އޭސީސީއާއި އީސީގެ ރައީސް އައްޔަނުކުރުމުގެ ބާރު ރައީސަށް ލިބޭ ބިލް މަޖިލީހުގެ ކޮމިޓީއަށް!

އެންޓި ކޮރަޕްޝަން ކޮމިޝަނާއި އިލެކްޝަން ކޮމިޝަންގެ ރައީސް އަދި ނައިބުރައީސްގެ މަޤާމަށް ބޭފުޅުން އައްޔަނުކުރުމުގެ ބާރު ރައީސުލްޖުމްހޫރިއްޔާއަށް ދިނުމާއި ބެހޭ ބިލް ރައްޔިތުންގެ މަޖިލީހަށް ބަލައިގަނެ ކޮމިޓީއަށް ފޮނުވައިފިއެވެ. 

 މަޖިލިހުގެ މިއަދުގެ ޖަލްސާގައި ވަނީ ވަކިވަކިން ހުށަހެޅި މިދެ ބިލަށް ވޯޓަށް އަހައިފައެވެ. އެގޮތުން އޭސީސީގެ ޤާނޫނަށް އިސްލާޙު ގެންނައުމަށް ހުށަހަޅާފައިވާ ބިލް ބަލައިގަތުމަށް ވޯޓު ދެއްވާފައިވަނީ 60 މެމްބަރެކެވެ. ނުފެންނަ ކަމަށް ވޯޓު ދެއްވީފަސް މެމްބަރެކެވެ. 

އަދި އީސީގެ ޤާނޫނަށް އިސްލާޙު ގެނައުމަށް ހުށަހަޅާފައިވާ ބިލް މަޖިލީހުން ބަލައިގަތުމަށް ފެންނަ ކަމަށް ވޯޓު ދެއްވީ 60 މެމްބަރެކެވެ. އަދި ނުފެންނަ ކަމަށް ވޯޓު ދެއްދެވީ ހަ މެމްބަރެކެވެ. މިވޯޓާއި އެކު މަޖިލީހުގެ ރިޔާސަތުން ވަނީ އެ ދެ ބިލް އިތުރަށް ދިރާސާ ކުރުމަށް މިނިވަން މުވައްސަސާތަކުގެ ކޮމިޓީއަށް ފޮނުވައިފައެވެ.

ޤާނޫނުގައި މިހާރު އޮންނަ ގޮތުންނަމަ އޭސީސީއާއި އީސީގެ ރައީސް އައްޔަން ކުރަނީ އެ ކޮމިޝަނެއްގެ މެމްބަރުންގެ މެދުގައި ނަގާ ވޯޓަކުންނެވެ. ނަމަވެސް މިހާރު މަޖިލީހަށް ހުށަހަޅާފައިވާ މި ބިލުގައިވާ ގޮތުން އެ ކޮމިޝަންތަކަށް ރައީސެއް އައްޔަން ކުރުމަށް، ކޮމިޝަންގެ މެމްބަރުންގެ ތެރެއިން މެމްބަރެއްގެ ނަން މަޖިލީހަށް ހުށަހަޅާނީ ރައީސުލްޖުމްހޫރިއްޔާއެވެ.

 އަދި މި ނަން ފާސްކުރުމަށް މަޖިލީހުގެ ޖަލްސާއެއް ބާއްވަން ޖެހޭނެއެވެ. އެ މަޤާމުތަކުން އިސްތިއުފާދޭން ހުށަހަޅަން ޖެހޭނީ ވެސް ރައީސުލްޖުމްހޫރިއްޔާއަށެވެ.