22 އަހަރަށްފަހު ބަނގުލަދޭޝްއިން ސަރަޙައްދީ ގަދަބާރު އިންޑިއާ ބަލިކޮށްފި

22 އަހަރަށްފަހު ބަނގުލަދޭޝްއިން ދެކުނު އޭޝިއާ ސަރަޙައްދުގެ ފުޓުބޯޅައިގެ ގަދަބާރު، އިންޑިއާ ބަލިކޮށްފިއެވެ.

ބަނގުލަދޭޝްގެ ޑާކާ ނެޝަނަލް ސްޓޭޑިއަމްގައި އަންގާރަ ދުވަހުގެރޭ ކުޅުނު، އޭއެފްސީ އޭޝިއަން ކަޕް 2027 ކޮލިފައިން މެޗުގައި އިންޑިއާގެ މައްޗަށް ބަނގުލަދޭޝް ކުރި ހޯދީ 1-0އިންނެވެ. 

މި މެޗު ކާމިޔާބުކުރި ނަމަވެސް، ކޮލިފިކޭޝަން ބުރުން ސަލާމަތްވުމުގެ އެއްވެސް ފުރުސަތެއް ދެ ޓީމުގެ ތެރެއިން އެއްވެސް ޓީމަކަށް ނެތެވެ. އެހެންނަމަވެސް ބަނގުލަދޭޝްއަށް މިއީ އެއަށްވުރެ ބޮޑު އުފަލެކެވެ. އިންޑިއާ ބަލިކުރެވުމަކީ ކޮލިފައިވުމަށް ވުރެ ބޮޑު ހިންހަމަޖެހުމެއްކަން އެ ޓީމުގެ ކުޅުންތެރިންނާއި، އޮފިޝަލުންނާއި އަދި ދަނޑަށް ކުޅިބަލަން ވަދެތިބި މީހުންގެ ޝުޢޫރުތައް ބުނެދިނެވެ.

INDIAN FOOTBALL IS TOTALLY DONE 😡

- Lost to Bangladesh for first time in 22 Years
- India couldn't even make into Asia Cup (24 Teams)
- India (136) couldn't even win a single game against any lower ranked sides in the Third Round

Absolutely Disappointed pic.twitter.com/GyquiiuTDK

— The Khel India (@TheKhelIndia) November 18, 2025

ބަނގުލަދޭޝްއިން މެޗުގެ ހަމައެކަނި ގޯލު ކާމިޔާބުކުރީ މެޗުގެ ފުރަތަމަ ހާފުގައެވެ. އެއީ އެ ޓީމު އުފެއްދި ކައުންޓަރ އެޓޭކެއްގައި، މެޗުގެ 12ވަނަ މިނެޓުގައި ޝެއިޚް މޮރްސަލިންއެވެ.

މެޗުގެ ނަތީޖާ ބަދަލުކުރުމަށް އިންޑިއާއިން ވަނީ ދެވަނަ ހާފުގައި ގިނަ މަސައްކަތްތަކެއް ކޮށްފައެވެ. ނަމަވެސް އެ ޓީމުން ބަނގުލަދޭޝްގެ ގޯލަށް އަމާޒުކޮށް ފޮނުވާލި ހަމަލާތައް ދިފާއުކުރުމަށް ގޯލްކިޕަރާއި ޑިފެންޑަރުން ވަނީ މޮޅު ކުޅުމެއްދައްކާފައެވެ.

މިއީ ކޮލިފިކޭޝަން ބުރުގައި ކުޅުނު 5 މެޗުން ބަނގުލަދޭޝްއަށް ލިބުނު ފުރަތަމަ މޮޅެވެ. މި ދެ ޓީމު އިންޑިއާގައި ކުޅުނު މެޗު ނިމުނީ 0-0އިން އެއްވަރުވެގެނެވެ. މި ބުރުގައި އިންޑިއާއަށް އަދި އެއްވެސް މެޗަކުން މޮޅުވެފައެއް ނުވެއެވެ.

މި ގްރޫޕްގެ އެއްވަނައިގައި މިހާރު އޮތީ، އަންގާރަ ދުވަހު 2-1އިން ހޮންގް ކޮންގް ބަލިކުރި ސިންގަޕޫރެވެ. އެގޮތުން ސިންގަޕޫރަށް 11 ޕޮއިންޓު ލިބިފައިވާއިރު، ހޮންގް ކޮންގްއަށް ލިބިފައި ވަނީ 8 ޕޮއިންޓެވެ.