ސިޔާސީ ޕާޓީތައް ޤަވާއިދާ ޚިލާފުވާނަމަ 100،000ރ އިން ޖޫރިމަނާކުރެވޭ ބިލް ކޮމިޓީއަށް!

ސިޔާސީ ޕާޓީތަކުގެ ޤަވާއިދާ ޚިލާފަށް ޕާޓީތަކުން ޢަމަލުކުރާނަމަ 100،000ރ އިން ޖޫރިމަނާކުރެވޭ ބިލް ރައްޔިތުންގެ މަޖިލީހަށް ބަލައިގަނެ މުޅި މަޖިލީހުގެ ކޮމިޓީއަށް ފޮނުވައިފިއެވެ. 

މިބިލަކީ ސަރުކާރުގެ ފަރާތުން ހުށައެޅި ބިލެކެވެ. މިބިލް މަޖިލީހަށް ހުށައަޅުއްވައިދެއްވައިފައިވަނީ ދިއްދޫ ދާއިރާގެ ޕީއެންސީގެ މެމްބަރު ޢަބްދުއްލަތީފް މުޙައްމަދެވެ. 

މި ބިލް މަޖިލީހަށް ބަލައިގަތުމާއި މެދު ގޮތެއް ނިންމުމަށް ނެގި ވޯޓުގައި ފެންނަ ކަމަށް ވޯޓު ދެއްވެވީ 60 މެންބަރެކެވެ. ނުފެންނަ ކަމަށް ފަސް މެންބަރެއް ވަނީ ވޯޓުދެެއްވައިފައެވެ. 

އެހެންކަމުން މަޖިލީހުގެ ރިޔާސަތުން ވަނީ އެ ބިލް ދިރާސާ ކުރުމަށް މަޖިލީހުން މުޅި މަޖިލީހުގެ ކޮމިޓީއަށް ފޮނުވާފައެވެ.

އެ ޤާނޫނަށް ގެނައުމަށް ހުށަހަޅާފައިވާ އިސްލާޙުގައި ވަނީ ޕާޓީއެއް ރަޖިސްޓްރީ ކުރުމަށް އެދި ހުށަހަޅާނީ އެ ޤާނޫނުގެ ދަށުން ހަދާ ޤަވާއިދުގައިވާ ގޮތުގެ މަތިން އިލެކްޝަންސް ކޮމިޝަނުން ކަނޑައަޅާ ނަމޫނާއަކާ އެއްގޮތްވާ ގޮތުގެ މަތިން އެކުލަވާލާ ފޯމު މެދުވެރިކޮށް ބަޔާން ކޮށްފައިވާ ރަޖިސްޓްރީ ފީއާ އެކުގައި ކަމަށް ބިލްގައިވެއެވެ.

އަދި ބިލްގައި ވަނީ ސިޔާސީ ޕާޓީ ހިންގުމަށް ދައުލަތުގެ ބަޖެޓުން ދޭ ފައިސާ ވާންވާނީ ކޮންމެ އަހަރެއްގައި ދައުލަތުގެ ބަޖެޓުގައި އެކަމަށް ކަނޑައެޅި ދޫކުރެވޭ ފައިސާއަކަށް ކަމަށެވެ. އަދި އެގޮތުން ދޫކުރެވޭ ފައިސާއަކީ ދައުލަތުގެ އަހަރީ ބަޖެޓް އެ އަހަރަކަށް ލަފާކުރާ އާމްދަނީގެ %0.1 އާއި %0.2 އާ ދެމެދުގެ އަދަދަކަށް ވާންޖެހޭނެ ކަމަށް ބުނެފައިވެއެވެ.

އެ ޤާނޫނާއި ޚިލާފުވާ ފަރާތެއް 30،000ރ. އާއި 75،000ރ. އާ ދެމެދުގެ އަދަދަކުން ޖޫރިމަނާކުރުމާއެކު އެ އަމަލެއް ހިންގި ފަރާތެއް ނިސްބަތްވާ ޕާޓީއެއް 100،000ރ. އިން ޖޫރިމަނާ ކުރެވިގެންދާނެ ކަމަށް ވެސް ބިލްގައިވަނީ ބުނެފައެވެ.