ޚަބަރު
130 އަށްވުރެ ގިނަ ދަރިވަރުން ޓީޗަރުކަމަށް ޝައުގުވެރިވޭ : ޑރ.އިސްމާޢީލް ޝަފީޢު
ތަޢުލީމީ ވަޒީރު ޑރ.އިސްމާޢީލް ޝަފީޢު ފޮޓޯ:ރައީސް އޮފީސް
އަތޮޅުތަކުގެ ރަށްތަކުން މުދައްރިސުންގެ ގޮތުގައި ތަމްރީނުވުމަށް 130 އަށްވުރެ ގިނަ ދަރިވަރުން މިއަހަރު ޝައުގުވެރިވެފައިވާކަމަށް ތަޢުލީމީ ވަޒީރު ޑރ. އިސްމާޢީލް ޝަފީޢު ވިދާޅުވެއްޖެއެވެ.
މުދައްރިސުން ތަމްރީނުކުރުމުގެ ޤައުމީ ޕްރޮގްރާމް އިފްތިތާޙްކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން ވަޒީރު ވިދާޅުވީ، ޔުނިސެފްގެ އެހީތެރިކަމާއެކު މިއަހަރުގެ މާރިޗު މަހު ފެށި މި މަސައްކަތަކީ ކާމިޔާބު މަސައްކަތެއް ކަމަށެވެ. މި ޕްރޮގްރާމްގެ ދަށުން އަތޮޅު ތެރޭގެ 21 ރަށަކުން 130 އަށްވުރެ ގިނަ ދަރިވަރުން ޓީޗަރުކަމަށް ޝައުގުވެރިވާކަން ފާހަގަވެފައިވާ ކަމަށް ވަޒީރު ވިދާޅުވިއެވެ.
ރާއްޖޭގެ ތަޢުލީމީ ނިޒާމުގައި މިވަގުތު އޮތް މުދައްރިސުން މަދުވުމުގެ މައްސަލައަށް އަލިއަޅުއްވާލައްވަމުން ވަޒީރު ވިދާޅުވީ، މިވަގުތުވެސް ޕްރައިމަރީ ގްރޭޑްތަކަށް އެކަނިވެސް 250 ޓީޗަރުން މިހާރުން މިހާރަށް ބޭނުންވާ ކަމަށެވެ. އަދި މަތީ ގްރޭޑްތަކުގައިވެސް ވަރަށް ގިނަ މާއްދާތަކަށް ޓީޗަރުން މަދުވާ ކަމަށް ވަޒީރު ފާހަގަކުރެއްވިއެވެ.
ރައީސުލްޖުމްހޫރިއްޔާގެ މެނިފެސްޓޯގައި ވަރަށް ސާފުކޮށް ބަޔާންކޮށްފައި އެބައޮތް، ޓިޗަރުން ތަމްރީންކުރުމުގެ ޤައުމީ ޕްރޮގްރާމެއް ފައްޓާނެ ވާހަކަ. އެ ޕްރޮގްރާމް ފެއްޓުމުގެ އެންމެ ބޮޑު އެއްބޭނުމަކީ ދިވެހިރާއްޖޭގައި މުދައްރިސުން ލިބުން ދަތިވެފައިވުން. ވަރަށް ގިނަ މާއްދާތަކުން ޓީޗަރުން ލިބުންވަނީ ދަތިވެފައި
ވަޒީރު ވިދާޅުވިއެވެ.
މީގެއިތުރުން، އަމިއްލަ ރަށުގައި ތިބެގެން މަތީ ތަޢުލީމުގެ ފުރުސަތު ފަހިވުމަށް ދަރިވަރުންގެ އޮތް އުއްމީދު ޙަގީގަތަކަށް ހެއްދެވުމަށް ސަރުކާރުން މަސައްކަތްކުރައްވަމުންދާކަން ވަޒީރު ފާހަގަކުރެއްވިއެވެ. މިގޮތުން މޯލްޑިވްސް ކޮލިފިކޭޝަން އޮތޯރިޓީއާއި ވިލާ ކޮލެޖާ ގުޅިގެން ފަރުމާކޮށް ކުރިއަށްގެންދާ ޕްރޮގްރާމްގައި މިއަހަރު 140 އާ ގާތްކުރާ ޢަދަދަކަށް ދަރިވަރުން ބައިވެރިވެފައިވާ ކަމަށާއި، އަންނަ އަހަރު މި ޢަދަދު 150 އަށް އިތުރުވާނެ ކަމަށް އުއްމީދުކުރައްވާ ކަމަށް ވަޒީރު ވިދާޅުވިއެވެ.
