ޞިއްޙީ ހޭލުންތެރިކަން އިތުރުކުރުމަށް "ހެލްތު އެކްސްޕޯ 2024" މާދަމާ ފަށަނީ

ޞިއްޙީ ގޮތުން ދުޅަހެޔޮ އާދަތަކަށް ހޭލުންތެރިކުރުމާއި ގުޅޭ މަޢުލޫމާތު ދިނުމަށް އަމާޒުކޮށްގެން ބާއްވާ "ހެލްތު އެކްސްޕޯ 2024" މާދަމާ ފެށުމަށް ވަނީ ތައްޔާރުވެފައެވެ. މި އެކްސްޕޯގައި 50 އަށްވުރެ ގިނަ ބައިވެރިން ސްޓޯލް ބަހައްޓައިގެން ބައިވެރިވާނެ ކަމަށް ބާއްވާ ފަރާތުން މަޢުލޫމާތު ދީފައިވެއެވެ.

ހުޅުމާލޭ ސެންޓްރަލް ޕާކުގައި ދެ ދުވަހުގެ މުއްދަތަށް ކުރިއަށްގެންދާ މި އެކްސްޕޯ ފެށޭނީ މިއަންނަ ބުރާސްފަތި ދުވަހުގެ ރޭ 8:00 ގައެވެ. އެކްސްޕޯ ނިމޭނީ ހުކުރު ދުވަހުގެ ރޭ 11:00 ގައެވެ. ބުރާސްފަތި ދުވަހު އެކްސްޕޯ ހުޅުވިފައި ހުންނާނީ ރޭގަނޑު 8:00 އިން 11:00 އަށެވެ. އަދި ހުކުރު ދުވަހު ހަވީރު 4:00 އިން ފެށިގެން ރޭގަނޑު 11:00 އާ ހަމައަށް އެކްސްޕޯ ކުރިއަށްދާނެއެވެ.

މި އެކްސްޕޯގެ މައިގަނޑު މަޤްޞަދަކީ ދުޅަހެޔޮ މުޖުތަމަޢެއް ބިނާކުރުމަށް ކުރަމުންދާ މަސައްކަތްތަކާއި، ޞިއްޙީ ގޮތުން ދުޅަހެޔޮ އާދަތަކަށް ހޭލުންތެރިކޮށް މަޢުލޫމާތު ދިނުމެވެ. މި އެކްސްޕޯގެ މައި ސްޕޮންސަރަކީ ދިރާގެވެ.

މިނިސްޓްރީ އޮފް ހެލްތުގެ އިތުރުން ހޮސްޕިޓަލްތަކާއި، ޞިއްޙީ ޚިދުމަތްދޭ ތަންތަނުގެ އިތުރުން މަދަނީ ޖަމްޢިއްޔާތަކާއި އަމިއްލަ ފަރާތްތަކުން މި އެކްސްޕޯގައި ބައިވެރިވެ މަޢުލޫމާތު ދޭނެއެވެ.

ކުޑަކުދިންނަށް ވެސް ބައިވެރިވެވޭ ގޮތަށް ރޭވިފައިވާ މި އެކްސްޕޯގައި ކުޑަކުދިންގެ ހެލްތު ޗެކަޕް، މިންހެޔޮ ކާނާއާ ގުޅޭ މަޢުލޫމާތު، ހެދިބޮޑުވުމާ ގުޅޭ މަޢުލޫމާތު، ވެކްސިނޭޝަން އަދި އެހެނިހެން ޞިއްޙީ މަޢުލޫމާތު ފޯރުކޮށްދެވޭނެއެވެ.

މީގެ އިތުރުން، ޞިއްޙީ ދާއިރާއިން މަތީ ތަޢުލީމު ޙާޞިލުކުރަން ބޭނުންވާ ފަރާތްތަކަށް ހުރި ފުރުޞަތުތަކުގެ މަޢުލޫމާތު ފޯރުކޮށްދިނުމާއި މުނިފޫހިފިލުވުމުގެ ގިނަ ހަރަކާތްތައް ވެސް މި އެކްސްޕޯގައި ހިމެނޭނެއެވެ.

ޞިއްޙަތާ ގުޅޭ މުހިންމު މަޢުލޫމާތު އެއްތަނަކުން ލިބޭ މި ފުރުޞަތުގެ ބޭނުން ހިފުމަށް ގިނަ ބައެއްގެ ޝައުޤުވެރިކަން ހުރި ކަމަށް ބެލެވެއެވެ.