ފަންޑު ނެތުމުން އިރުމަތީ ކޮންގޯއަށް ދޭ ކާނާގެ އެހީ ހުއްޓާލަން ޖެހިދާނެ ކަމަށް ޔޫ.އެން.ޑަބްލިޔު.އެފް.ޕީ އިން އިންޒާރު ދީފި

ފައިސާގެ ބޮޑު ދަތިކަމެއް ކުރިމަތިވެފައިވާތީ، އަންނަ ފެބްރުއަރީ މަހުގެ ނިޔަލަށް އެމެރިކާގެ ކޮންގޯގެ އިރުމަތީ ބައިގައި ކާނާގެ ދަތިކަމާ ކުރިމަތިވެފައިވާ މިލިއަނަކަށްވުރެން ގިނަ މީހުންނަށް ފޯރުކޮށްދެމުންދާ ކާނާގެ އެހީ ހުއްޓާލަން ޖެހިދާނެ ކަމަށް އ.ދ. ގެ ވޯލްޑް ފުޑް ޕްރޮގްރާމް (ޑަބްލިޔު.އެފް.ޕީ) އިން  އިންޒާރު ދީފިއެވެ.

ޑީ.އާރު.ސީއަށް ހާއްސަ ޑަބްލިޔު.އެފް.ޕީގެ ކަންޓްރީ ޑިރެކްޓަރ ސިންތިއާ ޖޯންސް ވިދާޅުވީ، މި އަހަރު އެ ޖަމިއްޔާއަށް ލިބިފައިވަނީ ގާތްގަނޑަކަށް 150 މިލިއަން ޑޮލަރު ކަމަށާއި، މިހާރު ފަންޑު ލިބެމުންދަނީ ތާރީހުގައިވެސް ނުދާ މިންވަރަށް ދަށުން ކަމަށެވެ. އެ ސަރަހައްދުގައި އެހީތެރިކަމަށް ބޭނުންޖެހިފައިވާ މީހުންނަށް އެހީވުމަށް 350 މިލިއަން ޑޮލަރު ބޭނުންވާ ކަމަށް ޖޯންސް ފާހަގަކުރެއްވިއެވެ.

މިދިޔަ އަންގާރަ ދުވަހު އާއްމުކުރި ގްލޯބަލް ފުޑް މޮނިޓަރެއްގެ ރިޕޯޓެއްގައިވާ ގޮތުން، ޑީ.އާރު.ސީގެ އިރުމަތީ ބައިގައި 3.2 މިލިއަނަށް ވުރެ ގިނަ މީހުންނަށް ކާނާގެ ދަތިކަން ހައްދުން ފަހަނަޅާފައިވާ ހާލަތަކާ ކުރިމަތިވެފައިވެއެވެ. މި ހާލަތަކީ ކާނާގެ ބޮޑެތި ދަތިކަމާއި، ހަށިގަނޑު ބަލިކަށިވުން ނުވަތަ މެލްނިއުޓްރިޝަންގެ މިންވަރު މަތިކޮށްފައިވާ ހާލަތެކެވެ.

މި ސަރަހައްދަށް މިހާރު ވަނީ އެއް އަހަރަށްވުރެ ގިނަ ދުވަހު ހަނގުރާމަ ކުރިމަތިވެފައެވެ. ރުވާންޑާގެ އެހީ ލިބޭ އެމް23 ހަނގުރާމަވެރިން މި އަހަރު ސައުތު ކިވޫ ޕްރޮވިންސަށް ހަމަލާދީފައިވާ އިރު، އެއީ ކުރިއަށްވުރެ ގިނަ ސަރަހައްދު އެ ހަނގުރާމަވެރިންގެ ބާރުގެ ދަށަށް ގެނެވުނު ހަމަލާތަކެކެވެ. ރުވާންޑާއިން ވަނީ ހަނގުރާމަވެރިންނަށް އެހީތެރިވާ ކަމަށް ދެކޮޅު ހަދާފައެވެ. ނަމަވެސް އެމް23 އާއި ކޮންގޯގެ ސިފައިންނަށް ވެސް އަނިޔާވެރި އަމަލުތައް ހިންގި ކަމަށް ވަނީ ތުހުމަތުކުރެވިފައެވެ.

މީގެ ކުރިން ޑަބްލިޔު.އެފް.ޕީ އިން ކޮންމެ މަހަކު ގާތްގަނޑަކަށް އެއް މިލިއަން މީހުންނަށް ކާނާގެ އެހީ ދިނެވެ. ނަމަވެސް ފަންޑު މަދުވުމުގެ ސަބަބުން މިހާރު މި އަދަދު ވަނީ ކޮންމެ މަހަކު 600,000 މީހުންނަށް މަދުކުރެވިފައެވެ. " މަހަކު 600,000 މީހުންނަށް އެހީ ދެމުންދާނަމަ، ފެބްރުއަރީ، މާރިޗް މަހުގެ ނިޔަލަށް އެހީ ދިނުން މުޅިން ހުއްޓާލަން ޖެހިދާނެ. ހާލަތު މިހާ ނާޒުކުކޮށް މިވަނީ." ޖޯންސް ވިދާޅުވިއެވެ.

ފާއިތުވި އަހަރުތަކުގައި ޑަބްލިޔު.އެފް.ޕީ އަށް 600 މިލިއަން ޑޮލަރާ ހަމައަށް ފަންޑު ލިބިފައިވާއިރު، 2024 ވަނަ އަހަރު ލިބުނީ ގާތްގަނޑަކަށް 380 މިލިއަން ޑޮލަރެވެ. ޑަބްލިޔު.އެފް.ޕީ ހިމެނޭހެން އ.ދ. ގެ އެޖެންސީތަކަށް، އެމެރިކާއިން ބޭރުގެ އެހީތައް ބޮޑުތަނުން ކަނޑާލުމުގެ އިތުރުން، ޔޫރަޕުގެ ބޮޑެތި ގައުމުތަކުން ވެސް ދިފާއީ ހަރަދުތައް އިތުރުކުރުމަށްޓަކައި ބޭރުގެ އެހީތެރިކަމަށް ދޭ ފައިސާ މަދުކުރުމުގެ ސަބަބުން ވަނީ އަސަރުކޮށްފައެވެ.