ޚަބަރު
ވޭޕް މަނާކޮށް، ދުންފަތް ގަނެވޭ އުމުރު މަތިކުރުމުގެ ބިލް މަޖިލީހުގެ ކޮމިޓީން ފާސްކޮށްފި!

ސިނގިރޭޓުގެ ބަދަލުގައި ގިނަ ބަޔަކު ބޭނުންކުރަމުންދާ ވޭޕް.
ވޭޕް މަނާކޮށް، ދުންފަތް ގަނެވޭ އުމުރު މަތިކުރުމުގެ ބިލް ރައްޔިތުންގެ މަޖިލީހުގެ އިޖްތިމާޢީ ކޮމޮޓީއިން ފާސްކޮށްފިއެވެ.
މި ބިލަކީ މި މަހުގެ 15 ވަނަ ދުވަހުން ފެށިގެން ރާއްޖޭގައި ވޭޕް ބޭނުން ކުރުން މަނާކޮށް އަދި ދުންފަތުގެ ވިޔަފާރި ކުރެވޭނެ އެންމެ ހަގު އުމުރަކީ 21 އަހަރު ކަމަށް ކަނޑައެޅުމަށް ދުންފަތް ކޮންޓްރޯލް ކުރުމާ ބެހޭ ޤާނޫނަށް ހުށަހެޅި އިސްލާޙުގެ ބިލެވެ.
ސަރުކާރުގެ ފަރާތުން މިބިލް މަޖިލީހަށް ހުށައަޅައިދެއްވައިފައިވަނީ، ހެންވޭރު އުތުރު ދާއިރާގެ މެންބަރު އަޙުމަދު އައިފާނެވެ.
އެ ބިލުގައިވާ މަހުގެ 15 ވަނަ ދުވަހުން ފެށިގެން ރާއްޖެއަށް ވޭޕް އެތެރެ ކުރުން މަނާވާއިރު، ޑިސެންބަރު 15 ވަނަ ދުވަހުގެ ފަހުން ވޭޕް ބޭނުން ކުރުމާއި ވިއްކުން ވެސް މަނާވާނެ އެވެ.
މިކަމާ ޚިލާފުވާނަމަ އެ އިސްލާޙުގައި ބޮޑެތި ޖޫރިމަނާތަކެއް ވަނީ ހިމަނައިފަ އެވެ. އެގޮތުން، ވޭޕް ކުރުމަށް ބޭނުން ކުރާ އާލާތްތަކާއި އެކަމަށް ތައްޔާރު ކޮށްފައިވާ އުފެއްދުންތައް އެތެރެކޮށްފި ނަމަ، 50،000ރ އަދި އެތެރެކުރާ ކޮންމެ އިލެކްޓްރޯނިކް ސިނގިރޭޓް ނުވަތަ ވޭޕް އާލާތަކަށް 10،000ރގެ މަގުން ޖޫރިމަނާ ކުރެވޭނެ ކަމަށް ބިލުގައިވެ އެވެ.
އެފަދަ އާލާތެއް ނުވަތަ އުފެއްދުމެއް ވިއްކައިފި ނަމަ، 20،000ރ ޖޫރިމަނާއަކާއި ވިއްކި ކޮންމެ އެއްޗަކަށް 10،000ރ ގެ ޖޫރިމަނާއެއްގެ އިތުރުން ހިލޭ ބަހައިފި ނަމަ، 10،000ރ ގެ ޖޫރިމަނާ ކުރާނެ ކަމަށް ބިލުގައިވެ އެވެ.
އެފަދަ އެއްޗެއް ވިއްކީ ކުޑަކުއްޖަކަށް ނަމަ، އެ މީހެއްގެ ޖޫރިމަނާ 50،000ރ އަށް ބޮޑުވާނެ އެވެ.
މި ނިންމުންތައް ތަންފީޒުކުރަން ނިންމީ މި މަހުގެ 15 ވަނަ ދުވަހުގެ ފަހުން ނަމަވެސް، އިއްޔެ ބޭއްވި ކޮމިޓީ ބައްދަލުވުމުގައި މި ބިލް ދިރާސާކޮށް ނިންމުމަށް ކަނޑައެޅީ މި މަހުގެ 23 ވަނަ ދުވަހާ ހަމައަށެވެ. ނަމަވެސް، މިއަދުގެ ބައްދަލުވުމުގައި ދިރާސާކޮށް މި ބިލް ވަނީ ފާސްކޮށްފަ އެވެ.