"ފަހިރާސްތާ" ޕްރޮގްރާމް ލ. އަތޮޅުގައި ފަށައިފި

ލ. އަތޮޅުގެ ރަށްތަކުގައި މަގު ބޭނުންކުރާ ފަރާތްތައް އެއްގަމު ދަތުރުފަތުރުގެ ގާނޫނާއި ގަވާއިދުތަކަށް އަހުލުވެރިކުރުވުމަށާއި، މަގުމަތީގެ ސަލާމަތާއި ރައްކާތެރިކަން ކަށަވަރުކުރުމަށް ކުރިއަށްގެންދާ "ފަހިރާސްތާ" ޕްރޮގްރާމް ފަށައިފިއެވެ. މި ޕްރޮގްރާމް ކުރިއަށްދަނީ މި މަހުގެ 3 ވަނަ ދުވަހުން ފެށިގެން 7 ވަނަ ދުވަހުގެ ނިޔަލަށެވެ.

ޓްރެފިކް ޕޮލިސް އެންޑް ރޯޑް ޕޮލިސް މެނޭޖްމަންޓް އާއި ލ. އަތޮޅު ޕޮލިސް ގުޅިގެން ކުރިއަށްގެންދާ މި ޕްރޮގްރާމުގައި މާމެންދޫ، ކުނަހަންދޫ އަދި ހިތަދޫގެ އިތުރުން ލ. އަތޮޅުގެ ގުޅިފައިވާ ރަށްރަށް ހިމެނެއެވެ. މި ރަށްރަށުގައި ވަކިވަކިން ކުރިއަށްގެންދެވުނު ސެޝަންތަކުގައި ސްކޫލު ދަރިވަރުންނަށާއި، ބެލެނިވެރިންނަށް އަދި މުއައްސަސާތަކުގެ މުވައްޒަފުންނަށް މަޢުލޫމާތު ދެވުނެވެ.

ޕްރޮގްރާމުގައި އެއްގަމު ދަތުރުފަތުރުގެ ގާނޫނަށް އަހުލުވެރިކުރުވުމާއި، މަގުމަތީގެ ސަލާމަތާއި ރައްކާތެރިކަމަށް ކުރެވޭނެ ކަންކަމުގެ މަޢުލޫމާތު ހިއްސާކުރެވުނެވެ. އަދި މަގުމަތީގައި ހަރަކާތްތެރިވާއިރު ތިމާއާއި އަނެކުންގެ ސަލާމަތަށް ވިސްނުމުގެ މުހިންމުކަމާއި، އެކްސިޑެންޓުތައް މަދުކުރުމާ ގުޅޭ މަޢުލޫމާތުވެސް ދެވުނެވެ.

ސްކޫލު ދަރިވަރުންނަށް ޚާއްޞަކޮށްގެން ބޭއްވުނު ސެޝަންތަކުގައި މަގުމަތީގައި އުޅޭއިރު ސަމާލުކަންދޭންޖެހޭ ކަންކަމާއި، ޓްރެފިކް ނިޝާންތަކުގެ މާނަ ކުދިންގެ އުމުރާ ގުޅޭގޮތަށް ކިޔައިދެވުނެވެ. އަދި ޓްރެފިކް މޮނިޓަރުންގެ އެންގުންތަކަށް ތަބާވުމުގެ މުހިންމުކަން ވަނީ އޮޅުންފިލުވައިދީފައެވެ.

މި ޕްރޮގްރާމުގެ ތެރެއިން 300 އަށްވުރެ ގިނަ ދަރިވަރުންނާއި، ގިނަ އަދަދެއްގެ ރައްޔިތުންނަށާއި މުއައްސަސާތަކުގެ މުވައްޒަފުންނަށް މަޢުލޫމާތު ދެވިފައިވާކަމަށް ފުލުހުން މަޢުލޫމާތު ދެއެވެ. މި ޕްރޮގްރާމަކީ މަގުމަތީގެ ސަލާމަތާއި ރައްކާތެރިކަން އިތުރުކުރުމަށް ފުލުހުން ކުރަމުންދާ މަސައްކަތުގެ ބައެއްކަމަށް ބެލެވެއެވެ.