އެއަރޕޯޓުން ޓެކްސް އާއި ފީ ނެގުމުގެ ޤާނޫނަށް އިޞްލާޙު ގެނައުމުގެ ބިލު ރައީސް ތަސްދީޤު ކުރައްވައިފި!

އެއަރޕޯޓުން ޓެކްސް އާއި ފީ ނެގުމުގެ ޤާނޫނަށް 2 ވަނަ އިޞްލާޙު ގެނައުމުގެ ބިލް ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ތަސްދީޤު ކުރައްވައިފިއެވެ. 
މިއަދު ރައީސް ތަސްދީޤް ކުރެއްވެވީ ދިވެހިރާއްޖޭގެ އެއަރޕޯޓަކުން ދިވެހިރާއްޖޭން ބޭރަށް ފުރާ ފަސިންޖަރުންގެ އަތުން ޓެކްސްއާއި ފީ ނެގުމާބެހޭ ޤާނޫނަށް ގެނެވުނު ދެވަނަ އިޞްލާޙެވެ. 
މި ބިލަކީ 31 އޮކްޓޫބަރު 2024 ވީ ބުރާސްފަތި ދުވަހު ބޭއްވި، 20 ވަނަ ރައްޔިތުންގެ މަޖިލީހުގެ 44 ވަނަ ޖަލްސާއިން ފާސްކުރެއްވި ބިލެވެ.
މި އިސްލާޙުގައި، ޤާނޫނުގެ 1-2 ވަނަ މާއްދާގެ 1 ގެ (ހ) އަށް ގެނައި ބަދަލުގެ ދަށުން، ދިވެހިރާއްޖޭގެ އެއަރޕޯޓަކުން ދިވެހިރާއްޖެއިން ބޭރަށް ފުރާ ފަސިންޖަރުންގެ އަތުން، ޑިޕާޗަރ ޓެކްސްގެ ގޮތުގައި ނަގާ މިންވަރަށް ވަނީ ބަދަލުތަކެއް ގެނެސްފައެވެ. 

އެގޮތުން، 1 ޑިސެންބަރު 2024 އިން ފެށިގެން ޑިޕާޗަރ ފީގެގޮތުގައި  ނަގަމުންދާނީ:-
•  އިކޮނޮމީ ކުލާހުން ދަތުރުކުރާ ދިވެހިންގެ އަތުން ޑިޕާޗަރ ޓެކްސްގެ ގޮތުގައި 12 އެމެރިކާ ޑޮލަރު 
•  އިކޮނޮމީ ކުލާހުން ދަތުރުކުރާ ބިދޭސީންގެ އަތުން 50 އެމެރިކާ ޑޮލަރު
•  ބިޒްނަސް ކުލާހުން ދަތުރުކުރާ ދިވެހިންނާއި ބިދޭސީންގެ އަތުން ވެސް 120 އެމެރިކާ ޑޮލަރު
•   ފަސްޓް ކުލާހުން ދަތުރުކުރާ ދިވެހިންނާއި ބިދޭސީންގެ އަތުން ވެސް 240 އެމެރިކާ ޑޮލަރު  
•   ޕްރައިވެޓް ޖެޓުން ދަތުރުކުރާ ދިވެހިންނާއި ބިދޭސީންގެ އަތުން 480 އެމެރިކާ ޑޮލަރު

މި މާއްދާގެ (ހ) ގެ ދަށުން ނަގާ ޓެކްސް ނަގާނީ، 1 ޖަނަވަރީ 2022 އިން ފެށިގެންކަމަށް ބުނާ، މި ޤާނޫނުގެ 1-2 ވަނަ މާއްދާގެ (ށ)، މިއަދުގެ އިޞްލާޙާއެކު ވަނީ އުނިކޮށްފައެވެ. މި އިސްލާޙުގައި، ޤާނޫނުގެ 3 ވަނަ މާއްދާގެ (ހ) ގެ (2) ވަނަ ނަންބަރަށްވެސް ވަނީ ބަދަލުގެނެސްފައެވެ.

އެގޮތުން 1 ޖަނަވަރީ 2022 އިން ފެށިގެން އެއަރޕޯޓް ޑިވެލޮޕްމަންޓް ފީތައް ނަގަމުން އައި ގޮތަށް ބަދަލެއް ނުގެނެސް އެ ފީތައް ނަގާނީ، 30 ނޮވެންބަރު 2024 ގެ ނިޔަލަށް ކަމަށް މި އިޞްލާޙުގައި ވެއެވެ.

އަދި 1 ޑިސެންބަރު 2024 އިން ފެށިގެން އެއަރޕޯޓު ޑިވެލޮޕްމަންޓް ފީގެ ގޮތުގައި ނަގާ ޓެކުހުގެ ޢަދަދުތަކަށް ވަނީ ބަދަލު ގެނެސްފައެވެ. މި ބަދަލު ބަޔާންކުރުމަށް ޓަކައި، މި ޤާނޫނުގެ 3 ވަނަ މާއްދާގެ (ހ) ގެ (2) ވަނަ ނަންބަރުގެ ފަހަތަށް ނަންބަރެއް އިތުރުކޮށްފައިވެއެވެ. 

އެ ނަންބަރުގައި ބަޔާންކުރާ ގޮތުން، 1 ޑިސެންބަރު 2024 އިން ފެށިގެން އެއަރޕޯޓު ޑިވަލޮޕްމެންޓް ފީގެ ގޮތުގައި ނެގެމުންދާނީ:-
•  އިކޮނޮމީ ކުލާހުން ދަތުރުކުރާ، ދިވެހިންގެ އަތުން 12 އެމެރިކާ ޑޮލަރު
•  އިކޮނޮމީ ކުލާހުން ދަތުރުކުރާ، ބިދޭސީންގެ އަތުން 50 އެމެރިކާ ޑޮލަރު 
•  ބިޒްނަސް ކުލާހުގެ ފަސިންޖަރުންގެ އަތުން 120 އެމެރިކާ ޑޮލަރު
•  ފަސްޓް ކުލާސް ފަސިންޖަރުންގެ އަތުން 240 އެމެރިކާ ޑޮލަރު
•  ޕްރައިވެޓް ޖެޓުން ދަތުރުކުރާ ފަސިންޖަރުންގެ އަތުން 480 އެމެރިކާ ޑޮލަރު 

ޤާނޫނުގެ 8-1 ވަނަ މާއްދާގެ (ހ) އަށް ގެނައި ބަދަލުގެ ދަށުން، ޤާނޫނާ ޚިލާފަށް ނަގާ ޓެކްސްއާއި ފީ ފަސިންޖަރުންނަށް އަނބުރާ ދެއްކުމާބެހޭ ތަފްޞީލުތައް ވެސް ވަނީ އިޞްލާޙުކޮށްފައެވެ.

އެގޮތުން، އެއަރޕޯޓް ސަރވިސް ޗާޖް ނުވަތަ ޑިޕާޗަރ ޓެކްސް ނުވަތަ އެއަރޕޯޓް ޑިވެލޮޕްމަންޓް ފީ ނެގުން ހުއްދަ ނޫން ފަރާތަކުން އެއިން ޓެކްސްއެއް ނުވަތަ ފީއެއް ނަގާފައިވާނަމަ، ނުވަތަ އެއަރޕޯޓް ސަރވިސް ޗާޖް ނުވަތަ ޑިޕާޗަރ ޓެކްސް ނުވަތަ އެއަރޕޯޓް ޑިވެލޮޕްމަންޓް ފީ ނަގަން ނުޖެހޭ ފަރާތެއްގެ އަތުން އެއިން ޓެކްސްއެއް ނުވަތަ ފީއެއް ނަގާފައިވާނަމަ، ނުވަތަ ނަގަންޖެހޭ ޢަދަދަށްވުރެ އިތުރަށް އެއިން ޓެކްސްއެއް ނުވަތަ ފީއެއް ނަގާފައިވާނަމަ، އެ ފައިސާ ނެގި މުއްދަތަށް ނިސްބަތްވާ އެއަރޕޯޓް ޓެޖްސްއާއި ފީގެ ބަޔާން މީރާއަށް ހުށަހަޅަންޖެހޭ މުއްދަތުގެ ކުރިން އެ ފައިސާ، އެ ފަސިންޖަރަށް އަނބުރާ ދޭންވާނެ ކަމަށް އިސްލާޙުގައިވެއެވެ. ހަމަ އެފަދައިން އެ ފައިސާ އެ ފަރާތަކަށް އަނބުރާ ނުދޭހާ ހިނދަކު، އެ ފައިސާ މީރާއަށް ދައްކަން ޖެހޭގޮތަށް މި އަކުރު ވަނީ އިޞްލާޙުކޮށްފައެވެ.

އަދި ޤާނޫނުގެ 8-1 ވަނަ މާއްދާގެ (ށ) އަށް ގެނައި ބަދަލުގެ ދަށުން، މި މާއްދާގެ (ހ) ގައި ބަޔާންކުރާ ގޮތުގެމަތިން އެއްވެސް ފަރާތެއްގެ އަތުން ނަގާފައިވާ ފައިސާއެއް އެ ފަރާތަކަށް އަނބުރާ ދީފައިވާނަމަ އަދި އެ ފައިސާ މީރާއަށް ދައްކާފައިވާނަމަ، އެ ފައިސާ ދިން މުއްދަތަށް ނިސްބަތްވާ އެއަރޕޯޓް ޓެކްސްއާއި ފީގެ ބަޔާނުގައި ހިމަނައި، އެ ފައިސާ އަނބުރާ ހޯދުމަށް މީރާއަށް ހުށަހެޅިދާނެއެވެ.

މި ޤާނޫނުގެ 13 ވަނަ މާއްދާގެ (ހ) އިޞްލާޙުކޮށްފައިވާ ގޮތަށް ބަލާއިރު، މި ޤާނޫނު ތަންފީޛުކުރުމަށްޓަކައި ހަދަންޖެހޭ އެންމެހައި ގަވާއިދުތައް ހަދައި، މި ޤާނޫނު ތަންފީޛުކޮށް، މި ޤާނޫނުގައިވާ އެންމެހައި ކަންކަން ހިންގައި ބަލަހައްޓާނީ މީރާއިން ކަމަށާއި، މިގޮތުން މީރާއިން ހަދާ ގަވާއިދުގައި، މި ޤާނޫނުގެ ދަށުން އެއަރލައިންތަކާއި އެއަރޕޯޓް ހިންގާ ފަރާތްތައް ރަޖިސްޓަރީކުރުމުގެ އުސޫލުތަކާއި، އެއަރޕޯޓް ސަރވިސް ޗާޖް ނެގުމުގެ އުސޫލުތަކާއި، ޑިޕާޗަރ ޓެކްސްއާއި އެއަރޕޯޓް ޑިވެލޮޕްމަންޓް ފީ ނެގުމުގައި ދަތުރުކުރާ ކްލާސްތައް ކަނޑައަޅާނެ މިންގަނޑުތަކާއި، މި ޤާނޫނުގެ ދަށުން ނަގާ ޓެކްސްއާއި ފީއަށް އަންނަ ބަދަލުތަކާ ގުޅިގެން އެ ޓެކްސްއާއި ފީ ނެގުމުގައި ޢަމަލުކުރާނެ އިންތިޤާލީ އުސޫލުތައް ކަނޑައަޅަންވާނޭކަމަށް ވަނީ ބަޔާންކޮށްފައެވެ. މި ބަދަލާއެކު، މި ޤާނޫނުގެ 13 ވަނަ މާއްދާގެ (ނ) ވަނީ އުނިކޮށްފައެވެ.
ދިވެހިރާއްޖޭގެ އެއަރޕޯޓަކުން ދިވެހިރާއްޖޭން ބޭރަށް ފުރާ ފަސިންޖަރުންގެ އަތުން ޓެކްސްއާއި ފީ ނެގުމާބެހޭ ޤާނޫނަށް 2 ވަނަ އިޞްލާޙު ގެނައުމުގެ ބިލު ރައީސުލްޖުމްހޫރިއްޔާ މިއަދު ތަޞްދީޤުކުރެއްވުމާ ގުޅިގެން މި ޤާނޫނު ވަނީ ދިވެހި ސަރުކާރުގެ ގެޒެޓުގައި ޝާއިޢު ކުރައްވާފައެވެ. 
އަދި މި ޤާނޫނަށް ޢަމަލުކުރަން ފެށުމަށް ހަމަޖެހިފައިވަނީ މި ޤާނޫނު ތަޞްދީޤުކުރައްވައި، ދިވެހިސަރުކާރުގެ ގެޒެޓުގައި ޝާއިޢުކުރާ ދުވަހުން ފެށިގެންނެވެ.
މި ޤާނޫނަށް ގެނައި އިޞްލާޙުތަކާ ގުޅިގެން އެ ޤާނޫނުގެ ދަށުން އެކުލަވާލާފައިވާ ޤަވާއިދަށް ގެންނަންޖެހޭ އިޞްލާޙުތައް، މި ޤާނޫނަށް ޢަމަލުކުރަން ފަށާ ތާރީޚުން ފެށިގެން ތިރީސް ދުވަހުގެ ތެރޭގައި އެކުލަވާލައި، ދިވެހިސަރުކާރުގެ ގެޒެޓުގައި ޝާއިޢުކުރަން ޖެހެއެވެ.