އިތުރު ތިން އަތޮޅެއްގެ ޔުޓިލިޓީ ޚިދުމަތް ސްޓެލްކޯއަށް ބަދަލުކޮށްފި

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ނިންމެވުމާ އެއްގޮތަށް، ރާއްޖޭގެ އިތުރު ތިން އަތޮޅެއްގެ ޔުޓިލިޓީ ޚިދުމަތްތައް ސްޓޭޓް އިލެކްޓްރިކް ކޮމްޕެނީ (ސްޓެލްކޯ) ގެ ދަށަށް ރަސްމީކޮށް ބަދަލުކޮށްފިއެވެ.

މި ފަހަރު ސްޓެލްކޯގެ ބެލުމުގެ ދަށަށް ބަދަލުކުރެވުނު ތިން އަތޮޅަކީ ފ. އަތޮޅު، ދ. އަތޮޅު އަދި ތ. އަތޮޅެވެ. މިއީ ސަރުކާރު ހިންގުމުގެ ޚަރަދުތައް ކުޑަކޮށް، ހަރުދަނާ އަދި އެއް ނިޒާމެއްގެ ދަށުން ކަރަންޓާއި ފެނާއި ނަރުދަމާގެ ޚިދުމަތްތައް ރައްޔިތުންނަށް ފޯރުކޮށްދިނުމަށްޓަކައި، ފެނަކަ ކޯޕަރޭޝަން އުވާލައި އެ ކުންފުނީގެ ދަށުން ދެމުންދިޔަ ޚިދުމަތްތައް ސްޓެލްކޯގެ ދަށަށް ބަދަލުކުރުމަށް ސަރުކާރުން ނިންމަވާފައިވާ ސިޔާސަތުގެ ދަށުން އެޅުނު ފިޔަވަޅެކެވެ.

މި ބަދަލާ ގުޅިގެން ސްޓެލްކޯއިން ހާމަކޮށްފައިވަނީ، މި ތިން އަތޮޅުގެ ޚިދުމަތްތައް އެ ކުންފުނީގެ ދަށަށް ބަދަލުވި ހިސާބުން ފެށިގެން، އެ ސަރަޙައްދުތަކުގައި ދެމުންދާ ޚިދުމަތްތަކުގެ ފެންވަރު އެ ކުންފުނީގެ މިންގަނޑުތަކަށް ފެއްތުމުގެ ގޮތުން ކުރަންޖެހޭ އެންމެހައި މަސައްކަތްތައް ފަށާފައިވާ ކަމަށެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ނިންމެވުމާ އެއްގޮތަށް، ފ،ދ އަދި ތ އަތޮޅުގެ ރަށްތަކުގައި ފެނަކައިން ފޯރުކޮށްދެމުންދިޔަ ޔުޓިލިޓީ ޚިދުމަތްތައް ދިނުމާ މި ކުންފުނިން މިހާރު ވަނީ ރަސްމީކޮށް ޙަވާލުވެ، ޚިދުމަތް ދޭން ފަށާފައި. މިގޮތުން، އެ އަތޮޅުތަކުގައި ދެމުންދާ ޚިދުމަތްތަކުގެ ފެންވަރު މި ކުންފުނީގެ މިންގަނޑުތަކަށް ފެއްތުމުގެ މަސައްކަތް، ޚިދުމަތާ ޙަވާލުވި ދުވަހުން ފެށިގެން ދަނީ ކުރެވެމުން. އަޅުގަނޑުމެންގެ އަމާޒަކީ މި ތިން އަތޮޅުގެ ރައްޔިތުންނަށް އިތުބާރުހުރި، ދެމެހެއްޓެނިވި ޚިދުމަތެއް ކަށަވަރުކޮށްދިނުން.

— STELCO (@STELCOMALDIVES) November 1, 2026

އަދި މި މަސައްކަތުގެ މައިގަނޑު އަމާޒަކީ އެ އަތޮޅުތަކުގެ ރައްޔިތުންނަށް އިތުބާރުހުރި، ފެންވަރު ރަނގަޅު އަދި ދެމެހެއްޓެނިވި ގޮތެއްގައި ޔުޓިލިޓީގެ ޚިދުމަތްތައް ކަށަވަރުކޮށްދިނުން ކަމަށް ވެސް އެ ކުންފުނިން ބަޔާންކުރެއެވެ.

ސަރުކާރުގެ އިޤްތިޞާދީ އަދި އިދާރީ އިޞްލާޙީ ފިޔަވަޅުތަކުގެ ތެރެއިން، ޚިދުމަތްތައް އެއްފުރާޅެއްގެ ދަށަށް ގެނައުމަށް ފަށާފައިވާ މި މަސައްކަތުގެ ސަބަބުން، ޔުޓިލިޓީ ޚިދުމަތްތަކުގެ ފެންވަރު މަތިވެ، ޚިދުމަތް ދިނުމުގައި ދިމާވާ ދަތިތަކަށް ދާއިމީ ޙައްލެއް ލިބިގެންދާނެ ކަމަށް ބެލެވެއެވެ.