ފަރުމަހުގެ މަސްވެރިކަން ކުރާ 37 ފަރާތަކަށް ލޯނު ފައިސާ ދޫކޮށްފައިވާނެ: ވަޒީރު ޝިޔާމް

މިސަރުކާރުން މިހާތަނަށް ފަރުމަސްވެރިކަން ކުރާ 37 ފަރާތަކަށް ލޯނު ފައިސާ ދޫކޮށްފައިވާނެ ކަމަށް މަސްވެރިކަމާ ކަނޑުތަކުގެ ވަޞީލަތްތަކާ ބެހޭ ވަޒީރު އަޙުމަދު ޝިޔާމް ވިދާޅުވެއްޖެއެވެ. 

ވަޒީރު ޝިޔާމް މިހެން ވިދާޅުވީ މިއަދު ރައީސް އޮފީހުގައި ނޫސްވެރިންގެ ބައްދަލުވުމުގައި ވާހަކަ ދައްކަވަމުންނެވެ.

 ޝިޔާމް ވިދާޅުވީ، ފަރުމަސްވެރިކަމަކީ ވަރަށް ބޮޑު ސިނާޢަތެއް ކަމަށާއި ވަރަށް ގިނަ އާއިލާތަކުން ފަރުމަސްވެރިކަމުން ލިބޭ އާމްދަނީ ދިރިއުޅުމުގެ ކަންކަން ފަރުޖައްސަމުން އަންނަ ކަމަށެވެ. އަދި މިއީ ވަރަށް ބޮޑު މާކެޓެއް ވެސް އޮތް ސިނާޢަތެއް ކަމަށް ވަޒީރު ވިދާޅުވިއެވެ.

ރިސޯޓު މާކެޓަކީ ވެސް ފަރުމަސްވެރިކަން ކުރާ ފަރާތްތަކަށް އޮތް މާކެޓެއް. މިއީ ތަރައްގީވާން ޖެހޭ ސިނާޢަތެއް،، މިކަމުގައި ހުންނަ ގޮންޖެހުންތަކާއި އެބޭފުޅުންގެ ޝަކުވާތައް ހައްލުވާން ޖެހޭނެ، އެކަމަކު އެއްވެސް ސަރުކާރުން އެފަރާތްތަކަށް އިޖާބައެއް ނުދޭ 

ވަޒީރު ޝިޔާމް ވިދާޅުވިއެވެ.

ފަރުމަސްވެރިކަން ކުރާ ފަރާތްތަކަށް ލުއިލޯނު ފޯރުކޮށްދިނުމުގެ ސިޔާސަތެއް ރައީސް، ޑރ މުޙައްމަދު މުޢިއްޒު ގެންގުޅުއްވި ކަމަށާއި އެއާއި އެކީ އެކަމަށް އެދި ހުށަހެޅުމުގެ ފުރުސަތު ވެސް ހުޅުވާލެވުނު ކަމަށެވެ.

އެހުޅުވާލުމާއެކު މިދިޔަ ފެބްރުވަރީ މަހުގެ 16 ވަނަ ދުވަހު ފަރުމަހުގެ މަސްވެރިކަން ކުރާ ފަރާތްތައް އިތުރު ކުރުމުގެ ގޮތުން 30 މިލިއަން ރުފިޔާގެ ލޯނު ފުރުޞަތެއް ހުޅުވާލެވުނު ކަމަށެވެ.

 މި ލޯނަކީ އެއްވެސް ރަހުނަކާ ނުލައި، 10 އަހަރަށް ބަހާލައިގެން ދެއްކޭ ގޮތަށް ދޫކުރާ ލޯނެއް ކަމަށް ވަޒީރު ޝިޔާމް ވިދާޅުވިއެވެ.

ވަޒީރު ވިދާޅުވީ، އެ ފުރުޞަތު ހުޅުވާލާފައިވަނީ ފަރުމަހުގެ މަސްވެރިކަން ކުރަން ޝައުޤުވެރިކަން ހުންނަ ފަރާތްތަކަށް އެ ސިނާޢަތުގައި ބޭނުންވާ ތަކެތި ހޯދައި، އެމަސައްކަތް ފެށުމުގެ ގޮތުން ކަމަށެވެ. ލޯނަށް ހުޅުވާލެވުނު ވަގުތު 121 އެޕްލިކޭޝަނެއް ލިބުނު ކަމަށާއި އޭގެ ތެރެއިން 62 ފަރާތެއްގެ ލޯނު އެޕްރޫވްކޮށް، މިހާތަނަށް 37 ފަރާތަކަށް ފައިސާ ދޫކުރެވިފައިވާ ކަމަށް ވަޒީރު ވަނީ ވިދާޅުވިއެވެ.