ޢަރަބިއްޔާގެ ޢިމާރާތުގެ މަސައްކަތް ލަސްވަނީ މަޝްރޫޢަށް ހޭދަކުރަންޖެހޭ ފައިސާ އިތުރުވުމުން: ވަޒީރު ޢިސްމާޢީލް ޝަފީޢު

އަލްމަދްރަސަތުލް ޢަރަބިއްޔަތުލް އިސްލާމީއްޔާގެ އައު ޢިމާރާތުގެ މަސައްކަތް ލަސްވަނީ މަޝްރޫޢަށް ހޭދަކުރަންޖެހޭ ފައިސާ އިތުރުވުމުން ކަަމަށް ތަޢުލީމީ ވަޒީރު ޑރ އިސްމާޢިލް ޝަފީޢު ވިދާޅުވެއްޖެއެވެ. 

އެމަނިކުފާނު މިހެން ވިދާޅުވީ މިއަދު ރައްޔިތުންގެ މަޖިލީހުގެ ޖަލްސާގައި ހިތަދޫ ދެކުނު ދާއިރާގެ މެމްބަރު އިބްރާހިމް ނާޒިލް ކުރެއްވެވި ސުވާލަކަށް ޖަވާބުދެއްވަމުންނެވެ.

މެމްބަރު ނާޒިލް ކުރެއްވެވި ސުވާލަށް ޖަވާބުދެއްވަމުން ވަޒީރު އިސްމާއިލް ޝަފީޢު ވިދާޅުވީ މިސަރުކާރުގެ ވެރިކަމަށް ފެށުނުއިރު ޢަރަބިއްޔާގެ އައު ޢިމާރާތް އެޅުމަށް ނިންމާފައިއޮތީ ބާ ޖަމާލުއްދީންގެ ޢިމާރާތުގައި ކަމަށެވެ. 

އެހެންނަމަވެސް، ރަޢިސުލްޖުމްހޫރިއްޔާ ޑރ މުޙައްމަދު މުޢިއްޒު ވަނީ، ޢަރަބިއްޔާގެ ބެލެނިވެރިންގެ އެދުމާއެކު މާލޭގެ ތަނަވަސް ސަރަހައްދަކުން، އެ ސުކޫލުގެ އިމާރަތް އެޅުމަށް ބިމެއް ހަމަޖައްސަވާފައި ކަމަށެވެ.

މިއާއެކު ވަޒީރު ވިދާޅުވީ، އެ މަޝްރޫޢުގެ ސްކޯޕަށް އައި ބަދަލާއެކު، ޒަމާނީ ވަސީލަތްތަކާއެކު ޢަރަބިއްޔާގެ އާ ޢިމާރާތް އެޅުމާ ގުޅޭގޮތުން ކޮންޓްރެކްޓަރާއެކު މަޝްވަރާކުރެވި އަގުތަކެއް އެ ފަރާތުން ހުށަހެޅި ކަމަށެވެ. އެހެން ނަމަވެސް، ހުށަހެޅި އަގުތައް މާބޮޑުވެފައިވާ ކަމަށް ވަޒީރު އިސްމާޢިލް ޝަފީޢު ވިދާޅުވިއެވެ.

“ސުކޫލެއް އެޅުމުގެ ނިޔަތުގައި އަޅުގަނޑުމެން މަސައްކަތް ކުރީ ފުރަތަމަ 100 ދުވަހުގެ ތެރޭގައި މަސައްކަތް ފެށުމަށް، ނަމަވެސް، ފެއްޓުމަށް ކުރި މަސައްކަތުން އަޅުގަނޑުމެންނަށް ޤަބޫލުކުރެވުނީ، ގާތްގަނޑަކަށް ރައްޔިތުންގެ ފައިސާއިން 80 އެތައް މިލިއަން ރުފިޔާ އަގުބޮޑުކޮށްކަން އެކަން ކުރަންޖެހެނީ” ތަޢުލީމީ ވަޒީރު އިސްމާޢިލް ޝަފީޢު ވިދާޅުވިއެވެ.

ވަޒީރު އިތުރަށް ވިދާޅުވީ، އެ 80 މިލިއަން އިތުރަށް ޚަރަދުކޮށްގެން ކުރިއަށް ގެންދިޔަ ނަމަ، ޕްލޭނާއި އެއްގޮތަށް މަސައްކަތް ކުރިއަށް ދިޔައީސް ކަމަށެވެ. އެހެން ނަމަވެސް، ރައްޔޮތުންގެ ފައިސާއަކީ އަގުބޮޑު އެއްޗެއް ކަމަށެވެ.

އަދި މިވަގުތު ޢަރަބިއްޔާގެ ދަރިވަރުން ކިޔަވަމުންދާ ދަރުމަވަންތަ ޢިމާރާތުގައި އިންސާނީ ހައްޤުތަކާއި ތަޢުލީމީ ގޮތުން މާބޮޑު ގެއްލުމެއް ނެތް ކަމަށާއި، ބެލެނިވެރިންނާއި ޕީޓީއޭއާވެސް މިކަން ހިއްސާކޮށްފައިވާ ކަމަށް ވަޒީރު ވިދާޅުވިއެވެ.

ވަޒީރު ޝަފީޢު ވިދާޅުވީ ޢިމާތުގެ މަސައްކަތް ލަސްވެެފައިވަނީ ރައްޔިތުންގެ 80 މިލިއަން ސަލާމަތްކުރުމަށް ކަމަށެވެ. އަދި އެމަނިކުފާނު ޤަބޫލު ފުޅު  ކުރަައްވަނީ އެއީ ރަނގަޅު އެދެވިގެންވާ ލަސްކުރުމެއް ކަމަށާއި، އެ ސުކޫލުގެ އިސް ބެލެނިވެރިންނާއި ޕީޓީއޭއާވެސް މިކަން ހިއްސާކޮށްފައިވާނެ ކަމަށް އެމަނިކުފާނު ވިދާޅުވިއެވެ.

ކުރީގެ ރައީސް އިބްރާހީމް މުޙައްމަދު ޞާލިޙްގެ ސަރުކާރުން ޢަރަބިއްޔާގެ އާ ޢިމާރާތް އެޅުމަށް ނިންމާފައި އޮތީ ބާޖަމާލުއްދީން ސްކޫލު ހިންގި ބިމުގައެވެ. އެގޮތުން 2022 ވަނަ އަހަރުގެ ސެޕްޓެމްބަރު މަހު އަމީން ކޮންސްޓްރަކްޝަނާ މަސައްކަތް ހަވާލުކުރެވުނެވެ. ނަމަވެސް ވެރިކަން ނިމިގެން ދިޔައިރުވެއް ޢިމާރާތުގެ ޢަމަލީ މަސައްކަތް ފެށިގެން ގޮސްފައެއްނުވެއެވެ.