލާނުކުރީ، މިދިޔަ އަހަރު ދެކުނު އިސްރާއިލްގައި ހުންނަ ސްޑޭ ޓެއިމަން އަސްކަރީ މަރުކަޒުން ލީކުވި ވީޑިއޯއެއްގެ މައްސަލަ ތަޙުޤީޤުކުރަމުންދާތީ، ޓޯމަރ-ޔެރޫޝަލްމީ އޭނާގެ މަގާމުން އިސްތިއުފާ ދެއްވާފައިވާ ކަމަށެވެ. މި މައްސަލަ ފެށުނީ 2024 ވަނަ އަހަރުގެ އޮގަސްޓު މަހު އިސްރާއިލްގެ ޗެނަލް 12 އިން ސްޑޭ ޓެއިމަންގެ ފުޓޭޖުތަކެއް ދައްކަން ފެށުމުންނެވެ. މި ތަނަކީ ޣައްޒާ ހަނގުރާމައިގައި ހައްޔަރުކުރެވުނު ފަލަސްތީނުގެ މީހުން ބަންދުކުރަން ބޭނުންކުރާ ތަނެކެވެ.

ސާވައިލަންސް ކެމެރާގެ މި ފުޓޭޖުތަކުން ދައްކާ ގޮތުގައި ސިފައިން ވަނީ ޤަވާއިދާ ޚިލާފު އަމަލުތަކެއް ހިންގާފައެވެ. ވީޑިއޯގައި ސިފައިން އަތްމަތީގައި އައްޑަނަ ހިފަހައްޓައިގެން ތިބޭތަން ފެނުނު ނަމަވެސް، އަނިޔާކުރާ މަންޒަރު ސީދާ ނުފެނުނު ކަމުގައި ވިޔަސް، އެތަނުގައި ނުހުއްދަ އަމަލުތަކެއް ހިނގާފައިވާކަން އެނގެއެވެ. މި ވީޑިއޯ ގިނަ މީޑިއާތަކުން ނަގައި، ބައިނަލްއަޤްވާމީ ފެންވަރުގައި ރުޅިވެރިކަމާއި އިސްރާއިލް ތެރޭގައި މުޒާހަރާތައް ކުރިމަތިވިއެވެ. އިސްރާއިލްގެ އަސްކަރިއްޔާއިން ފެބްރުއަރީ މަހު ބުނީ، ސްޑޭ ޓެއިމަންގައި ގައިދީންނަށް އަނިޔާކުރި މައްސަލައާ ގުޅިގެން ފަސް ރިޒާވް ސިފައިންގެ މައްޗަށް ދައުވާ އުފުނުނު ކަމަށެވެ.

އެ ސިފައިންގެ މައްޗަށް ދައުވާ އުފުނުނީ “ގައިދީގެ ފުރަގަސް ފަރާތަށް ތޫނު އެއްޗަކުން ހަރާ، ގައިދީގެ ފުރަގަސް ފަރާތުގެ ކައިރި ވީދިފައިވުން ހިމެނޭ ގޮތަށް “ސީރިއަސް އަނިޔާކުރުމުގެ އަމަލުތައް” ހިންގުމުގެ ދައުވާއެވެ. މި އަމަލުތަކުގެ ސަބަބުން “ގައިދީގެ ފުރަގަސް ފަރާތުގެ އެތެރެ ފާރު ވުމާއި، ފުއްޕާމޭ ފޫދިގެންދިޔުމާއި، ކަށިތައް ބިނދުންފަދަ ސީރިއަސް ޖިސްމާނީ ގެއްލުންތައް ލިބިފައިވާ ކަމަށް ވެސް ދައުވާގައިވެއެވެ. މި އަނިޔާތައް ދީފައިވަނީ ޖުލައި 5، 2024 ގައި ގައިދީ ބަލައި ފާސްކުރުމުގެ ތެރޭގައި ކަމަށް ދައުވާގައި ބަޔާންކޮށްފައިވެއެވެ.