ޕްރައިވެޓް އިންޝިއުރެންސް ތަކުން އަލުން ކޭޝްލެސް ޚިދުމަތް ފަށައިފި!

ޕްރައިވެޓް އިންޝިއުރެންސް ކުންފުނިތަކުން އަލުން ކޭޝްލެސް ޚިދުމަތް ދޭން ފަށައިފިއެވެ. 

ޕްރައިވެޓް އިންޝިއުރެންސް ކުންފުނިތަކުން ކޭޝްލެސް ޚިދުމަތް ހުއްޓާލުމަށް ނިންމީ ޕްރައިވެޓް އިންޝުއަރެންސެއް އޮންނަ މީހުންނަށް އެ އިންޝުއަރެންސްގެ ލިމިޓް ހަމަވުމުން ނޫނީ އާސަންދަ ނުދޭން ނިންމުމާ އެކުއެވެ.

މި ޚިދުމަތް އަލުން ފަށައިފައިވަނީ ކޭޝްލެސް ޚިދުމަތް ހުއްޓާލި ތިން ކުންފުންޏަކުންނެވެ. 

އާސަންދަ ރިފޯމްކުރަން ފަށައި، އެ ސްކީމަށް ގެނައި ބަދަލުގެ ދަށުން ޕްރައިވެޓް އިންޝުއަރެންސެއް އޮތް ނަމަ، އޭގެ ލިމިޓް ހަމަވުމުން ނޫން ގޮތަކަށް އާސަންދަ ދޫނުކުރަން ސިއްހީ ހިދުމަތްދޭ ތަންތަނަށް އަންގައި އެގޮތަށް ޢަމަލުކުރަން ފެށީ މިދިޔަ ހުކުރު ދުވަހުން ފެށިގެންނެވެ.

އެ ނިންމުމާ އެކު، ޖެހިގެން އައި ދުވަހު ބައެއް ތަންތަނުން ކޭޝްލެސް ޚިދުމަތް ވަނީ ހުއްޓާލައިފައެވެ. އެކަމާ ގުޅިގެން ޚިދުމަތް ހޯދާ ޢާންމުންގެ އަތުން ފައިސާ ދައްކަން ޖެހުމުން ޝަކުވާ ވަރަށް ބޮޑުވެގެން ދިޔައެވެ. އަދި މިޝަކުވާތަކާއި ގުޅިގެން، ސަރުކާރުގެ އިންޝުއަރެންސް ކުންފުނި، އެލައިޑުން ވަނީ ކޭޝްލެސް ޚިދުމަތް އަލުން ފަށައިފަ އެވެ.

އެކުންފުނީގެ އިތުރުން ޚިދުމަތް މެދުކަނޑާލި، އަމާނާ ތަކާފުލް އާއި ސޮލަރެލް އިން ވެސް މި ހަފުތާގައި ވަނީ އަލުން ޚިދުމަތް ފަށައިފަ އެވެ.

ކޭޝްލެސް ޚިދުމަތް މެދުކަނޑާލުމުން އެ ފައިސާ އަނބުރާ ލިބޭނީ، ފަރުވާ ހޯދަން ހޭދަކުރި ބިލު، އެ މީހެއްގެ އަމިއްލައަށް އިންޝުއަރެންސް ކުންފުންޏަށް ހުށަހެޅުމުންނެވެެ.

އިންޝުއަރެންސް ކުންފުނިތަކުން ކޭޝްލެސް ޚިދުމަތް މެދުކަނޑާލުމުން އައި ކަންބޮޑުވުންތަކާ އެކު އެންސްޕާ އިން ވަނީ ބަޔާނެއް ނެރެފައެވެ. އެ ބަޔާނުގައި ބުނެފައިވަނީ ޞިއްޙީ ޚިދުމަތްތަކަށް އަމިއްލަ އަށް ފައިސާ ދައްކަން ޖެހޭ ކޮންމެ ޙާލަތެއްގައި އާސަންދަ ލިބޭނެ ކަމަށެވެ.