މުޅި ދުނިޔެ 150 ފަހަރު ފަނާކޮށްލުމުގެ ނިއުކްލިއަރ ގާބިލިއްޔަތުކަން ހުރިކަމަށް ޓްރަމްޕް ދައުވާކޮށްފި!

އެމެރިކާގެ  ރައީސް ޑޮނަލްޑް ޓްރަމްޕް ވަނީ، އެމެރިކާއަށް މުޅި ދުނިޔެ 150 ފަހަރު ފަނާކޮށްލުމުގެ ނިއުކްލިއަރ ގާބިލިއްޔަތު ހުރިކަމަށް ދައުވާކުރައްވާފައެވެ. އެމަނިކުފާނު ވިދާޅުވީ މިއީ އެމެރިކާގެ ހަނގުރާމައިގެ ހުނަރު (ސްޓްރެޓީޖިކް ކެޕެބިލިޓީ) އެއްވެސް ގައުމަކަށް ބަލިނުކުރެވޭނެކަން ހާމަކޮށްދޭ ކަމެއް ކަމުގައެވެ.

މީޑީއާއަށްދެއްވި ބަސްދީގަތުމެއްގައި ޓްރަމްޕް ވަނީ، އެހެން ގައުމުތަކުން ނިއުކްލިއަރ ތަޖުރިބާތައް ކުރަމުންދާ ކަމަށްޓަކައި ކަންބޮޑުވުން ފާޅުކުރައްވާފައެވެ. އެގޮތުން، ޕާކިސްތާން، އުތުރު ކޮރެއާ، ރަޝިޔާ، އަދި ޗައިނާގެ ނަން ފާހަގަކުރައްވާ ޓްރަމްޕް ވިދާޅުވީ، މިފަދަ ތަޖުރިބާތައް ކުރެވެނީ ބިމުގެ ވަރަށް އަޑީގައި ކަމުން އެކަން ހާމައެއް ނުވާނެ ކަމަށާއި، އެކަމުން ހަމައެކަނި ކުޑަކުޑަ ގުޑުންގަނޑެއް އެކަނި އިހުސާސްވާނެ ކަމަށެވެ. މިއީ މިފަދަ ތަޖުރިބާތަކުގެ ސިއްރުކަން އޭނާ ފާހަގަކުރެއްވިއެވެ.

އެމެރިކާއިން ނިއުކްލިއަރ ހަތިޔާރު ބޭނުންކުރަން ބޭނުންނުވި ނަމަވެސް، އެ ހަތިޔާރުތައް މަސައްކަތްކުރާނެ ގޮތާއި، ބޭނުންކުރުމަށް ތައްޔާރުކުރެވިފައިވާ މިންވަރު ދެނެގަތުމަށްޓަކައި އަބަދުވެސް ތަޖުރިބާކުރަމުންދާކަން ޓްރަމްޕް ފާހަގަކުރެއްވިއެވެ. "އެމެރިކާއިން އެއްގޮތަކަށްވެސް ނިއުކްލިއަރ ހަތިޔާރު ބޭނުންކުރާކަށް ބޭނުމެއްނުވޭ، ނަމަވެސް އެތަކެތީގެ ކާމިޔާބުކަން ކަށަވަރުކުރުމަށްޓަކައި ތަޖުރިބާކުރުން އެހީތެރިވެދޭ." އޭނާ އިތުރަށް ވިދާޅުވިއެވެ.

ރައީސް ޓްރަމްޕްގެ މި ބަސްފުޅުތައް އައިސްފައިވަނީ، ނިއުކްލިއަރ ހަތިޔާރު އިތުރުވަމުންދާތީއާއި، ހަތިޔާރުގެ ބާޒާރު ބޮޑުވަމުންދާތީ، ބައިނަލްއަގުވާމީ ސަމާލުކަން އިތުރުވެފައިވާ ދަނޑިވަޅެއްގައެވެ. ޓްރަމްޕް އިންޒާރުދެއްވީ، ހާމަނުކޮށް ނިއުކްލިއަރ ތަޖުރިބާތައް ކުރާ ގައުމުތަކުން ދުނިޔޭގެ ސުލްހަ އަށް ސްޓްރެޓީޖިކް ގޮންޖެހުންތަކެއް ކުރިމަތިކުރުމުގެ ފުރުސަތު އޮތް ކަމަށެވެ.

ޓްރަމްޕް ވަނީ ޕާކިސްތާނާއި އެހެނިހެން ގައުމުތަކުން ކުރާ ނިއުކްލިއަރ ހަރަކާތްތައް ބައިނަލްއަގުވާމީ ބެލެހެއްޓުމެއް ނެތި ކުރަމުންދާ ކަމަށް އިޝާރާތްކުރައްވާފައެވެ. އެގޮތުން، މިފަދަ ނިއުކްލިއަރ ގާބިލިއްޔަތުތައް ބަލައި ފާރަވެރިވުމާއި، ގައުމީ ސަލާމަތް ކަށަވަރުކުރުމަށްޓަކައި އެތަކެތި ހުއްޓުވުމަށް އަޅާ ފިޔަވަޅުތަކުގެ މުހިންމުކަމުގެ ވާހަކަ  ދެއްކެވިއެވެ.

ޓްރަމްޕްގެ މި ކޮމެންޓްތަކަށް ޗައިނާއިން ވަނީ ރައްދުދީ، އެމަނިކުފާނުގެ ދައުވާތައް ދޮގުކޮށްފައެވެ. ޗައިނާ ސަރުކާރުގެ ތަރުޖަމާނެއް ވިދާޅުވީ، އެގައުމުގެ ނިއުކްލިއަރ ސްޓްރެޓީޖީ އަބަދުވެސް އޮންނަނީ ދިފާއީ ސިފައެއްގައި ކަމަށެވެ. "ޒިންމާދާރު ނިއުކްލިއަރ ބާރެއްގެ ގޮތުން، ޗައިނާގެ ނިއުކްލިއަރ ސިޔާސަތު އަމާޒުކުރެވިފައިވަނީ ހަމައެކަނި ދިފާއީ މަގްސަދުތަކަށް،" ތަރުޖަމާނު ވިދާޅުވިއެވެ. ބެއިޖިންގ އިން ހަނގުރާމަ ހުއްޓުވުމަށް ދެމިހުރުމަށް ދޭ ސަމާލުކަން އޭނާ ވަނީ ފާހަގަކުރައްވާފައެވެ.