މާލެ ސަރަޙައްދުން ދޫކޮށްފައިވާ ގޯތިތައް ހެދުމަށް އެހީތެރިކަން ލިބޭ ސްކީމެއް ތަޢާރަފުކުރަނީ!

މާލެ ސަރަޙައްދުން ދޫކޮށްފައިވާ ގޯތިތައް ހެދުމަށް އެހީތެރިކަން ލިބޭ ސްކީމެއް ތަޢާރަފުކުރައްވާނެ ކަމަށް ރައީސުލްޖުމްހޫރިއްޔާ ޑރ މުޙައްމަދު މުއިއްޒު ވިދާޅުވެއްޖެއެވެ. 

ރައީސް ޑރ މުޢިއްޒު މިހެން ވިދާޅުވީ "ހިޔާވެހި ފައިނޭންސިންގ ޕްރޮގްރާމް" އިފްތިތާޙުކުރުމަށް މިއަދު ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ.

މި ރަސްމިއްޔާތުގައި ރައީސް ޑރ މުޢިއްޒު ވިދާޅުވީ، މި ސްކީމް ތަޢާރަފުކުރުމާ ގުޅުންހުރި ފަންނީ މަސައްކަތްތައް މިހާރު ކުރައްވަމުގެންދަވާކަމަށާއި، އެކަންކަން ފުރިހަމަވުމުން، އެ ސްކީމްވެސް އިޢުލާންކުރައްވާނޭކަމަށެވެ. 

މާލޭ ސަރަޙައްދުން ދޫކޮށްފައިވާ ގޯތިތަކާ ގުޅޭ، އަދާހަމަ ހާމަ ކުރައްވަމުން ރައީސް ޑރ މުޢިއްޒު ވަނީ، ހުޅުމާލެ އާއި ގުޅީފަޅާއި ގިރާވަރު ފަޅުގެ ބައެއް ތަފްޞީލުތައް ދެއްވާފައެވެ. 

އެގޮތުން، ހުޅުމާލޭގެ ދެވަނަ ފިޔަވަހިން ދޫކޮށްފައިހުރި ގޯތިތައް ހަވާލުކޮށް ނިމިފައިވާކަމަށާއި، ހުޅުމާލޭގެ ތިންވަނަ ފިޔަވަހި ހިއްކާ ނިމުމުން އެތަނުން ދޫކޮށްފައިވާ ގޯތިތައް ހަވާލުކުރައްވާނޭ ކަމުގައި އެމަނިކުފާނު ވިދާޅުވިއެވެ.

ގުޅީފަޅުގެ ހިއްކާ ނުނިމި އޮތް ސަރަޙައްދު ހިއްކުމުގެ މަސައްކަތް ވަރަށް އަވަހަށް ހަވާލުކުރާނޭކަމަށާއި، ގޯތީގެ ރަޖިސްޓަރީ ހަވާލުކުރެވޭނީ ބިން ހިއްކައި ނިމުމުން ކަމަށް އެމަނިކުފާނު ވިދާޅުވިއެވެ. އެހެންނަމަވެސް މިހާރުވެސް، ރައްޔިތުންނަށް ޔަޤީންކަން ދެއްވުމުގެ މަޤްޞަދުގައި، އެ މީހެއްގެ ގޯތި ލިބޭނޭ ސަރަޙައްދުގެ ކޯޑިނޭޓްސް ފެންނަ ލިޔުމެއް، ދޫކުރަމުންދާކަމަށް ރައީސް މުޢިއްޒު ވިދާޅުވިއެވެ.

ގިރާވަރު ފަޅުގެ މައްސަލައަށް އަލިއަޅުއްވާލައްވަމުން ރައީސް ޑރ މުޢިއްޒު ވަނީ، ގިރާވަރު ފަޅުން ގޯތި ދޫކޮށްފައިވަނީ އެއްވެސް މިންގަނޑަކަށް ނުވަތަ ލޭންޑް ޔޫސް ޕްލޭނަކަށް ބަލައިގެން ނޫންކަމަށެވެ. އަދި އޭގެ ސަބަބުން 1200 އެއްހާ ގޯތި، އެހެން ސަރަޙައްދުތަކަށް ބަދަލުކުރަން ޖެހިވަޑައިގަތްކަމަށެވެ. 

މީގެއިތުރުން ރަސްމާލޭގެ މަސައްކަތުގައިވެސް ހުރި ގޮންޖެހުންތަކުން އަރައިގަނެ، ރޭވުމާ އެއްގޮތަށް މަސައްކަތް ނިންމަވާނޭކަމަށް ރައީސް މުޢިއްޒު ވިދާޅުވިއެވެ.

އަދި ގެދޮރުވެރިކަމަށް ދާއިމީ ޙައްލެއް ހޯދެން އޮތީ، ދެން ހުރި ސަރަޙައްދުތަކުގައިވެސް ހިއްކަން ޖެހޭ ބިންތައް ހިއްކައި އަރބަން ސެންޓަރުތައް ތަރައްޤީކޮށްގެންކަން އެމަނިކުފާނު ފާހަގަކުރެއްވިއެވެ. ރައީސް މުޢިއްޒު ވިދާޅުވީ، މި ސަރުކާރަށް އަބަދުވެސް މުހިންމީ ނަތީޖާކަމަށެވެ. އަދި ވާހަކަދައްކާނީވެސް ނަތީޖާގެ މައްޗަށް ކަމުގައި އެމަނިކުފާނު ވިދާޅުވިއެވެ.

އުފަލާއި ޔަޤީންކަމާއެކު ދިވެހިރައްޔިތުންނަށް ދަންނަވާލަން ބޭނުންވަނީ، ގެދޮރުވެރިކަމުގެ މައްސަލަ އަކީ ހުރިހާ ރައްޔިތުންގެ އެހީތެރިކަމާވެސް އެކުގައި ހައްލުކުރާނޭ ކަމެއް ކަމަށެވެ. އަދި މިއަދު މި ފެށުނީ އޭގެ އެންމެ މުހިންމު ކަންތައް ކަމަށް  

ރައީސުލްޖުމްހޫރިއްޔާ ޑރ މުޢިއްޒު ވިދާޅުވިއެވެ.

މާލެ ސަރަޙައްދުން ދޫކޮށްފައިވާ ގޯތިތައް ޢިމާރާތްކުރުމަށްޓަކައި އެހީތެރިކަން ލިބޭ ސްކީމުގެ ދަށުން، ސަރުކާރުގެ ކުންފުންޏަކާ އެކުގައި މަސައްކަތްތަކެއް ކޮށްގެން، ރައްޔިތުންނަށް ލިބިފައިވާ ގޯތިތަކުގައި ގެ އެޅޭނޭ ލުއި ގޮތްތަކެއް ހޯދައިދެވޭނެ އިންތިޒާމު ހަމަޖައްސައިދެއްވުމަކީ ރައީސް ޑރ މުޢިއްޒުގެ ވައުދުފުޅެކެވެ.