ޙަސީބު އީސީ އަށް އައްޔަނު ކުރުމަށް ފާސްކޮށްފި!

އިލެކްޝަންސް ކޮމިޝަންގެ މެމްބަރުކަމަށް ޢަބްދުލް ހަޞީބު އިސްމާޢީލް އައްޔަންކުރަން ރައްޔިތުންގެ މަޖިލީހުން ފާސްކޮށްފިއެވެ.

އީސީގެ މެންބަރުގެ މަޤާމަށް މިހާރު އެ ކޮމިޝަނުގެ އެސިސްޓެންޓް ޑިރެކްޓަރުގެ މަޤާމުގައި ހުންނެވި ޢަބްދުލްޙަސީބް އިސްމާޢީލް އައްޔަން ކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރައްޔިތުންގެ މަޖިލީހަށް ފޮނުއްވީ މިދިޔަ މަހުގެ 14 ވަނަ ދުވަހުއެވެ.

އީސީގެ މެންބަރުކަމަށް އައްޔަންކުރެއްވުމަށް ޙަސީބުގެ ނަން ފޮނުއްވާފައިވަނީ އެކޮމިޝަނުގެ ރައީސް ފުވާދު ތައުފީޤުގެ މެންބަރުކަމުގެ މުއްދަތު ހަމަވުމަށް ކައިރިވެފައިވާތީއެވެ. ފުވާދުގެ ދައުރު ހަމަވާނީ މިމަހުގެ 23 ވަނަ ދުވަހަށެވެ.

އިލެކްޝަންސް ކޮމިޝަނުގެ މެންބަރުކަމަށް ޢަބްދުލްޙަޞީބު އައްޔަންކުރަން ރައީސް ފޮނުއްވާފައިވާ ނަންފުޅާމެދު މިނިވަން މުއައްސަސާތަކުގެ ކޮމިޓީން ނިންމިގޮތުގެ ރިޕޯޓު މަޖިލީހަށް ވަނީ ހުށައަޅާފައެވެ. އަދި އޭނާ އިލެކްޝަންސް ކޮމިޝަނަށް އައްޔަންކުރަން ކޮމިޓީއަށް ފެންނަކަމަށް ކޮމިޓީގެ ރިޕޯޓުގައިވެއެވެ. އެހެންކަމުން ކޮމިޓީން ނިންމި ގޮތާ އެއްގޮތަށް އެކޮމިޝަނަށް ޙަސީބު އައްޔަންކުރަން މަޖިލީހުން ވަނީ ފާސްކޮށްފައެވެ. ޙަސީބު އެކޮމިޝަނަށް އައްޔަނުކޮށްފަައިވަނީ އެކަމަށް ނެގި ވޯޓުގައި ބައިވެރިވެވަޑައިގެންނެވި 67 މެންބަރުންގެ އިއްތިފާޤުންނެވެ.

އީސީގެ އެސިސްޓެންޓް ޑިރެކްޓަރުގެ މަޤާމު މިހާރު އަދާކުރައްވަމުންގެންދަވާ ޢަބްދުލްޙަސީބު ވަނީ މީގެ ކުރިން މާލީ ވުޒާރާ އާއި އިސްލާމީ ކަންތައްތަކާބެހޭ ވުޒާރާގެ އިސް މަޤާމުތަކެއްވެސް ފުރުއްވާފައެވެ. އޭނާ އިލެކްޝަންސް ކޮމިޝަނާ ގުޅިވަޑައިގެންނެވީ 2 ޖެނުއަރީ 2022ގައެވެ.