މިޞްރު މެލޭރިއާއިން ސަލާމަތްވެއްޖެ: ދުނިޔޭގެ ޞިއްޙަތު ޖަމްޢިއްޔާ

މިޞްރަކީ މެލޭރިއާއިން ސަލާމަތްވެފައިވާ ޤައުމެއްކަމުގައި ދުނިޔޭގެ ޞިއްޙަތު ޖަމްޢިއްޔާ (ޑަބްލިޔުއެޗްއޯ) އިން ވަނީ އިޢުލާނުކޮށްފައެވެ. މިއީ "ތާރީޚީ" ކާމިޔާބީއެއް ކަމަށާއި، ގާތްގަނޑަކަށް އެއް ޤަރުނުގެ މަސައްކަތުގެ ނަތީޖާއެއް ކަމުގައި ޑަބްލިޔުއެޗްއޯ އިން ބުނެފައިވެއެވެ.

ޑަބްލިޔުއެޗްއޯގެ ވެރިޔާ ޓެޑްރޮސް އަދަނޮމް ގެބްރެއިސަސް ވިދާޅުވި ގޮތުގައި "މެލޭރިއާއަކީ މިޞްރުގެ ޤަދީމީ މަދަނިއްޔަތާ އެއްހާ ޒަމާންވީ ބައްޔެކެވެ. ނަމަވެސް ފިރުޢައުނުންނަށް ޖެހުނު މި ބަލި މިހާރު ވަނީ މިޞްރުގެ މާޒީގެ ބައެއްގެ ގޮތުގައި ވެފައެވެ. މުސްތަޤުބަލުގެ ބައެއްގެ ގޮތުގައެއް ނޫނެވެ."

މިހާތަނަށް ދުނިޔޭގެ 44 ޤައުމަކާއި އެއް ސަރަޙައްދެއް ވަނީ މެލޭރިއާއިން ސަލާމަތްވެފައިވާކަމަށް ޑަބްލިޔުއެޗްއޯ އިން ސެޓިފައި ކޮށްފައެވެ. މި ސެޓިފިކެޓް ދެވެނީ އެނޮފެލީސް މަދިރީގެ ޒަރީޢާއިން ފެތުރޭ މެލޭރިއާ ވިލާތުގެ އެތެރޭގައި ފެތުރުން މަދުވެގެން ވޭތުވެދިޔަ ތިން އަހަރު ވަންދެން ހުއްޓުވިފައިވާކަން ސާބިތުކޮށްދިނުމުންނެވެ. އަދި އަލުން މި ބަލި ފެތުރުން ހުއްޓުވުމުގެ ޤާބިލުކަން ހުރިކަންވެސް ދައްކަންޖެހެއެވެ.

ޑަބްލިޔުއެޗްއޯގެ ތަފާސްހިސާބުތަކުން ދައްކާ ގޮތުގައި ކޮންމެ އަހަރަކު 600,000 އަށްވުރެ ގިނަ މީހުން މެލޭރިއާއިން މަރުވެއެވެ. މީގެ ތެރެއިން 95 އިންސައްތައަކީ އެފްރިކާގެ މީހުންނެވެ. އެންމެ ފަހުން ލިބެން ހުރި 2022 ވަނަ އަހަރުގެ ތަފާސްހިސާބުތަކުން ދައްކާ ގޮތުގައި އެ އަހަރު ދުނިޔޭގައި 249 މިލިއަން މެލޭރިއާގެ ކޭސް ރިޕޯޓުކުރެވިފައިވެއެވެ.

މިޞްރުގެ ޞިއްޙަތު ވަޒީރު ޚާލިދު ޢަބްދުލްޣައްފާރު ވިދާޅުވި ގޮތުގައި "މިއަދު މެލޭރިއާ ނައްތާލުމުގެ ސެޓިފިކެޓް ލިބުމަކީ ދަތުރުގެ ނިމުމެއް ނޫނެވެ. އައު މަރުޙަލާއެއްގެ ފެށުމެވެ."

މެލޭރިއާއަކީ މަދިރީގެ ޒަރީޢާއިން ފެތުރޭ، ޕެރަސައިޓެއްގެ ސަބަބުން ޖެހޭ ބައްޔެކެވެ. މި ބަލި ގިނައިން ފެންނަނީ ހޫނު މޫސުމުގެ ޤައުމުތަކުގައެވެ.