މިސަރުކާރުން މިހާތަނަށް މަސްވެރިންނަށް އެއް ބިލިއަނަށްވުރެ ގިނަ ރުފިޔާ ދޫކޮށްފި: ވަޒީރު ޝިޔާމް

މިސަރުކާރުން މިހާތަނަށް މަސްވެރިންނަށް އެއް ބިލިއަނަށްވުރެ ގިނަ ރުފިޔާ ދޫކޮށްފައިވާކަމަށް މަސްވެރިކަމާ ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ. 

ވަޒީރު ޝިޔާމް މިހްނެ ވިދާޅުވީ މިއަދު ރައީސް އޮފީހުގައި ކުރިއަށް ދިޔަ ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުންނެވެ. 

ވަޒީރު ޝިޔާމް ވިދާޅުވީ ރައީސް ޑރ މުޙައްމަދު މުޢިއްޒު ވެރިކަމާއި ހަވާލުއިރު، މަސްވެރިންނަށް ދޭން ޖެހޭ ވަރަށް ގިނަ ފައިސާ ނުދެއްކި ހުރި ކަމަށެވެ. އަދި މިދިޔަ ސަރުކާރުން ރިޔާސީ އިންތިޚާބުގެ ފުރަތަމަ ބުރު ނިމި، ދެވަނަ ބުރާއި ދޭތެރޭގައި މަސްވެރިން އަތުން މިފްކޯއިން މަސް ގަންނަމުން ދިޔައީ 17 ރުފިޔާއަށް ކަމަށާއި ނަމަވެސް އެ މުއްދަތުގައި އެ އަގު 25 ރުފިޔާއަށް ޖެއްސި ކަމަށެވެ. 

ވަޒީރު ޝިޔާމް ވިދާޅުވީ، އެކަމުގެ ސަބަބުން ގިނަ ގޮންޖެހުންތަކެއް ކުރިމަތިވި ކަމަށާއި އެއީ އެއްވެސްވަރަކަށް ދިރާސާ ކުރުމެއް، ބެލުމެއް ނެތި ސިޔާސީ ބޭނުމަށް ކޮށްފައިވާ ކަމެއް ކަމަށެވެ. 

ޝިޔާމް ވިދާޅުވީ މިއީ ދައުރެއް ނިމިގެން އިންތިޚާބެއް ތެރޭގައި ހިނގަމުން ދިޔަ ކަމެއްގެ ވާހަކަ ކަމަށާއި، އެއީ ކޮން ނިޔަތެއްގައި ކުރި ކަމެއް ކަން ވަރަށް ސާފު ކަމަށެވެ. 

ވަޒީރު ވިދާޅުވީ، މަސްވެރިން އަތުން މަސް ގަންނަ އަގު ބޮޑު ކުރުމުގެ ސަބަބުން އެންމެ ބޮޑު އުނދަގުލަކަށްވީ، ކުރީ ސަރުކާރުގެ ވެރިކަން ނިމުނުއިރު ވެސް މަސްވެރިންނަށް ދޭން ޖެހޭ ފައިސާ ނުދެވި އޮތުން ކަމަށެވެ. އަދި ރައީސް މުޢިއްޒު ވެރިކަމަށް ވަޑައިގެން އެންމެ އިސްކަމެއް ދެއްވި އެއް ކަމަކީ އެ ފައިސާ މަސްވެރިންނަށް ދިނުން ކަމަށްވެސް ވަޒީރު ވިދާޅުވިއެވެ.

އެ މަސައްކަތުގެ ތެރެއިން 17 ނޮވެމްބަރު 2023 އިން ފެށިގެން 27 އޮކްޓޯބަރު 2024 އާއި ހަމައަށް 1،042،060،897 ރުފިޔާ މަސްވެރިންނަށް މިސަރުކާރުން ދީފައިވާ ކަމަށް ވަޒީރު ޝިޔާމް ވަނީ ވިދާޅުވެފައެވެ.