ދުނިޔޭގެ ފުރަތަމަ ލަކުޑި ސެޓެލައިޓް ޖައްވަށް ދަތުރުކޮށްފި

ޖަޕާނުގެ ދިރާސާވެރިން ތައްޔާރުކުރި ދުނިޔޭގެ ފުރަތަމަ ލަކުޑި ސެޓެލައިޓް އަންގާރަ ދުވަހު  ޖައްވަށް ފޮނުވާލައިފިއެވެ. މިއީ ހަނދާއި އަދި މާރސް އެކްސްޕްލޯރޭޝަންގައި ލަކުޑި ބޭނުންކުރުމުގެ އިބްތިދާއީ ޓެސްޓެކެވެ.

ކިޔޯޓޯ ޔުނިވަރސިޓީއާއި ހޯމްބިލްޑަރ ސުމިޓޯމޯ ފޮރެސްޓްރީ ގުޅިގެން ތައްޔާރުކުރި "ލިގްނޯސެޓް" ނަމަކަށް ކިޔާ މި ސެޓެލައިޓް، ސްޕޭސްއެކްސް މިޝަނެއްގައިޝަނެއްގައި އިންޓަރނޭޝަނަލް ސްޕޭސް ސްޓޭޝަނަށް ފޮނުވާލުމަށްފަހު، ބިމުން ގާތްގަނޑަކަށް 400 ކިލޯމީޓަރު (250 މޭލު) މަތީގައި އޯބިޓަށް ދޫކޮށްލާނެއެވެ.

ލެޓިން ބަހުން "ލަކުޑި" އަށް ކިޔާ ނަމަކުން ނަން ދީފައިވާ، އަތްތިލައިގެ ސައިޒުގެ މި ލިގްނޯސެޓްގެ މަޤްޞަދަކީ އިންސާނުން ބޭރު ޖައްވުގައި ދިރިއުޅުމަށް ތައްޔާރުވަމުންދާއިރު، އައު އުފެއްދޭ މި މެޓީރިއަލްގެ ޖައްވީ ޤާބިލުކަން ދައްކާލުމެވެ.

"އަމިއްލައަށް އުފެއްދޭ މެޓީރިއަލްއެއް ކަމުގައިވާ ލަކުޑިން އަޅުގަނޑުމެންނަށް ގެތައް އަޅައި، ބޭރު ޖައްވުގައި އަބަދަށް ދިރިއުޅެވޭނެ," ކިޔޯޓޯ ޔުނިވަރސިޓީގައި އިންސާނުންގެ ބޭރު ޖައްވުގެ ހަރަކާތްތައް ދިރާސާކުރައްވާ، ކުރީގެ ސްޕޭސް ޝަޓްލް މަތިންދާބޯޓު ދަތުރުވެރިއެއް ކަމުގައިވާ ޓަކާއޯ ޑޮއި ވިދާޅުވިއެވެ.

ހަނދާއި މާރސްގައި 50 އަހަރުގެ މުއްދަތަކަށް ގަސް އިންދައި ލަކުޑި ގެތައް އެޅުމުގެ ޕްލޭނަކާއެކު، ޑޮއިގެ ޓީމުން ނިންމީ ލަކުޑިއަކީ ބޭރު ޖައްވަށް އެކަށޭނަ މެޓީރިއަލްއެއްކަން ސާބިތުކޮށްދިނުމަށް ނާސާއިން ސެޓިފައިކޮށްފައިވާ ލަކުޑި ސެޓެލައިޓެއް ތައްޔާރުކުރުމަށެވެ.

"1900 ގެ އަހަރުތަކުގެ ކުރީކޮޅުގެ މަތިންދާބޯޓުތައް ހަދާފައި ހުރީ ލަކުޑިން،" ކިޔޯޓޯ ޔުނިވަރސިޓީގެ ފޮރެސްޓް ސައިންސް ޕްރޮފެސަރ ކޯޖި މުރަތަ ވިދާޅުވިއެވެ. "ލަކުޑި ސެޓެލައިޓެއްވެސް ވާންވާނީ ކުރެވޭނެ ކަމަކަށް."

ބިމުގައި ނޫން ގޮތަކަށް ބޭރު ޖައްވުގައި ލަކުޑި ދެމިހުންނާނެކަން މުރަތަ ފާހަގަކުރެއްވިއެވެ. އެއީ ބޭރު ޖައްވުގައި ލަކުޑި ފީވެ ނުވަތަ އަނދާނެ ފެނާއި އޮކްސިޖަން ނުހުންނާތީއެވެ.

ލަކުޑި ސެޓެލައިޓެއްގެ އުމުރު ހަމަވުމުން ތިމާވެއްޓަށް ކުރާނެ އަސަރު ކުޑަވާނެކަމަށްވެސް މި ދިރާސާވެރިން ބުނެއެވެ.